العاشقى كەزدەسۋدەن بەرى 20 جىل-سۋكەربەرگ ايەلىمەن قالاي تانىسقانىن ايتتى
امەريكالىق الپاۋىت Facebook باسشىسى مارك تسۋكەربەرگ Instagram پاراقشاسىندا جۇبايى پريستسيللا چانمەن تۇسكەن ارحيۆ سۋرەتىمەن ءبولىستى.
ول ءوز جازباسىندا ايەلىن العاشقى كەزدەسۋگە 20 جىل تولۋىمەن قۇتتىقتادى، دەپ حابارلايدى Kazinform .
وندا مارك سۋكەربەرگ ايەلىمەن العاشقى كەزدەسۋى تۋرالى ەستەلىكتەرىمەن بولىسكەن.
- ءبىزدىڭ العاشقى كەزدەسۋىمىزگە 20 جىل بولدى. ءبىز دوستارىمنىڭ مەنىڭ قۇرمەتىمە وتكىزگەن قوشتاسۋ كەشىندە كەزدەستىك. ول كەزدە مەنى انە- مىنە وقۋدان شىعارادى دەپ ويلاپ جۇرگەن ەدىك. مەن ونى كەزدەسۋگە شاقىرىپ، كوللەدجدە از عانا ۋاقىتىم قالعاندىقتان، تەز ارادا ءبىر جەرگە بارىپ ۇلگەرىپ قالۋىمىز كەرەكتىگىن ايتتىم. كەيىنىرەك Facebook ءتى قۇردىم، ءبىز ۇيلەندىك، قازىر ءبىزدىڭ كەرەمەت ءۇش قىزىمىز بار،-دەپ جازدى ول.
كاسىپكەردىڭ ايەلى دە ماركتىڭ جازباسىنا جاۋاپ جازىپ، جاس كۇندەرىندەگى فوتولارىن جۇكتەدى.
- العاشقى كەزدەسۋىمىزگە 20 جىل بولدى. ول مەنى ءالى كۇنگە دەيىن قۋانىشقا بولەيدى. قازىر ءبىزدىڭ سوڭىمىزدان 3 كىشكەنتاي حانىم ەرىپ كەلەدى! - دەپ جازدى پريستسيللا.
مارك سۋكەربەرگ پەن ونىڭ سۇيىكتىسى پريستسيللا چان توعىز جىلدىق رومانتيكادان كەيىن 2012 -جىلدىڭ 19-مامىرىندا ۇيلەندى. ەرلى- زايىپتىلاردىڭ ءۇش بالاسى بار.
