الماتى مەن قىتايدىڭ ءىرى قالالارى اراسىنداعى اۋە باعىتتارى كەڭەيتىلمەك
الماتى. KAZINFORM - الماتى اكىمى ەربولات دوسايەۆ پەن Air China Limited اۋە كومپانياسىنىڭ ءتوراعاسى، China National Aviation Holding Company پرەزيدەنتى ما چونسيان مىرزامەن كەزدەستى.
كەزدەسۋ بارىسىندا الماتى مەن قىتايدىڭ ءىرى قالالارى اراسىنداعى اۋە قاتىناسىن كەڭەيتۋ، سونداي-اق تۋريستىك جانە ىسكەرلىك بايلانىستاردى نىعايتۋ ماسەلەسى ءسوز بولدى.
ءىس-شارا الماتى اكىمى ەربولات دوسايەۆتىڭ قىتاي حالىق رەسپۋبليكاسىنا جاساعان جۇمىس ساپارى اياسىندا بەيجىڭدە ءوتتى.
كەزدەسۋدىڭ نەگىزگى ناتيجەسى - الماتى اكىمدىگى مەن قىتايدىڭ ۇلتتىق اۋە تاسىمالداۋشىسى Air China اراسىنداعى رەيستەردى اشۋعا جاردەمدەسۋ جونىندەگى مەموراندۋمعا قول قويۋى بولدى.
تاراپتار ەكى ەل اراسىنداعى ەكونوميكالىق ءوسىم مەن مادەني الماسۋدىڭ ماڭىزدىلىعىن اتاپ، جولاۋشىلار لەگىن ارتتىرۋ ءارى قازاقستان مەن قىتاي تۋريستەرىنە لوگيستيكانى جەڭىلدەتۋ ءۇشىن «الماتى- بەيجىڭ» قوسىمشا رەيسىن جانە «الماتى- چىڭدۋ» جاڭا رەيسىن ىسكە قوسۋ مۇمكىندىگىن قاراستىردى.
- قول قويىلعان مەموراندۋم - الماتىنىڭ حالىقارالىق كولىك بايلانىسىن دامىتۋداعى ماڭىزدى قادام. قىتاي - الماتى تۋريزمىن دامىتۋداعى نەگىزگى ماقساتتى نارىقتىڭ ءبىرى. 2024 -جىل قىتايداعى قازاقستان تۋريزمى جىلى بولىپ جاريالاندى، ال بيىلعى جىل - قازاقستانداعى قىتاي تۋريزمى جىلى. بىلتىر الماتىعا قىتايدان 95,3 مىڭنان استام تۋريست كەلدى، بۇل %54- عا ءوسىم كورسەتتى. جاسالعان كەلىسىم اياسىندا تۋريستىك اعىننىڭ قارقىندى دامۋى جالعاسادى دەپ سەنەمىز، - دەدى ەربولات دوسايەۆ.
- Tongcheng Travel قىتاي اگەنتتىگىنىڭ «2025 -جىلدىڭ بولاشاعى ەڭ زور جاڭا باعىتى» ماراپاتى الماتىنىڭ تۋريستىك الەۋەتىنىڭ مويىندالعانىن جانە قىتايلىق تۋريستەردىڭ ايماققا دەگەن قىزىعۋشىلىعىنىڭ ارتقانىن كورسەتەدى. جالپى، 2024 -جىلى الماتىعا شامامەن 2 ميلليون تۋريست كەلدى، ونىڭ ىشىندە 600 مىڭنان استامى شەتەلدىك. 2025 -جىلى 2,3 ميلليون تۋريست، ونىڭ ىشىندە 700 مىڭ شەتەلدىك تۋريست كەلەدى دەپ كۇتىلۋدە، - دەدى ەربولات دوسايەۆ.
- ءوز كەزەگىندە China National Aviation Holding Company پرەزيدەنتى ما چونسيان مىرزا كەزدەسۋگە العىس ءبىلدىرىپ، بولاشاقتاعى جەمىستى ىنتىماقتاستىققا نيەتتى ەكەنىن جەتكىزدى. «الماتى - قازاقستاننىڭ مادەني، ىسكەرلىك جانە تۋريستىك ورتالىعى، سونداي-اق ەۋروپا مەن ازيانى بايلانىستىراتىن ماڭىزدى بۋىن. قازاقستاننىڭ باستى «اۋە قاقپاسى» رەتىندە الماتى ورتالىق ازيا بويىنشا ساياحاتتاردىڭ باستاپقى نۇكتەسى بولىپ تابىلادى»، - دەدى ول.
الماتى- بەيجىڭ باعىتىنداعى قوسىمشا رەيس پەن «الماتى- چىڭدۋ» باعىتىنداعى جاڭا رەيس 2024 -جىلدىڭ ماۋسىم ايىندا ىسكە قوسىلادى دەپ جوسپارلانىپ وتىر. قازىرگى ۋاقىتتا ق ر كولىك مينيسترلىگىمەن بىرلەسىپ دايىندىق جۇمىستارى جۇرگىزىلۋدە. ءتيىستى باعىتتار ۇشۋ قۇقىقتارى بولىنگەننەن كەيىن اشىلادى.
«الماتى- بەيجىڭ» قوسىمشا رەيسى مەن «الماتى- چىڭدۋ» جاڭا رەيسىن بيىل ماۋسىم ايىندا ىسكە قوسۋ جوسپارلانۋدا. قازىرگى ۋاقىتتا دايىندىق جۇمىستارى جۇرگىزىلىپ جاتىر، ءتيىستى باعىتتار ۇشۋ قۇقىقتارى بولىنگەننەن كەيىن اشىلادى.
ايتا كەتەيىك، قازاقستاننىڭ ەڭ ءىرى قالاسى رەتىندە الماتى كولىك ينفراقۇرىلىمىن بەلسەندى تۇردە جاڭعىرتىپ كەلەدى. 2024 -جىلى جاڭا حالىقارالىق اۋەجاي تەرمينالىنىڭ قۇرىلىسى اياقتالىپ، ونىڭ وتكىزۋ قابىلەتى جىلىنا 14 ميلليون جولاۋشىعا دەيىن ارتتى.
وسىعان دەيىن الماتىدا قانداي الەۋمەتتىك نىساندار سالىنىپ، جوندەلەتىنى تۋرالى جازعان ەدىك.
