الماتىدا 1-رەسپۋبليكالىق جاستار تەاترلارى فەستيۆالى باستالدى
الماتىدا 1-6-قاراشا كۇندەرى ءى رەسپۋبليكالىق جاستار تەاترلارى فەستيۆالى وتەدى، دەپ حابارلايدى Kazinform.
فەستيۆالدىڭ سالتاناتتى اشىلۋى ع. مۇسىرەپوۆ اتىنداعى قازاق مەملەكەتتىك اكادەميالىق بالالار مەن جاسوسپىرىمدەر تەاترىندا ءوتتى. شارا بارىسىندا ەلىمىزدە ۇزدىك دەپ تانىلعان قويىلىم رەجيسسەرلەرى ماراپاتتالدى.
اتاپ ايتقاندا، گۇلناز بالپەيىسوۆا، مەيرام حابيبۋللين، انتون زايسەۆ، الىبەك ومىربەك ۇلى، شاعۋان ۇمبەتقاليەۆ، اننا سوي، ءاريداش وسپانبايەۆا جانە شىڭعىس جاقىپباي سىندى 35 جاسقا دەيىنگى جاس رەجيسسەرلەر ارنايى ديپلوم جانە 1 ميلليون تەڭگە كولەمىندەگى سەرتيفيكاتتارمەن ماراپاتتالدى.
ايتۋ كەرەك، ۇزدىكتەر قاتارىنان تابىلعان وتاندىق جاس رەجيسسەرلەردىڭ قويىلىمدارى 2-6-قاراشا ارالىعىندا مەگاپوليستىڭ تەاترلارىندا ساحنالاناتىن بولادى. بۇل رەتتە استانا قالاسى اكىمدىگىنىڭ جاستار تەاترى، م. اۋەزوۆ اتىنداعى قازاق ۇلتتىق دراما تەاترى، س. سەيفۋللين اتىنداعى قاراعاندى وبلىستىق اكادەميالىق دراما تەاترى جانە تاعى باسقا ونەر ۇجىمدارى ۇزدىك قويىلىمدارىن ۇسىنباقشى.
فەستيۆالدى ۇيىمداستىرۋشىلاردىڭ سوزىنشە، فەستيۆال تەاتر الەمىندەگى جاس رەجيسسەرلەردىڭ جەتىستىكتەرىن ناسيحاتتاپ، ولاردىڭ كاسىبي الەۋەتىن ارتتىرۋ ماقساتىندا وتەدى.
