الماتى اكىمدىگى 1,5 جىل بويى ينۆەستورلاردى گازعا قوسپاي كەلگەن
الماتى پروكۋراتۋراسىنىڭ فرونت- وفيسىندە وتكىزىلگەن كەزدەسۋلەر بارىسىندا ينۆەستورلاردىڭ 1,5 جىل بويى گازبەن جابدىقتاۋ جەلىلەرىنە قوسىلا الماعانى انىقتالدى، دەپ حابارلايدى Kazinform.
2022-جىلى الماتى قالاسىنىڭ ەنەرگەتيكا جانە سۋمەن جابدىقتاۋ باسقارماسى يندۋستريالىق ايماقتا گازبەن جابدىقتاۋ ءۇشىن ماگيسترالدى ينجەنەرلىك-كولىكتىك جەلىلەرىنىڭ قۇرىلىسىن جۇرگىزگەن.
وعان ءبىرقاتار ينۆەستورلاردى قوسۋ جوسپارلانعان.
ءبىراق اكىمدىك نىساننىڭ «قازترانسگاز ايماق» ا ق تەڭگەرىمىنە بەرىلمەگەنىنە سىلتەمە جاساي وتىرىپ، گازبەن جابدىقتاۋ جەلىلەرىنە قوسۋدان باس تارتقان.
«تالداۋ ناتيجەسىندە پروكۋراتۋرا قاداعالاۋ اكىسىن ەنگىزدى. ونى قاراعاننان كەيىن اتالعان ماگيسترالعا 124 ميلليارد تەڭگەدەن استام سوماعا ينۆەستيتسيالىق جوبانى ىسكە اسىرىپ جاتقان، 3314 ادامعا جۇمىس بەرىپ وتىرعان 26 ينۆەستور قوسىلدى. سونىمەن بىرگە زاڭنامانىڭ بۇزىلۋىنا جول بەرگەنى ءۇشىن باسقارما باستىعىنىڭ ورىنباسارى تارتىپتىك جاۋاپكەرشىلىككە تارتىلدى» دەپ مالىمدەدى پروكۋراتۋرادان.
