الماتى تۇرعىنى سيرەك كەزدەسەتىن سىرقاتقا شالدىققانىن 34 جاسىندا ءبىلدى
الماتى. KAZINFORM -كارديولوگيا جانە ىشكى اۋرۋلار عىلىمي-زەرتتەۋ ينستيتۋتىندا العاش رەت مۋكوپوليساحاريدىڭ IV تۇرىنە شالدىققان پاتسيەنتكە يندۋكتسيالىق فەرمەنتتى الماستىرۋ تەراپياسى جۇرگىزىلدى.
كارديولوگيا جانە ىشكى اۋرۋلار عىلىمي-زەرتتەۋ ينستيتۋتىنىڭ باسپا ءسوز قىزمەتى اتاپ وتكەندەي، 34 جاستاعى الماتىلىق بانۋ يشانعاليەۆا مۋكوپوليساحاريدوز نەمەسە گۋرلەر سيندرومى-سيرەك كەزدەسەتىن گەندىك اۋرۋعا بالا كۇنىندە شالدىققان. الايدا، وعان بۇل دياگنوزدى بيىل جاز ايىندا قويعان.
«ول بالا كەزىنەن اۋىرعان. دەنساۋلىعىنا بايلانىستى كوپتەگەن قيىنشىلىق كورگەن. گەنەتيك دارىگەرگە تەك بىلتىر عانا جۇگىنگەن ەكەن. مامان بىردەن گەنەتيكالىق زەرتتەۋلەرگە تەست تاپسىرۋدى ۇسىنعان، ناتيجەسىندە وسى جىلدىڭ شىلدە ايىندا مۋكوپوليساحاريدىڭ IV ءتۇرى دياگنوزى قويىلدى. سول ۋاقىتتان باستاپ گەنەتيك ماماندا جانە كارديولوگيا جانە ىشكى اۋرۋلار عىلىمي-زەرتتەۋ ينستيتۋتىندا دارىگەرلەردىڭ باقىلاۋىندا، ويتكەنى ينستيتۋت ەرەسەكتەرگە ارنالعان ورفاندىق اۋرۋلار ورتالىعى رەتىندە دە قىزمەت اتقارادى»،- دەدى دارىگەر مارجان ابدۋللايەۆا.
ريەۆماتولوگتىڭ ايتۋىنشا، مۋكوپوليساحاريدوزدىڭ نەگىزگى ەمى: فەرمەنتتى الماستىرۋ تەراپياسى.
كارديولوگيا جانە ىشكى اۋرۋلار عىلىمي-زەرتتەۋ ينستيتۋتىندا العاش رەت اتالعان ەمدەۋ ءتاسىلى بانۋ يشانعاليەۆاعا قولدانىلدى.
«بۇل ەلوسۋلفازا-الفا، اپتا سايىن 1 ك گ سالماققا 2 م گ مولشەرىندە - 250,0 م ل فيز ەرىتىندىگە تامىرعا تامشىلاتىپ قۇيىلادى. ايتا كەتۋ كەرەك، بۇل پرەپارات تەگىن مەديتسينالىق كومەكتىڭ كەپىلدىك بەرىلگەن كولەمى شەڭبەرىندە بەرىلەدى. سوندىقتان بولاشاقتا پاتسيەنت تۇرعىلىقتى جەرى بويىنشا فەرمەنتتى الماستىرۋ تەراپياسىن الا الادى. بۇل تەراپيا اۋرۋدىڭ دامۋىن توقتاتۋعا جانە ءومىر ساپاسىن جاقسارتۋعا كومەكتەسەدى»، - دەيدى دارىگەر.
مۋكوپوليساحاريدىڭ IV ءتۇرى-ليزوسومالىق اۋرۋلارى توبىنىڭ سيرەك كەزدەسەتىن گەنەتيكالىق اۋرۋى. ول بويىنىڭ تاپالدىعى، بەت ءپىشىنى ەرەكشەلىكتەرىمەن، جۇرەك-تامىرلار جۇيەسى مەن تىنىس الۋ ورگاندارىنىڭ زاقىمدالۋىمەن، اياقتىڭ، سۇيەكتەردىڭ دەفورماتسياسىمەن، ءجۇرىستىڭ بۇزىلۋىمەن سيپاتتالادى.
اۆتور
الما مۇقانوۆا
