الەم ەلدەرىندە جۇرگىزۋشى كۋالىگىن قالاي الادى

ا ق ش- تىڭ ءار شتاتىندا جول ءجۇرۋ ەرەجەسىنە قاتىستى زاڭ ءارتۇرلى. ماسەلەن، نيۋ-يوركتە جۇرگىزۋشى كۋالىگىن الۋ ءۇشىن، ارنايى كۋرستاردان ءوتۋ كەرەك. ال ۆاشينگتوندا تەك كامەلەت جاسقا تولماعاندار وقىتىلادى. سونداي- اق، ءبىرقاتار شتاتتا جول قوزعالىسى ەرەجەلەرىن جۇيەلى تۇردە بۇزاتىن جۇرگىزۋشىلەر مىندەتتى تۇردە قايتا وقىتۋ كۋرستارىنان وتەدى. نەگىزىنەن ەلدە اۆتومەكتەپتەر از. ويتكەنى جاپپاي مىندەتتى وقىتۋ قاراستىرىلماعان. تەك ءارتۇرلى بىرلەستىكتەرگە بىرىكتىرىلگەن.

جۇرگىزۋشى كۋالىگىن الۋ ءۇشىن ۇمىتكەر الدىمەن تەوريالىق، سوسىن پراكيكالىق ەمتيحان تاپسىرادى. پراكتيكالىق ەمتيحانعا ءوز بەتىنشە دايىندالۋى ءۇشىن ۋاقىتشا جۇرگىزۋشى كۋالىگى بەرىلەدى. ءبىراق بۇل جولدا الاڭسىز كولىك ايداۋعا بولادى دەگەن ءسوز ەمەس. شەكتەۋلەر بار. ماسەلەن، جولاۋشىلاردى تاسىمالداۋعا، تۇندە كولىك جۇرگىزۋگە تىيىم سالىنعان.

گەرمانيادا جول ەرەجەسى بويىنشا جەكە ساباقتار وتكىزۋگە بولمايدى

ال گەرمانيادا 10 مىڭنان استام اۆتومەكتەپ بار. ەڭ ۇلكەنى ميۋنحەندە ورنالاسقان. وندا 100 مىڭنان استام وقىتۋشى ساباق بەرەدى. ويتكەنى ەلدە جۇرگىزۋشى كۋالىگىن الۋ ءۇشىن جەكە ساباقتار وتكىزۋگە زاڭمەن تىيىم سالىنعان. ءتىپتى سىناقتان العاش وتكەن ۇمىتكەرگە بەرىلەتىن جۇرگىزۋشى كۋالىگىنىڭ جارامدىلىق مەرزىمى شەكتەۋلى بولادى.

ويتكەنى، 2 جىل ىشىندە جول قوزعالىسى ەرەجەلەرىن بۇزباۋى ماڭىزدى. سودان كەيىن عانا، ۋاقىتشا قۇجات تۇراقتى كۋالىككە اۋىستىرىلادى. ەگەر، ۋاقىتشا جۇرگىزۋشى كۋالىگىمەن ءجۇرىپ جول ەرەجەسىن بۇزسا، 40-تان مىڭ ەۋروعا دەيىن ايىپپۇل سالىنادى. ءتىپتى، ايىپپۇل بالى شەكتى كورسەتكىشكە جەتسە، جۇرگىزۋشى كۋالىگىنەن ايىرىلادى. ال ايىپپۇل بالىن سەمينارلارعا قاتىسۋ ارقىلى قىسقارتۋعا مۇمكىندىك بار.

نورۆەگيادا جۇرگىزۋشى كۋالىگى ۋاقىتشا بەرىلەدى

نورۆەگيادا دا جۇرگىزۋشى كۋالىگى الدىمەن ۋاقىتشا بەرىلەدى. ەمتيحانداعى جاقسى ناتيجە تەك 3 جىلعا جارامدى. ونى جاڭارتۋ ءۇشىن تاعى ەمتيحان تاپسىرۋ كەرەك. ول ەكى كەزەڭنەن تۇرادى. تەوريالىق جانە پراكتيكالىق. ۇمىتكەر سانىنىڭ كوپتىگىنە بايلانىستى، ەكەۋىنىڭ اراسىنداعى الشاقتىق 3 ايعا سوزۋىلۋى مۇمكىن. جالپى ەۋروپادا ەمتيحان وتكىزۋ شارالارىن كولىك مينيسترىلىگى قاتاڭ قاداعالايدى. 20-25 ماماننان تۇراتىن ارنايى توپ قۇرىلعان. ەمتيحان الۋشىنىڭ جاسى ەڭ كەمى 24-تەن اسقان بولۋى كەرەك. جوعارى تەحنيكالىق ءبىلىمى جانە نەگىزگى ماماندىعى بويىنشا كەمىندە 1,5 جىل جۇمىس ءوتىلى بولۋى مىندەتتى. سونداي-اق كولىك قۇرالدارىنىڭ بارلىق ءتۇرىن باسقارۋعا قۇقىق بەرەتىن قۇجاتى بولۋى كەرەك.

24.kz

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى