الەم چەمپيوناتى: قازاقستان قۇراماسى 12 جىلعا سوزىلعان ساتسىزدىك سەرياسىن توقتاتتى
استانا. KAZINFORM - فۋتبولدان قازاقستان قۇراماسى 2026 -جىلعى الەم چەمپيوناتى ىرىكتەۋ كەزەڭىندەگى ەكىنشى كەزەدسۋىندە ليحتەنشتەيننەن باسىم ءتۇستى.
اتالعان ماتچتا دجون بيتون باستاعان شوتلانديالىق تورەشىلەر قىزمەت اتقاردى. وعان وتانداستارى دەنيەل ماكفارلەين مەن دەۆيد ماكگيچي كومەك بەردى.
ليحتەنشتەين فيفا رەيتينگىندە 204-ورىندا كەلەدى. ازىرگە ەشقانداي جوعارى ناتيجەسىمەن كوزگە تۇسكەن جوق.
سوعان قاراماستان قازاقستان قۇراماسىنىڭ باس باپكەرى مىندەتىن اتقارۋشى الي اليەۆ ءاربىر ويىنعا جاۋاپكەرشىلىكپەن قارايتىنىن ەسكە سالدى. العاشقى تۋرداعى ۋەلسپەن كەزدەسۋدەن كەيىن ءبىرشاما وزگەرىس ەنگىزدى. قاقپادا الەكساندر زارۋتسكيدىڭ ورنىنا مۇحاممەدجان سەيسەن جاسىل الاڭعا شىقتى. سونداي-اق قۇراما كاپيتانى اسحات تاعىبەرگەن، سەرىكجان مۋجيكوۆ قوسالقى قۇرامدا قالدى. ولاردىڭ ورنىنا گەورگي جۋكوۆ، رامازان ورازوۆ شىقتى. ال جاس فۋتبولشى داستان ساتپايەۆقا بىردەن شابۋىل شەبى سەنىپ تاپسىرىلدى.
العاشقى مينۋتتان قازاقستاندىق فۋتبولشىلار تىزگىندى قولعا الۋعا تىرىستى. وعان الاڭ يەلەرى لايىقتى قارسىلىق كورسەتتى. ولار شابۋىلعا تويتارىس بەرىپ، كەيبىر ساتتە قازاقستاندىق قورعاۋشىلاردى مازالاپ تۇردى.
ويىننىڭ 42-مينۋتىندا ارىپتەسى مارات بىستروۆتىڭ بەرگەن پاسىن شابۋىلشى ماكسيم سامورودوۆ گولعا اينالدىرا ءبىلدىردى. ارادا ءۇش مينۋت وتكەندە ادەمى پاس شىعاردى. بۇل مۇمكىندىكتى الەكسندار ماروچكين ءمۇلت جىبەرگەن جوق. ول ۇلتتىق قۇراما ساپىندا ەلۋىنشى كەزدەسۋىندە العاشقى گولىن سوقتى.
ەكىنشى كەزەڭدە قازاقستاندىق فۋتبولشىلار باسىمدىقتى ارتتىردى. سوعان قاراماستان ولار گول سوعا المادى. وسىلايشا قازاقستان قارسىلاسىنان 2:0 ەسەبىمەن باسىم ءتۇستى.
ايتا كەتسەك، بۇگىن قازاقستان الەم چەمپيوناتىنا ىرىكتەۋ تۋرنيرىندە ساتسىزدىك سەرياسىن توقتاتتى. اتالعان دودادا ەل قۇراماسى 12 جىل بويى جەڭىسكە جەتە الماي كەلگەن ەدى. سوڭعى رەت ەل قۇراماسى 2013 -جىلدىڭ قىركۇيەك ايىندا فارەر ارالدارىن (2:1) جەڭگەن بولاتىن. سودان بەرى ۇلتتىق كوماندا 22 ماتچ وتكىزىپ، 7 ويىندا تەڭ ءتۇسىپ، 15 كەزدەسۋدە جەڭىلىس تاپتى.
ەندى ەل قۇراماسى الداعى ويىنىن 9-ماۋسىمدا ءوز الاڭىندا سولتۇستىك ماكەدونيا قۇراماسىنا قارسى وتكىزەدى.
