الماتى اۋەجايىن باسىپ الۋ ءىسى: ادۆوكاتتار سوت عيماراتىنا كۇشپەن كىرمەك بولدى
بۇگىن الماتىدا قاڭتار وقيعاسى كەزىندە اۋەجايدى باسىپ الۋ ءىسى بويىنشا سوت تىڭداۋى ءوتۋى كەرەك ەدى. الايدا پروتسەسكە سوتتالعانداردىڭ ادۆوكاتتارى كەدەرگى كەلتىردى، دەپ حابارلايدى قازاقپارات ءتىلشىسى.
«سوت وتىرىسى ونلاين رەجيمدە وتكىزىلەدى دەپ جوسپارلانعان، بۇل جونىندە پروتسەسكە قاتىسۋشىلارعا الدىن الا حابارلاندى. الايدا، وسىعان قاراماستان، بىرنەشە ادۆوكات قالالىق سوت عيماراتىنا وفلاين وتىرىس وتكىزۋدى تالاپ ەتىپ كەلدى. ءتارتىپتى بۇزىپ، سوت عيماراتىنا كۇشپەن كىرۋگە تىرىسىپ، سوتتالعانداردىڭ ادۆوكاتتارى پروتسەسكە قوسىلمادى، وسىلايشا تىڭداۋدىڭ وتكىزىلۋىنە كەدەرگى كەلتىردى»، - دەپ ءمالىم ەتتى قالالىق سوتتان.
اتاپ وتىلگەندەي، قورعاۋشى تاراپ وسى ارەكەتتەرى ارقىلى وزدەرىنە سەنىم بىلدىرگەندەردىڭ قۇقىعىن ساقتاۋدى قامتاماسىز ەتە المادى. وسىعان بايلانىستى سوت القاسى قالالىق ادۆوكاتتار القاسىنىڭ اتىنا پروتسەستى بۇزعان تۇلعالارعا قاتىستى جەكە قاۋلى جولداۋ تۋرالى شەشىم قابىلدادى.
«وتىرىستى ونلاين وتكىزۋ تۋرالى شەشىم ءبىرىنشى ينستانتسياداعى سوتتا سوتتالۋشىلاردىڭ تۋىستارى، سونداي- اق باسقا قاتىسۋشىلار سوت تىڭداۋىنىڭ قالىپتى سيپاتتا جۇرۋىنە كەدەرگى كەلتىرىپ، اگرەسسيۆتى ءىس- ارەكەت جاساۋىنا بايلانىستى قابىلدانعان بولاتىن. ولاردىڭ وسىنداي ءىس- ارەكەتى سالدارىنان سوت زالىنداعى مۇلىك ءبۇلىندى. سونىمەن قاتار بۇل ارەكەتتەر سوتتاعى پاراللەل پروتسەستەرگە دە كەدەرگى كەلتىردى»، - دەپ اتاپ ءوتتى قالالىق سوتتىڭ باسپا ءسوز قىزمەتىنەن.
