الەم عالىمدارى استانادا مەديتسينا ماسەلەلەرىن تالقىلاپ جاتىر

Nobel fest نەگىزىن قالاۋشى جانە ديرەكتورى ماقسات قۇربەنوۆ ءىس-شارانىڭ قازاقستاندىق قوعامداستىق ءۇشىن ماڭىزدى ەكەنىن اتاپ ءوتتى.

«بۇگىن مەديتسينا ماسەلەلەرىنە ارنالعان العاشقى Nobel fest ءوتىپ جاتىر. بۇل اۋقىمدى تاقىرىپ، ءبىز تۇتاس ايماقتا وسى تاقىرىپ بويىنشا العاشقى اۋقىمدى كونفەرەنسيا قۇرعىمىز كەلدى. فەستيۆال باعدارلاماسىنا امەريكادان، فرانتسيادان جانە تمد ەلدەرىنەن 40 تان استام حالىقارالىق ساراپشى مەن الەمدىك بەدەلدى ماراپات يەگەرلەرى قاتىسادى. فەستيۆالدىڭ ميسسياسى - الەمدىك ءبىلىمدى قولجەتىمدى ەتۋ جانە الەمدىك عالىمداردىڭ قازاقستانعا مەديتسيناداعى بىلىمىمەن جانە جاڭالىقتارىمەن ءبولىسۋ ءۇشىن كەلۋى»، - دەدى ماقسات قۇربەنوۆ.

دۇنيەجۇزىلىك دەنساۋلىق ساقتاۋ ۇيىمىنىڭ باس ديرەكتورى تەدروس ادانوم گەبرەيەسۋس بەينەقۇتتىقتاۋ جولداپ، فەستيۆال ۇيىمداستىرۋشىلارى مەن قاتىسۋشىلارىنا مەديتسينالىق ءبىلىم ينكليۋزياسى مەن COVID پاندەمياسى ساباقتارىن ەنگىزۋ قاجەتتىگىن ايتتى.

«يننوۆاتسيالار ءاردايىم دەنساۋلىق ساقتاۋ سالاسىنداعى پروگرەستىڭ قوزعالتقىشى بولدى. ۆاكسينالار، پەنيتسيللين جانە ادام گەنىن زەرتتەۋگە، تالداۋعا جانە ءتىپتى وزگەرتۋگە مۇمكىندىك بەرەتىن تەحنولوگيالاردى ەسكە تۇسىرەيىك. يننوۆاتسيالار - ءبىزدىڭ كوزقاراسىمىز بەن ميسسيامىزدىڭ ماڭىزدى بولشەگى. COVID-19 پاندەمياسى رەكوردتى ۋاقىتتا ۆاكتسينالار ازىرلەۋ ارقىلى يننوۆاتسيانىڭ تالاي ءومىردى قۇتقاراتىنىن ەسكە سالدى. دەگەنمەن بۇل يننوۆاتسيا ادىلدىكپەن بىرگە ءجۇرۋى كەرەك ەكەنىن دە كورسەتەدى. ۆاكسينا الۋداعى تەڭسىزدىك ادامداردىڭ ولىمىنە جانە پاندەميانىڭ ۇزاققا سوزىلۋىنا اكەلدى. سوندىقتان ۆاكسينالار مەن باسقا قۇرالدارعا تەڭ قولجەتىمدىلىك پاندەميا تۋرالى كەلىسىمنىڭ نەگىزگى پرينتسيپتەرىنىڭ ءبىرى بولىپ سانالادى. د د س ۇ ەڭ شالعاي جانە از قامتىلعان قاۋىمداستىقتاردىڭ دەنساۋلىعىن جاقسارتۋعا كومەكتەسەتىن يننوۆاتسيالاردى كەڭەيتۋ ءۇشىن جۇمىس ىستەيدى. ءبىزدىڭ ۇيىم 86 جىل بۇرىن دەنساۋلىق تەك ونى ساتىپ الا الاتىندارعا عانا ەمەس، ءار ادامنىڭ نەگىزگى قۇقىعى دەگەن سەنىمگە نەگىزدەلگەن»، - دەدى د د س ۇ باسشىسى.

فەستيۆالدىڭ اشىلۋىندا دجوردج ۆاشينگتون ۋنيۆەرسيتەتىنىڭ كلينيكالىق نەيروحيرۋرگيا پروفەسسورى جانە ابدۋلراۋف نەيروحيرۋرگيا ينستيتۋتىنىڭ باس نەيروحيرۋرگى ساليم ابدۋلراۋف ءوز باعىتىنداعى مامانداردىڭ ماقساتتارىن ايتتى.

«XXI عاسىر - اقىل-وي عاسىرى. ءبىز نەيروحيرۋرگتەر الدىمىزدا تۇرعان بارلىق سىن-قاتەردىڭ الدىڭعى قاتارىندامىز. ءبىز ءوز جۇمىسىمىزدا ورتاشا ەمەس، ەرەكشە بولعىمىز كەلەدى. ويتكەنى ءومىر مەن ءولىم ماسەلەلەرىنە تاپ بولعاندا ادامداردىڭ ءومىرىن ساقتاپ قالۋ ءۇشىن ءوز مۇمكىندىكتەرىمىزدى بارىنشا قولدانۋىمىز كەرەك»، - دەيدى ساليم ابدۋلراۋف.

ايتا كەتەيىك، استاناداعى Nobel fest ءساۋىردىڭ 28 ءى كۇنى وتەدى. ءىس-شارا باعدارلاماسى ميدىڭ بەيمالىم جۇمباقتارىنان باستاپ، جاڭا ءداۋىر دەرتتەرى مەن ۇزاق ءومىر سۇرۋدەگى اشىلۋلارعا دەيىن تاقىرىپتاردىڭ كەڭ اۋقىمىن قامتيدى.

فەستيۆال قاتىسۋشىلارى نوبەل سىيلىعىنىڭ لاۋرەاتتارىنان جەكە سەرتيفيكاتتار الادى.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى