الماتى وبلىسىندا 600 ميلليون تەڭگەگە الاياقتىق جاساعان دروپپەرلەر توبى ۇستالدى
الماتى. KAZINFORM — الماتى وبلىسى پوليتسيا دەپارتامەنتىنىڭ كيبەرقىلمىسقا قارسى كۇرەس باسقارماسىنىڭ قىزمەتكەرلەرى ق ر ءى ءى م كيبەرقىلمىسقا قارسى كۇرەس دەپارتامەنتىنىڭ ۇيلەستىرۋىمەن Telegram مەسسەندجەرى ارقىلى الاياقتىقپەن اينالىسقان قىلمىستىق توپتىڭ ۇيىمداستىرۋشىسى مەن ونىڭ ءتورت سىبايلاسىن قولعا ءتۇسىردى.
- تەرگەۋ بارىسىندا انىقتالعانداي، ۇستالعان كۇدىكتى - قىلمىستىق سحەمانىڭ كۋراتورى 2024 -جىلدىڭ ماۋسىم ايىنان باستاپ 50 دەن استام «دروپتاردى» باسقارعان. ولار — ءوز اتىنا نەمەسە ءۇشىنشى تۇلعالاردىڭ اتىنا بانكتىك كارتالار راسىمدەگەن. قىلمىستىق توپتىڭ شوتتارى ارقىلى مىڭنان استام قارجىلىق وپەراتسيا جۇرگىزىلىپ، جالپى اينالىم سوماسى 580 ميلليون تەڭگەدەن اسقان. ءاربىر ترانزاكتسيادان كۋراتور 6 پايىز كولەمىندە كوميسسيا الىپ وتىرعان، ونىڭ زاڭسىز تابىسى 35 ميلليون تەڭگەدەن اسقانى بەلگىلى بولدى، - دەلىنگەن حابارلامادا.
Polisia.kz ءتىڭ مالىمەتىنشە، «انتيفرود ورتالىعى» بازاسى ارقىلى جۇرگىزىلگەن تەكسەرۋ بارىسىندا دروپتارعا قاتىستى قىلمىستىق ىستەر ەلىمىزدىڭ بىرنەشە وڭىرىندە - الماتى وبلىسىنىڭ قاراساي جانە ەڭبەكشىقازاق اۋداندارىندا، الماتى، شىمكەنت، قىزىلوردا قالالارىندا جانە ماڭعىستاۋ وبلىسىندا تەرگەلىپ جاتىر.
بەلگىلى بولعانداي، قىلمىستىق توپتىڭ باسشىسى Telegram ارقىلى «وڭاي اقشا تابۋ» تۋرالى جالعان حابارلاندىرۋلار تاراتىپ، دروپتار قاتارىن تولىقتىرعان. كۋراتور ادامداردى بانكتىك كارتالاردى ءوز اتىنا نەمەسە بوتەن تۇلعالاردىڭ اتىنا راسىمدەۋگە كوندىرگەن. قىلمىسكەرلەر بۇل كارتالاردى جابىرلەنۋشىلەردەن ءتۇرلى سىلتاۋمەن، ياعني ينۆەستيتسيا سالۋ نەمەسە تاۋارلار مەن قىزمەتتەر ءۇشىن اقى تولەۋ تۇرىندەگى جالعان ارەكەتتەر ارقىلى اقشا اۋدارىپ، ءىزىن جاسىرۋ ءۇشىن پايدالانعان.
ۇرلانعان قاراجات قولما-قول شەشىلىپ، كريپتوۆاليۋتاعا ايىرباستالعان نەمەسە باسقا ەسەپشوتتارعا تاراتىلىپ وتىرعان. قىلمىستىق سحەمانىڭ ۇيىمداستىرۋشىلارى نەگىزگى پايدانى ءوزارا بولىسسە، دروپتارعا از عانا سىياقى بەرىلگەن. ال ولاردىڭ بانكتىك كارتالارى اۋىر قۇقىق بۇزۋشىلىقتاردا پايدالانىلعاندىقتان، قىلمىستىق جاۋاپكەرشىلىككە تارتىلىپ وتىر. ال الاياقتىقتىڭ نەگىزگى ۇيىمداستىرۋشىلارى مەن كۋراتور كولەڭكەدە ارەكەت ەتكەن.
قازىرگى ۋاقىتتا كۇدىكتىلەر ۇستالىپ، تەرگەۋ يزولياتورىنا قامالدى. تەرگەۋ بارىسىندا ولاردىڭ وزگە دە ۇقساس قىلمىستارعا قاتىستىلىعى تەكسەرىلۋدە. سونىمەن قاتار پوليتسيا ەكىنشى دەڭگەيلى بانكتەرگە سانكتسيالانعان سۇراۋلار جولداپ، باسقا دا كۇدىكتى وپەراتسيالاردى انىقتاۋدى جوسپارلاپ وتىر.
قۇقىق قورعاۋ ورگاندارى ازاماتتارعا الاياقتاردان ساق بولۋعا كەڭەس بەرەدى جانە بانك شوتتارى مەن جەكە دەرەكتەردى بوگدە ادامدارعا بەرمەۋگە شاقىرادى. ەگەر كۇماندى قارجىلىق ارەكەتتەر بايقالسا، دەرەۋ پوليسياعا حابارلاسۋ قاجەت ەكەنىن ەسكەرتەدى.
