الماتى وبلىسىندا ءبىرقاتار ەكونوميكالىق قىلمىستىڭ بەتى اشىلدى

الماتى وبلىسى بويىنشا ەكونوميكالىق تەرگەپ-تەكسەرۋ دەپارتامەنتى باسشىسىنىڭ ورىنباسارى اسەت جامانبايەۆتىڭ ايتۋىنشا، «اقشانىڭ ىزىمەن» قاعيداتىن باسشىلىققا الا وتىرىپ تەرگەۋ - بيۋدجەت قاراجاتىن مەن كۆازيمەملەكەتتىك سەكتوردىڭ قاراجاتىن ۇرلاۋ فاكتىلەرىن اشۋعا مۇمكىندىك بەرگەن.

اتاپ ايتقاندا، وبلىستا جەكە مەديتسينالىق ۇيىمنىڭ باسشىلىعى 1,6 ميلليارد تەڭگە جىمقىرعانى انىقتالدى. ۇيىم اۋداندىق اۋرۋحانالاردىڭ ءبىرىن جانە ونىڭ اۋىلدارداعى امبۋلاتوريالارىن سەنىمگەرلىك باسقارۋعا الىپ، تۇرعىنداردى جالعان ەسەپتەۋ ارقىلى تەگىن مەديتسينالىق كومەكتىڭ كەپىلدىك بەرىلگەن كولەمى شەڭبەرىندە بولىنگەن 1,6 ميلليارد تەڭگەنى ۇرلاعان.

- ۇرلانعان قاراجات باقىلاۋداعى كومپانيالار ارقىلى عيمارات ساتىپ الۋ، ونى جوندەۋ جانە مەديتسينالىق جابدىقتار الۋ ارقىلى زاڭداستىرىلعان. وسى ارقىلى باستى كۇدىكتى مەديتسينالىق ورتالىق اشقان. قازىرگى ۋاقىتتا تاركىلەۋ ماقساتىندا وسى مەديتسينالىق ورتالىققا جانە زاڭسىز تابىسقا ساتىپ الىنعان 8 اۆتوكولىككە تىيىم سالىندى، - دەدى اسەت جامانبايەۆ.

سونىمەن قاتار ول تالعار اۋدانى مەن قونايەۆ قالاسىندا بيۋدجەت قاراجاتىن نەگىزسىز جۇمساۋعا جول بەرىلمەگەنىن اتاپ ءوتتى.

ونىڭ ايتۋىنشا، قونايەۆ قالاسىندا گازبەن جابدىقتاۋ جەلىلەرىن سالۋعا 132 ميلليون تەڭگە، ال تالعار اۋدانى ەلامان اۋىلىنىڭ گاز قۇبىرى مەن گاز تاراتۋ جەلىلەرىن سالۋ قۇنىنا 313 ميلليون تەڭگە نەگىزسىز قوسىلعان.

ەسكە سالايىق، بۇعان دەيىن اتىراۋدا باعانى نەگىزسىز وسىرگەن كاسىپكەرلەرگە 2,8 ميلليون تەڭگە ايىپپۇل سالىنعانىن جازعانبىز.

اۆتور

دوسبول اتاجان

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى