الداعى كۇندەرى 28 گرادۋسقا دەيىن اياز بولادى - قازگيدرومەت
استانا. KAZINFORM - قازگيدرومەت الداعى 3 كۇنگە اۋا رايى بولجامىن جاريالادى.
سينوپتيكتەردىڭ بولجامىنشا، رەسپۋبليكانىڭ باسىم بولىگىنىڭ اۋا رايىن سولتۇستىك سيكلوننىڭ تەرەڭ جىراسى ايقىندايتىن بولادى. وسىعان بايلانىستى اۋا رايىنىڭ قۇبىلمالىعى كۇتىلەدى.
- ەلدىڭ باسىم بولىگىندە قار جاۋادى، ەلىمىزدىڭ شىعىسىندا قالىڭ قار جاۋىپ، بۇرقاسىن كۇتىلەدى، وڭتۇستىك وڭىرلەردە جاڭبىر سوڭى قارعا ۇلاسادى. تاۋلى اۋدانداردا قاتتى جاۋىن- شاشىن بولادى. شىعىس، وڭتۇستىك جانە ورتالىق ايماقتاردا كوكتايعاق بولادى دەپ بولجانۋدا. ەلدىڭ باتىسى مەن سولتۇستىك- باتىسىندا كەڭ اۋقىمدى سكانديناۆيالىق انتيتسيكلوننىڭ اسەرىنەن جاۋىن- شاشىنسىز اۋا رايى كۇتىلەدى»، - دەلىنگەن حابارلامادا.
اۋا تەمپەراتۋراسى تۇندە ەلدىڭ باتىسىندا 5-13 گرادۋسقا، ال سولتۇستىك- باتىستا 13-25 گرادۋسقا دەيىن تومەندەيدى. ەلىمىزدىڭ سولتۇستىگىندە 20-25 گرادۋس اياز بولجانادى. ال قازاقستاننىڭ ورتالىعىندا تەرمومەتر 15-28 گرادۋس اياز بولادى، شىعىستا 18-26 گرادۋس، وڭتۇستىك- شىعىس وڭىرلەردە 8-21 گرادۋسقا دەيىن اۋا تەمپەراتۋراسىنىڭ تومەندەۋى كۇتىلەدى.
