Alem.ai حالىقارالىق جاساندى ينتەللەكت ورتالىعى بيىل اشىلادى
استانا. KAZINFORM - استاناداعى Qazaqstan Venture Group قورى وتاندىق جانە ورتالىق ازيا ەلدەرىنىڭ جاساندى ينتەللەكت باعىتىنداعى جوبالارىنا 1 ميلليارد دوللارعا دەيىن ينۆەستيتسيا سالادى.
پرەمەر- مينيستر ولجاس بەكتەنوۆتىڭ «ىلگەرىلەۋگە باستاعان التى جىل: قازاقستان ورنىقتى دامۋ جولىندا» ماقالاسىندا وسىنداي دەرەك ايتىلادى.
ۇكىمەت باسشىسى كەلتىرگەن دەرەكتەرگە سۇيەنسەك، قازاقستان IT قىزمەتتەر ەكسپورتىن ۇلعايتىپ قانا قويماي، ورتالىق ازيا ەلدەرى اراسىندا سەنىمدى تۇردە كوش باستاپ تۇر.
- بالاباقشالاردا «وتباسىنىڭ سيفرلىق كارتاسى»، «الەۋمەتتىك ءاميان» جانە سيفرلىق ۆاۋچەرلەر بەلسەندى قولدانىلادى، QazaqLaw (زاڭنامالىق بازا بويىنشا كومەكشى)، LLM ۇلتتىق تىلدىك مودەلى جاسالدى، «بيزنەستىڭ تسيفرلىق كارتاسى» جانە باسقا دا جوبالار ازىرلەنۋدە. سوڭعى بەس جىلدا يننوۆاتسيالىق ءونىم كولەمى ەكى ەسەدەن استام، 1,1 تريلليون تەڭگەدەن 2,4 تريلليون تەڭگەگە دەيىن ءوستى، - دەيدى ولجاس بەكتەنوۆ.
سونداي-اق، ول پرەزيدەنت تاپسىرماسىمەن جاساندى زەيىننىڭ دامۋىنا قولداۋ كورسەتۋ ءۇشىن «استانا» حالىقارالىق قارجى ورتالىعىنىڭ بازاسىندا Qazaqstan Venture Group قورلارىنىڭ ۆەنچۋرلىق قورى قۇرىلعانىن ەسكە سالادى. مۇنداعى قارجىلاندىرۋدىڭ ماقساتتى كولەمى - 1 ميلليارد دوللار.
- قور قازاقستان مەن ورتالىق ازيانىڭ يننوۆاتسيالىق جوبالارىنا باسىمدىق بەرە وتىرىپ ينۆەستيتسيا سالادى. بيىل ەلىمىزدىڭ جەدەل سيفرلىق ترانسفورماتسياسىنا ىقپال ەتەتىن Alem.ai حالىقارالىق جاساندى ينتەللەكت ورتالىعى اشىلادى، - دەپ جازادى پرەمەر-مينيستر.
ولجاس بەكتەنوۆ ۇكىمەتتىڭ الدىندا سيفرلاندىرۋ مەن جاساندى ينتەللەكت، كولىك، ەنەرگەتيكا، اگروونەركاسىپ سەكتورى جانە ادام كاپيتالىنىڭ دامۋ الەۋەتىن ۇتىمدى پايدالانۋ مىندەتى تۇرعانىن ايتادى.
- ۇكىمەت جۇكتەلگەن مىندەتتەردى ورىنداۋعا بار كۇش-جىگەرىن سالادى. كورىپ وتىرعانىمىزداي، سوڭعى 6 جىل ىشىندە اتقارىلعان جۇمىس از ەمەس، ءبىراق الدا بۇدان دا اۋقىمدى مىندەتتەر تۇر، - دەپ تۇيىندەگەن ول ماقالاسىن.
ەسكە سالساق، مەملەكەت باسشىسى قاسىم-جومارت توقايەۆ ۇلتتىق قۇرىلتايدىڭ ІV وتىرىسىندا كريپتوايىرباستاۋ، سيفرلىق ماينينگ سالالارىن ىرىقتاندىرۋدى تاپسىعان بولاتىن.
