الماتى وبلىسىنداعى كولونيادا 14 بالانىڭ اۋىرىپ جاتقانى راس پا
قونايەۆ. KAZINFORM - الماتى وبلىسىنىڭ دەنساۋلىق ساقتاۋ باسقارماسى جاۋعاشتى اۋىلىنداعى ايەلدەر كولونياسىندا بالالاردىڭ جاپپاي اۋىرىپ قالعانى تۋرالى اقپاراتقا تۇسىنىكتەمە بەردى.
ادۆوكات ايمان وماروۆا ءوزىنىڭ الەۋمەتتىك جەلىدەگى پاراقشاسىندا №10 ايەلدەردى تۇزەۋ مەكەمەسىندە 14 بالا اۋىرىپ قالعانىن، ولاردىڭ ۇشەۋى اۋىر جاعدايدا رەانيماتسيادا ەكەنىن جازدى.
- ولار ۋلانعان نەمەسە ينفەكتسيا - مۇنى انىقتاۋ كەرەك، - دەدى ول.
مەكەمەنى مەديتسينالىق قىزمەتپەن قامتاماسىز ەتەتىن الماتى وبلىسى دەنساۋلىق ساقتاۋ باسقارماسىنىڭ مالىمەتىنشە، 26- ناۋرىزدا باسقارماسى باسشىسىنىڭ ورىنباسارى جانە مامانداندىرىلعان پروكۋرور، سونداي-اق وبلىستىڭ قىلمىستىق- اتقارۋ جۇيەسى دەپارتامەنتىنىڭ وكىلدەرى بىرلەسە مەكەمەنى ارالاپ شىققان. تەكسەرۋگە سانيتارلىق-ەپيدەميولوگيالىق باقىلاۋ قىزمەتىنىڭ ماماندارى مەن قىزمەتكەرلەرى دە قاتىسقان. ناتيجەسىندە 14 بالانىڭ اۋىرعانى تۋرالى اقپارات راستالمادى.
- قازىرگى ۋاقىتتا مۇندا بالالارىمەن بىرگە سوتتالعان 63 ايەل بار. 2025 -جىلدىڭ 22-23 ناۋرىزى ارالىعىندا ءۇش بالا ىلە اۋدانى ورتالىق اۋرۋحاناسىنىڭ ينفەكتسيالىق بولىمشەسىنە "ەنتەروۆيرۋستىق ينفەكتسيا، 0-1 دارەجەلى دەگيدراتاتسيا" دياگنوزىمەن جاتقىزىلدى. ولاردىڭ جاعدايى ورتاشا اۋىرلىقتا، وڭ ديناميكا بايقالادى. ءبىر بالا باستاپقىدا رەانيماتسيا بولىمىندە بولدى، سودان كەيىن ينفەكتسيا بولىمىنە اۋىستىرىلدى. قازىرگى ۋاقىتتا ەكى بالا جۇقپالى اۋرۋلار بولىمىندە انالارىمەن بىرگە. ال بىرەۋى مەدبيكەمەن بىرگە، ويتكەنى ونىڭ اناسى ەم الىپ جاتىر، - دەپ حابارلادى باسقارمادان.
ەسكە سالايىق، بۇعان دەيىن قازاقستان تۇرمەلەرىندەگى 1 مىڭنان استام ايەل راقىمشىلىققا ءىلىنۋى مۇمكىن ەكەنىن جازعانبىز.
