الماتى تۇرعىندارى قالاداعى كوپىرلەردىڭ اقاۋلارىنا قاتىستى ماسەلە كوتەردى
الماتى. KAZINFORM - الماتى اكىمى ەربولات دوسايەۆ پەن قالالىق موبيلدىلىك باسقارماسىنىڭ باسشىسى ساعىندىق تەلىبايەۆ شاھارداعى كوپىرلەردىڭ جىگى نەلىكتەن اجىراپ جاتقانىن ءتۇسىندىردى.
تۇركسىب اۋدانى تۇرعىندارىنىڭ ءبىرى قالا اكىمىنەن كوپىرلەردەگى اقاۋلار تۋرالى سۇرادى.
«رىسقۇلوۆ داڭعىلىندا بىرنەشە كوپىر بار جانە ولاردا مەزگىل-مەزگىل دەفورماتسيالىق اقاۋلار پايدا بولىپ تۇرادى»، - دەدى ول.
قالالىق موبيلدىلىك باسقارماسىنىڭ باسشىسى ساعىندىق تەلىبايەۆتىڭ ايتۋىنشا، قىستا بەتون كونسترۋكتسيالارى قىسقارىپ، سونىڭ سالدارىنان دەفورماتسياعا ۇشىرايدى.
«رىسقۇلوۆ داڭعىلىندا ءبىر كوپىر قالدى، ونداعى اقاۋ جوندەلەدى، قارجى ءبولىندى. وزدەرىڭىز بىلەتىندەي، قىستا بەتون كونسترۋكتسيالارى قىسقارادى، ناتيجەسىندە دەفورماتسيالىق اجىراۋ كەڭەيەدى، ال جازدا كەرىسىنشە. سوندىقتان رەزەڭكە تىگىس تولتىرعىشتارى جىرتىلادى. وتكەن جىلى التى كوپىر قۇرىلىمىنا ءبىز نەمىس ءوندىرىسىنىڭ تولتىرعىشتارىن ورناتتىق»، - دەپ ءتۇسىندىرى باسقارما باسشىسى.
قالا اكىمى ەربولات دوسايەۆ قازىر قولايلى تەحنولوگيالار ىزدەستىرىلىپ جاتقانىن جەتكىزدى.
«كوپىر قۇرىلىمدارى قوزعالادى، سوندىقتان ءبىز وڭتايلى شەشىمدەردى ىزدەيمىز. ءبىز ءارتۇرلى تەحنولوگيالاردى قاراستىرامىز، ەندى نەمىس تەحنولوگياسىنىڭ قالاي بولاتىنىن كورەمىز»، - دەپ اتاپ ءوتتى اكىم.
