الاياقتار قاتەلەسىپ الدانعان ايەلدىڭ اقشاسىن الماتى تۇرعىنىنا اۋدارتقان

وسى جىلدىڭ 19- قاراشاسىندا كوكشەتاۋدىڭ 63 جاستاعى تۇرعىنى پوليتسياعا الاياقتىق تۋرالى ارىزبەن جۇگىندى. ايەل ادام بىرنەشە ساعات بۇرىن تەلەفونىنا، سودان كەيىن WhatsApp مەسەندجەرى ارقىلى ءوزىن پوليتسيا قىزمەتكەرلەرى دەپ تانىستىرعان بەلگىسىز ادامداردان ەكى قوڭىراۋ تۇسكەنىن حابارلادى.

الاياقتار حابارلاعانداي، «ءوتىنىش بەرۋشىنىڭ ۇلى كولىگىمەن جاياۋ جۇرگىنشىنى قاعىپ كەتكەن». ولار زەينەتكەرگە ۇلىنىڭ قابىرعاسى سىنعانىن، سونىمەن قاتار جاياۋ جۇرگىنشى اۋىر جاعدايدا ەكەنىن، جابىرلەنۋشى تاراپ 300 مىڭ تەڭگە سۇراپ وتىرعانىن ايتىپ قورقىتقان.

قالا تۇرعىنى قوڭىراۋ شالۋشىلارعا مۇنداي سوما جوق ەكەنىن، الايدا ول 200 مىڭ تەڭگە اۋدارۋعا دايىن ەكەنىن ايتقان. قولدا بار سوماعا كەلىسە وتىرىپ، الاياقتار ايەلگە اقشا جىبەرۋ قاجەت بولاتىن ابونەنتتىك ءنومىردى كورسەتتى. ءبىراق كەيىنىرەك بەلگىلى بولعانداي، الاياقتار قاتەلەسىپ، ابونەنتتىك ءنومىردىڭ سوڭعى ەكى سانىن دۇرىس كورسەتپەگەن.

بارلىق نۇسقاۋدى مۇقيات تىڭداپ، ايەل تەرمينال ارقىلى اقشا اۋدارادى. سودان كەيىن عانا ۇلىنا ونىڭ جاعدايى تۋرالى بىلۋگە قوڭىراۋ شالعان. پوليتسياعا جۇگىنىپ، جەدەل- ىزدەستىرۋ ءىس- شارالارىن جۇرگىزگەننەن كەيىن قىزمەتكەرلەر اقشانىڭ الماتى قالاسىنىڭ 31 جاستاعى تۇرعىنىنا جىبەرىلگەنىن انىقتادى، بارلىق جاعدايدى تۇسىندىرگەننەن كەيىن ول اقشانى زاڭدى يەسىنە قايتارىپ بەردى.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى