الكوگوليزم مي قۇرىلىمىن وزگەرتەدى - زەرتتەۋ
استانا. قازاقپارات - الكوگولدىك تاۋەلدىلىكتەن ەمدەلىپ جۇرگەن ەر ادامداردىڭ ميىنداعى ويلاۋ مەن ەموتسياعا جاۋاپ بەرەتىن ايماقتاردا مي ءتىنىنىڭ كولەمى ازاياتىنى انىقتالدى. بۇل تۋرالى Psychiatry Research: Neuroimaging جۋرنالىندا جاريالانعان جاڭا زەرتتەۋ مالىمدەدى.
عالىمدار مي قۇرىلىمىنداعى وزگەرىستەر ەستە ساقتاۋ مەن كوڭىل-كۇيدىڭ بۇزىلۋىنا اسەر ەتەتىنىن، ال بۇل ءوز كەزەگىندە الكوگوليزمنىڭ اۋىرلىعىن كۇشەيتۋى مۇمكىن ەكەنىن انىقتادى.
الكوگولدىك تاۋەلدىلىك - بۇكىل الەم بويىنشا ميلليونداعان ادامدى الاڭداتاتىن ماڭىزدى دەنساۋلىق ماسەلەسى. بۇعان دەيىنگى زەرتتەۋلەر ىشىمدىككە تاۋەلدىلىك تەك مىنەز- قۇلىقتى وزگەرتىپ قانا قويماي، ميدىڭ ويلاۋ، ەستە ساقتاۋ جانە ەموتسيالاردى رەتتەۋ قىزمەتىنە دە اسەر ەتەتىنىن كورسەتتى.
جوبا جەتەكشىسى، سان-پاۋلۋ فەدەرالدى ۋنيۆەرسيتەتىنىڭ پروفەسسورى يزابەل كريستينا سەسپەدەس بۇل زەرتتەۋدى جۇرگىزۋگە الكوگوليزمنەن زارداپ شەككەن ادامدار مەن ولاردىڭ وتباسىلارىنىڭ قيىن جاعدايى سەبەپ بولعانىن ايتادى.
عالىمدار برازيلياداعى ەمدەۋ ورتالىعىندا الكوگولدىك تاۋەلدىلىككە بايلانىستى ەم الىپ جۇرگەن 50 ەر ادامدى جانە الكوگولگە تاۋەلدىلىگى جوق 50 ساۋ ەر ادامدى زەرتتەۋگە الدى. ءبىرىنشى توپتاعى قاتىسۋشىلار 10-15 كۇن بويى ىشىمدىك ىشپەگەن جانە ولاردىڭ الكوگولدىك تاۋەلدىلىگى رەسمي تۇردە راستالعان.
بارلىق قاتىسۋشىنىڭ ميى 3-تەسلا ماگنيتتىك- رەزونانستىق توموگرافياسى (م ر ت) ارقىلى زەرتتەلدى. ناتيجەسىندە، الكوگوليزممەن اۋىراتىن ناۋقاستاردىڭ سۇر زات كولەمى ازايعانى انىقتالدى. بۇل ايماقتار اقپاراتتى وڭدەۋگە، ەموتسيالاردى باقىلاۋعا جانە مىنەز-قۇلىقتى رەتتەۋگە جاۋاپ بەرەدى.
نەگىزگى قورىتىندىلار:
- الكوگوليزممەن اۋىراتىن ەر ادامداردىڭ مي قۇرىلىمىندا وزگەرىستەر بار.
- بۇل وزگەرىستەر ەستە ساقتاۋ قابىلەتىنىڭ ناشارلاۋىمەن جانە كوڭىل-كۇيدىڭ تۇراقسىزدىعىمەن بايلانىستى.
- شەشىم قابىلداۋ قابىلەتىنە قاتىستى ايتارلىقتاي ايىرماشىلىق بايقالمادى.
زەرتتەۋ تەك ەر ادامدار اراسىندا جۇرگىزىلگەن، سوندىقتان ونىڭ ناتيجەلەرى ايەلدەرگە قانشالىقتى قاتىستى ەكەنى بەلگىسىز. سونداي-اق كەيبىر قاتىسۋشىلاردىڭ باسقا دا ەسىرتكى قۇرالدارىن قولدانعانى ەسكەرىلگەن جوق.
عالىمدار بۇل ماسەلەنى تەرەڭىرەك زەرتتەۋ ءۇشىن گەنەتيكالىق فاكتورلاردى قاراستىراتىن جاڭا زەرتتەۋ دايىنداپ جاتىر. يزابەل كريستينا سەسپەدەستىڭ ايتۋىنشا، بولاشاقتا الكوگوليزمنىڭ گەنەتيكالىق، پسيحولوگيالىق جانە الەۋمەتتىك فاكتورلارىن بىرىكتىرىپ زەرتتەۋ جوسپارلانۋدا.
