الماتى «الەمدەگى ەڭ لاستانعان ءىرى قالالار» تىزىمىنە ەندى
الماتى. قازاقپارات - 5 - جەلتوقساننان باستاپ الماتى «الەمدەگى ەڭ لاستانعان ءىرى قالالار» تىزىمىنە رەسمي تۇردە قوسىلدى. بۇل رەيتينگتى شۆەيتساريانىڭ IQAir حالىقارالىق كومپانياسى جۇرگىزەدى.
سول كۇنى الماتى توپ-10 قاتارىنا ەنىپ، ساعات 17:00 دە 5 - ورىنعا كوتەرىلدى. ءبىزدىڭ قالا كاراچي، باعدات، شانحاي جانە بىشكەك سياقتى مەگاپوليستەرمەن ءبىر قاتاردا تۇر. بەسىنشى ورىندا بولعان ساتتە الماتىداعى ورتاشا AQI (اۋا ساپاسىنىڭ يندەكسى) كورسەتكىشى 169 بولدى، بۇل دەڭگەي «دەنساۋلىققا زياندى» دەپ سانالادى.
ەندى الماتىلىقتار قالاداعى اۋا ساپاسىن الەمنىڭ باسقا ءىرى قالالارىمەن سالىستىرا الادى.
ءىرى قالالاردىڭ رەيتينگى شامامەن 120 ءىرى ءارى تانىمال مەگاپوليستى قامتيدى. قالالار اۋا ساپاسىنىڭ يندەكسى (AQI) بويىنشا باعالانادى. بۇل كورسەتكىش مەملەكەتتىك ورگاندار، زەرتتەۋ ينستيتۋتتارى، ۇكىمەتتىك ەمەس ۇيىمدار، كومپانيالار جانە ەرىكتىلەر باسقاراتىن مىڭداعان مونيتورينگ ستانتسيالارى مەن داتچيكتەردەن جينالعان مالىمەتتەر نەگىزىندە ەسەپتەلەدى. رەيتينگ ساعات سايىن جاڭارىپ وتىرادى، بۇل اۋا ساپاسىنداعى وزگەرىستەردى ناقتى ۋاقىت رەجيمىندە باقىلاۋعا مۇمكىندىك بەرەدى.
رەيتينگتىڭ ماقساتى - الەمدەگى ءىرى قالالاردىڭ اۋا ساپاسىن قاراپايىم ءارى تۇسىنىكتى تۇردە كورسەتۋ. بۇل ورماندارداعى ورتتەر، بيوماسسانىڭ جانۋى، وندىرىستىك بەلسەندىلىك، قۇمدى داۋىلدار جانە اۋا رايى جاعدايلارىنىڭ اۋانىڭ لاستانۋىنا اسەرىن ايقىنداۋعا كومەكتەسەدى.
رەيتينگتى iqair سايتىنان نەمەسە Airvisual موبيلدى قوسىمشا ارقىلى كورۋگە بولادى.
IQAir تۋرالى
IQAir - ادامدارعا، ۇيىمدارعا جانە ۇكىمەتتەرگە اۋا ساپاسىن جاقسارتۋعا اقپارات پەن ىنتىماقتاستىق ارقىلى كومەك بەرەتىن شۆەيتساريالىق تەحنولوگيالىق كومپانيا.
Almaty Air Initiative (AAI) قورى تۋرالى
Almaty Air Initiative (AAI) - الماتىنىڭ اۋا ساپاسىنا قاتىستى ماسەلەسىن شەشۋ ءۇشىن قۇرىلعان جەكە قور. ونىڭ قىزمەتى زەرتتەۋلەر جۇرگىزۋگە، ەكولوگيالىق جاعدايدى باقىلاۋعا جانە قازاقستاندا ەكولوگيالىق ادىلەت قاعيداتتارىن نىعايتاتىن جوبالىق مودەلدى ازىرلەۋگە باعىتتالعان. قوردىڭ نەگىزىن قالاۋشىلار - inDrive نەگىزىن قالاۋشى جانە باس ديرەكتورى ارسەن تومسكي مەن Sergek Group IT كومپانيالارى توبىنىڭ تەڭ قۇرىلتايشىسى جانە Freedom Telecom باس ديرەكتورى قايرات احمەتوۆ.
ەسكە سالساق، سينوپتيكتەر بۇعان دەيىن استانا، الماتى، قىزىلوردا، اقتوبە، اتىراۋ، پاۆلودار، بالقاش، تەمىرتاۋ، جەزقازعان، قاراعاندى قالالارىندا اۋا ساپاسى ناشارلايتىنىن بولجاعان بولاتىن.
