الماتى اۋەجايىندا جالعان قۇجاتپەن وتپەك بولعان ءۇش شەتەلدىك ۇستالدى
استانا. KAZINFORM -15-16 قاڭتاردا الماتى قالاسىنىڭ حالىقارالىق اۋەجايىندا شەكارالىق باقىلاۋدى جۇزەگە اسىرۋ كەزىندە فرانتسيا مەن گرەتسيانىڭ جالعان قۇجاتتارىن ۇسىنعان 3 شەتەلدىك ۇستالدى.
ۇلتتىق قاۋىپسىزدىك كوميتەتىنىڭ مالىمەتىنشە، ارنايى تەحنيكالىق قۇرالداردى قولدانا وتىرىپ جۇرگىزىلگەن قوسىمشا تەكسەرۋ قۇجاتتاردىڭ جارامسىزدىعىن راستادى.
«جالعان ءتولقۇجاتتار الىندى. ەكى ادامعا قاتىستى سوتقا دەيىنگى تەرگەپ-تەكسەرۋ باستالدى، ءبىر شەتەلدىك ازامات دەپورتاتسيالاندى» ، - دەپ جازدى ۆەدومستۆودان.
2024 -جىلدىڭ باسىنان مەملەكەتتىك شەكارا ارقىلى وتكىزۋ پۋنكتتەرىندە شەكاراشىلار جارامسىز جانە بوتەن ءتولقۇجاتتاردى قولدانۋدىڭ 18 فاكتىسىنىڭ جولىن كەستى.
ۇ ق ك شەكارا قىزمەتى جالعان قۇجاتتاردى قولدانىپ، شەكارانى بۇزعانى ءۇشىن قىلمىستىق جاۋاپكەرشىلىككە تارتۋ قاراستىرىلعانىن حابارلايدى.
