الماتى سەيسميكالىق ايماقتا ورنالاسقان، ءزىلزالا كەز كەلگەن ۋاقىتتا بولۋى مۇمكىن - مامان

باسپا ءسوز ءماسليحاتىندا جۋرناليستەر الەۋمەتتىك جەلىلەردە 15-قاڭتار كۇنى الماتىدا جويقىن جەر سىلكىنىسى بولاتىنى تۋرالى اقپارات تاراعانىن ەسكە سالدى. ب ا ق وكىلدەرى مامانداردىڭ مۇنداي بولجامداردى قالاي باعالايتىنىن سۇرادى.

داۋلەت سارسەنبايەۆتىڭ ايتۋىنشا، سەيسمولوگيا - جاس عىلىم، ءبىراق ۇلتتىق سەيسمولوگيالىق باقىلاۋلار جانە زەرتتەۋلەر عىلىمي ورتالىعى 1976-جىلدان بەرى زەرتتەۋ جۇرگىزىپ كەلەدى.

العاشقى سەيسميكالىق باقىلاۋ ستانسالارى سوناۋ 1927-1930-جىلدارى ورناتىلدى.

قازاقستاندا سەيسميكالىق بەلسەندىلىكتى باقىلاۋ جانە قاداعالاۋ كوپتەگەن ونداعان جىلدار بويى جۇرگىزىلىپ كەلەدى. سوندىقتان بلوگەرلەردىڭ تۇجىرىمىنا ەمەس، مامانداردىڭ دەرەكتەرىنە سۇيەنگەن ءجون.

«بلوگەرلەر سەيسميكالىق جاعداي تۋرالى بولجام جاساعاندا قانداي دەرەكتەرگە سۇيەنىپ جاتقانىن بىلمەيمىز. وتكەن جولى نە بولدى، كەشە تۇندە نە بولدى، ادامدار رەسمي ۇيىمدارعا سەنبەي كوشەگە شىعا باستادى. ءبىز سەيسميكالىق ايماقتا تۇرامىز. جەر سىلكىنىسى كەز كەلگەن ۋاقىتتا بولۋى مۇمكىن. وسىنى ءتۇسىنۋىمىز كەرەك، اسىرەسە الماتىدا جانە الماتى وبلىسىندا تاريحتا بىرنەشە رەت جويقىن جەر سىلكىنىسى بولعان»، - دەدى سەيسمولوگ.

مامان ومىرگە قاۋىپ توندىرەتىن - جەر سىلكىنىسى ەمەس، ونىڭ اكەلەتىن سالدارى - ءورت، كوشكىن، سەل ەكەنىن تىلگە تيەك ەتتى.

«جەر سىلكىنىسى كەزىندەگى ارەكەت ەتۋ ەرەجەسىن بىلگەندە عانا ءومىرىمىزدى امان الىپ قالا الامىز. وزىمىزدەن باستاۋ كەرەك»، - دەپ تۇيىندەدى داۋلەت سارسەنبايەۆ.

اۆتور

الما مۇقانوۆا

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى