الەم ەلدەرىندە بلوگەرلەر قانداي سالىق تولەيدى

ءبىراق سول بلوگەرلەر الەم ەلدەرىندە سالىق تولەۋگە مىندەتتى ەكەنىن كوبى بىلە بەرمەيدى. سالىقتان جالتارعان جەلى بەلسەندىلەرىن زاڭ بويىنشا جازا دا كۇتىپ تۇر.

ا ق ش- تا كونتەنت جاساۋشىلار تاپقان ءار تابىسىنا سالىق تولەۋى ءتيىس. مەيلى ول حوببيى نەمەسە قوسىمشا جۇمىسى بولسىن. بۇل ا ق ش سالىق باسقارماسىنىڭ (IRS) تالابى.

ءوزىن-ءوزى جۇمىسپەن قامتىعان ادامدار سياقتى، بلوگەرلەر دە بلوگ جۇرگىزۋدەن تاپقان اقشاسىنان سالىق تولەۋى كەرەك. دەمەك، سەرىكتەستەردەن، جارنامالىق كىرىستەر مەن دەمەۋشىلەردەن تۇسكەن كەز كەلگەن قاراجاتقا سالىق سالىنادى.

ا ق ش- تاعى فەدەرالدى سالىق مولشەرلەمەسى پروگرەسسيۆتى، ياعني ءسىزدىڭ تابىسىڭىز نەعۇرلىم جوعارى بولسا، سالىق مولشەرلەمەسى سوعۇرلىم وسەدى. سالىق باسقارماسىنىڭ (IRS) مالىمەتىنە سۇيەنسەك، تابىس سالىعىنىڭ مولشەرلەمەسى %10- دان %37 عا دەيىنگى ارالىقتا.

ءوزىن-ءوزى جۇمىسپەن قامتىعاندار ءۇشىن سالىق ستاۆكاسى %15,3 قۇرايدى. تاريف ەكى بولىكتەن تۇرادى: الەۋمەتتىك قامسىزداندىرۋ ءۇشىن (قارتتىق، مۇگەدەكتىك جانە اسىراۋشىسىنان ايىرىلۋ بويىنشا ساقتاندىرۋ) %12,4 جانە Medicare (اۋرۋحاناداعى شىعىندار بويىنشا ساقتاندىرۋ) ءۇشىن %2,9.

بلوگەرلەر ءوز تابىس سوماسىنان بيزنەستى جۇرگىزۋ ءۇشىن قاجەت دەپ ساناعان ءارتۇرلى شىعىنداردى شەگەرىپ تاستاي الادى. ماسەلەن، فريلانسەرلەر قىزمەتى (گرافيكالىق ديزاين جاساۋ، سايت ازىرلەۋ نەمەسە ءماتىن جازىپ بەرۋ)، ماركەتينگ، جارناما بەرۋ جانە كەڭسەلىك كەرەك-جاراقتار الۋ.

سالىقتاردى ەسەپتەۋ كەزىندە بلوگەرگە تۇسكەن جارناما مەن سيفرلىق ونىمدەردى ساتۋ سياقتى كىرىس كوزدەرى ەسكەرىلەدى. سونداي-اق بلوگەردىڭ قانداي دا ءبىر تاۋارعا شولۋ جاساۋدان تاپقان اقشاسى دا تابىس بولىپ ەسەپتەلەدى.

ەگەر بلوگەر اقشانىڭ ورنىنا ءبىر سىيلىق السا (تەگىن تاۋار، ساپارعا شىعۋ) وندا ول تابىس بولىپ ەسەپتەلەدى. وعان دا سالىق تولەۋى قاجەت. تەك تاۋارعا شولۋ جاساعاندا اقشانىڭ ورنىنا سول تاۋاردى سىيلىققا بەرگەن جاعدايدا تاۋاردىڭ باعاسى $100 اسپايتىن بولسا عانا وعان سالىق سالىنبايدى.

ايتا كەتەيىك، بۇل ەلدە جەكە كاسىپكەرلىك، سەرىكتەستىك (sole proprietorship) جانە جاۋاپكەرشىلىگى شەكتەۋلى سەرىكتەستىك (LLC) سىندى بيزنەس جۇرگىزۋ تۇرلەرى تانىمال.

ۇلى بريتانيا

ۇلى بريتانيادا جەلى بەلسەندىلەرى تابىس سالىعىن جانە ۇلتتىق ساقتاندىرۋ قورىنا جارنا تولەۋى كەرەك. £12570 تەن (سالىق سالىنبايتىن شەك) كوپ پايدا كورەتىن كەز كەلگەن ادام وسى شەكتەن جوعارى سوما بويىنشا تابىس سالىعىن تولەۋگە مىندەتتى. بۇل مينيمۋم ساۋدا شەگەرىمى ارقىلى ۇلعايتىلۋى مۇمكىن.

تابىسقا كەلەسىدەي ستاۆكالار بويىنشا سالىق سالىنادى:

20%- £12571 دەن £50270 ارالىعىندا تابىس تاپقاندارعا

40%- £50271 دەن £125140 ارالىعىندا تابىس تاپقاندارعا

45%- £125141 دەن كوپ تابىس تاپقاندارعا.

سالىق ستاۆكالارى بارلىق كىرىسكە ەمەس، تەك بىرنەشە ساناتقا جاتاتىن تابىسقا عانا قولدانىلادى. مىسالى، ەگەر ءسىز ءبىر جىلدا £80000 تاپساڭىز، وندا كەلەسىدەي ەسەپتەلەدى: £37700 (£50270 - £12570). ياعني، %40 سالىق سالىنادى. سوندا ءبىر جىلداعى سالىقتىڭ كولەمى - £19292.

ۇلتتىق ساقتاندىرۋ جارنالارى (National Insurance) - بۇل مەملەكەتتىك تولەماقىعا باعىتتالعان سالىق. ەگەر بلوگەردىڭ جىلدىق تابىسى £90000 نەمەسە ودان دا كوپ بولسا، ولار سالىق تولەۋشى رەتىندە تىركەلۋى ءتيىس (تابىسى بۇل شەكتەن از بولعاندار ءوز ەركىمەن تىركەلە الادى). تىركەلگەننەن كەيىن قىزمەتتەرىنىڭ قۇنىنا قوسىلعان قۇن سالىعىن (ق ق س) قوسىپ وتىرادى. مىسالى، ەگەر جەلى بەلسەندىسى جارنامالىق پوست ءۇشىن £200 السا، وندا قىزمەت قۇنىن £240 دەپ كورسەتىپ، سونىڭ £40 ىن ۇلى بريتانيانىڭ سالىق جانە كەدەن باسقارماسىنا (HMRC) اۋدارادى.

سونداي-اق بلوگەرلەر كىرىستەرىنەن بيزنەس شىعىندارىن ەسەپكە الۋ جانە شەگەرۋ ارقىلى سالىق جۇكتەمەسىن ازايتا الادى. دەسە دە HMRC تالاپتارى قاتال - شىعىندار بيزنەستى جۇرگىزۋ ماقساتىندا عانا جۇمسالۋى ءتيىس. ونىڭ ىشىنە ۆيدەو تۇسىرۋگە كەرەكتى جابدىقتار جانە باسقا دا تەحنيكالار، ءىس ساپارلار، زاڭگەرلىك جانە بۋحگالتەرلىك قىزمەتتەر كىرەدى.

قىتاي

حاڭجوۋداعى قىتايلىق بلوگەر پان يۋرۋن شامامەن 100 ميلليون يۋان (13 ميلليون دوللار) سالىق تولەدى، دەپ حابارلايدى South China Morning Post.

2024-جىلدىڭ 14-ناۋرىزىندا پان تولەگەن سالىق سوماسىن ءوز ۆيدەوسىندا اشىق كورسەتتى. 95 ميلليون يۋان تولەگەنىنە سكرينشوت دالەل بولدى.

- سالىق تولەۋ اركىمنىڭ مىندەتى. مەن ءاردايىم سالىقتى تولىقتاي تولەيمىن جانە سالىقتان جالتاراتىن ارەكەتتەرگە بارمايمىن، - دەدى ول.

پان يۋرۋن Douyin جەلىسىندە جەكە پاراقشاسىن جۇرگىزەدى. سول ارقىلى قىزدار قاۋىمىنا تەرى كۇتىمى جانە ماكياج بويىنشا كەڭەستەرىمەن بولىسەدى.

- ەگەر ونىڭ تابىسىنا ەڭ جوعارى ستاۆكا -%45 مولشەرىندە تابىس سالىعى سالىنعان دەپ ەسەپتەسەك، ونىڭ 2023 -جىلى جىلدىق تابىسى 200 ميلليون يۋاننان (28 ميلليون دوللار) اسۋى مۇمكىن، - دەپ جازادى SCMP.

قىتايداعى تابىس سالىعى تابىس مولشەرىنە بايلانىستى ەسەپتەلەدى: %3 دان %45 ارالىعىندا.

2021 -جىلدىڭ جەلتوقسانىندا قىتايداعى ەڭ ءىرى ستريمەرلەردىڭ ءبىرى حۋان ۆەيگە (Viya دەگەن اتپەن تانىمال) سالىق تولەۋدەن جالتارعانى ءۇشىن 1,34 ميلليارد يۋان (210 ميلليون دوللار) كولەمىندە ايىپپۇل سالىندى. سونداي-اق جەلى جۇلدىزىنىڭ بارلىق اككاۋنتتارى بۇعاتتالعان.

رەسەي

كورشى ەلدە بلوگەرلەر تولەيتىن سالىقتار بيزنەستى تىركەۋ نىسانىنا (ءوزىن-ءوزى جۇمىسپەن قامتۋ، جەكە كاسىپكەر نەمەسە ج ش س) بايلانىستى.

تابىسى 2,4 ميلليون رۋبلگە دەيىن جەتەتىن بلوگەر ءوزىن-ءوزى جۇمىسپەن قامتۋشى رەتىندە تىركەلە الادى. ال ەگەر قىزمەتكەرلەرى بولسا جانە كىرىسى 2,4 ميلليون رۋبلدەن اسسا، وندا جەكە كاسىپكەر رەتىندە تىركەلەدى.

ءوزىن-ءوزى جۇمىسپەن قامتىعان جاعدايدا زاڭدى تۇلعالار مەن جەكە كاسىپكەرلەردەن (ي پ رەتىندە تىركەلگەندەردەن) الىناتىن تابىس سالىعى %6، ال جەكە تۇلعالاردان الىناتىن سالىق %4 قۇرايدى.

جەكە كاسىپكەرلەرگە سالىناتىن سالىقتار سالىق جۇيەسىنە جانە ايماققا بايلانىستى: وڭايلاتىلعان سالىق جۇيەسى بويىنشا -%1-15، جالپى سالىق جۇيەسى بويىنشا - %13-15، ق ق س -%20 عا دەيىن.

قازىر رەسەيدە بلوگەر ەلەنا بلينوۆسكاياعا قاتىستى سوت ءىسى ءجۇرىپ جاتىر. بۇل پروتسەسس وتكەن جىلدىڭ تامىز ايىنىڭ سوڭىندا باستالدى.

- تەرگەۋشىلەردىڭ ايتۋىنشا، بلينوۆسكاياعا 2019-2021-جىلدارى بيزنەستى بولشەكتەۋ سحەمالارىن پايدالانا وتىرىپ، 900 ميلليون رۋبلدەن استام سالىق تولەۋدەن جالتارۋ ايىبى تاعىلعان. ول 2023 -جىلدىڭ ساۋىرىندە ۇستالدى،- دەپ جازدى ت ا س س.

تالعاتجان مۇحامەتبەك ۇلى

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى