العاش رەت انا اتانعان تۇرىك قىزى قازاقستاندىق دارىگەرلەرگە العىسىن ءبىلدىردى
قازاقستانعا كوشىپ كەلگەن تۇركيالىق وتباسى ەكى جىلدان سوڭ العاش رەت ءسابيلى بولدى.
شىمكەنت قالالىق پەريناتالدىق ورتالىعىنىڭ دارىگەرلەرى شالا تۋعان نارەستەنىڭ ءومىرىن ساقتاپ قالدى.
تەلەجۇرگىزۋشى ءلايلا سۇلتان قىزى جاس بوسانعان انامەن سۇحبات قۇردى، دەپ حابارلايدى Kazinform.
وسىدان ەكى اي بۇرىن شىمكەنت قالالىق پەرينەتالدىق ورتالىعىندا تۋبا دەميراي ەسىمدى تۇرىك ەلىنىڭ ازاماتشاسى 28 اپتاسىندا وتا ارقىلى دۇنيەگە پەرزەنت اكەلگەن بولاتىن. وتانى بىلىكتى حيرۋرگ مۋسليم گاسانوۆ جاسادى.
«ۋاقىتىنان بۇرىن وتا جاساۋعا ىشتەگى ءسابيدىڭ جۇرەك قاعىسىنىڭ ناشارلاۋى سەبەپ بولدى»، - دەيدى دارىگەرلەر.
وسىلايشا، بىلىكتى مامانداردىڭ ارقاسىندا 985 گرام سالماقپەن كۋمسال ادا ەسىمدى ءسابي ومىرگە كەلدى. ون اپتا ەرتە جارىق دۇنيە ەسىگىن اشقان نارەستە ءبىر اپتاعا جۋىق جانساقتاۋ بولىمىندە بىلىكتى نەوناتولوگ اقزات شولپانقۇلوۆانىڭ باقىلاۋىندا بولدى. مەديتسينالىق كورسەتكىش بويىنشا العاشىندا ءسابيدىڭ ءومىر ءسۇرۋ مۇمكىندىگى 100/35 پايىزدى قۇراعان. شىمكەنتتىك دارىگەرلەردىڭ كاسىبي بىلىكتىلىگىنىڭ ارقاسىندا بۇگىندە انا مەن بالانىڭ جاعدايى جاقسارعان. كۋمسال ادا 1715 گرام سالماققا جەتتى.
«انا بولعىم كەلەدى» باعدارلاماسىنىڭ اۆتورى ءلايلا سۇلتان قىزى 24 جاستاعى تۋبا دەميرايمەن پەرزەنتحانادا تىلدەستى. تۋبا سۇحباتتا ءوزىنىڭ تۇڭعىشىنىڭ جۇكتىلىكتىڭ 26 اپتاسىندا تۇركيادا جۇرگەن كەزدە شەتىنەپ كەتكەنىن ايتىپ، كوزىنە ەرىكسىز جاس الدى. جولداسى بەدرە مۋسا ەكەۋى ەكى جىل بۇرىن ىستامبۇلدان شىمكەنت قالاسىنا قونىس اۋدارعانىن، بۇگىندە كاسىپپەن اينالىسىپ جاتقانىن تىلگە تيەك ەتتى. وتباسىلىق جۇپ ءبىرىنشى كەزەكتە شىمكەنت قالالىق پەريناتالدىق ورتالىعىنىڭ ۇجىمىنا العىسىن ءبىلدىردى.
ايتا كەتەيىك، سۇحباتتىڭ تولىق نۇسقاسىن قاراشا ايىندا «جىبەك جولى» ارناسىنداعى «انا بولعىم كەلەدى» باعدارلاماسىنان كورە الاسىزدار.
