الاكول اۋدانىنىڭ شارۋالارى الىپ قىزىلشا ءوسىردى
جەتىسۋلىق شارۋالار قانت قىزىلشاسىن وسىرۋگە بىلەك سىبانا كىرىسكەلى ءبىراز جىل بولدى. قازىر بارلىق اۋداندا ءتاتتى ءتۇبىر ەگىلەدى.
بيىل بۇل قاتارعا الاكولدىك ديقاندار دا قوسىلدى. بۇگىندە الاكول اۋدانىنداعى 20 شارۋا قوجالىعى 500 گەكتارعا ەككەن قانت قىزىلشاسىن جيناۋعا كىرىستى، دەپ حابارلايدى Kazinform.
جەتىسۋ وبلىسىنداعى قانت ءوندىرىسىن دامىتۋعا ۇلەس قوسىپ وتىرعان شارۋاشىلىقتىڭ قاتارىندا «سۇلەيمەنوۆ» شارۋا قوجالىعى دا بار. شارۋاشىلىق العاش رەت قىزىلشا سەۋىپ وتىرعانىنا قاراماستان، ەگىستىكتىڭ ونىمدىلىگى 500 سەنتنەرگە دەيىن جەتتى، ال جەكەلەگەن ءتاتتى ءتۇبىردىڭ سالماعى 6-8 كيلوگرامعا دەيىن بارىپ وتىر. بيىلدىققا ءوڭىر بويىنشا سالماعى جونىنەن ەڭ الىپ قانت قىزىلشاسى دا وسى قوجالىققا بۇيىرىپتى. جاقىندا قازىلعان ءتاتتى ءتۇبىردىڭ ەڭ ۇلكەنىنىڭ سالماعى 8 ك گ 623 گ جەتتى.
بۇعان دەيىن قىزىلشا ءوسىرۋدى ءتيىمسىز جانە قيىن جۇمىس دەپ ساناپ، تەك مايبۇرشاق وسىرۋمەن اينالىسقان ەكەن. دەگەنمەن بيىلدان باستاپ قانت قىزىلشاسىنا تولەم زاۋىتتان بەرىلەتىن سوما مەن مەملەكەتتىك سۋبسيديانى قوسا العاندا 40 مىڭ تەڭگەگە وسكەندىكتەن ءتاتتى ءتۇبىر ءوسىرۋدىڭ تابىستىلىعى ارتقان. سوعان وراي بيىل شارۋاشىلىق قىزىلشاعا دەن قويعان.
- بيىل كوكسۋ قانت زاۋىتى امەريكالىق ەليتالىق سورت تۇقىمىمەن قامتاماسىز ەتتى. 8 گەكتاردان 320 توننا ءونىم جينادىق. القاپتىڭ ءبىرىنشى بولىگىندە ءبىر ءتاتتى ءتۇبىردىڭ ورتاشا سالماعى 6 كيلوگرامعا جەتسە، ەڭ ءىرىسى 8 كيلوگرامنان اسىپ وتىر. ونىمدەرىمىزدى اقسۋ قانت زاۋىتىنا وڭدەۋگە تاپسىردىق. كەلەسى جىلى ءتاتتى ءتۇبىردىڭ ەگىس القابىن ۇلعايتۋدى جوسپارلاپ وتىرمىز. مۇنداي ونىمدىلىككە قول جەتكىزۋ ءۇشىن تۇقىمنىڭ سورتى دا، اگروتەحنيكالىق تالاپتاردى ساقتاۋ دا، باپتاپ ءوسىرۋ مەن سۋعارۋ دا - ءبارى ماڭىزدى، - دەيدى «سۇلەيمەنوۆ» شارۋا قوجالىعىنىڭ باسشىسى جاسۇلان سۇلەيمەنوۆ.
جالپى وبلىس بويىنشا وسى جىلى 370 مىڭ توننا ءونىم جيناۋ جوسپارلانعان، بۇل رەتتە 2 قانت زاۋىتى 71 مىڭ توننا قانت وندىرمەك. الاكول اۋدانى اكىمدىگىنىڭ مالىمەتىنشە، وسى كەزەڭدە 52 گەكتاردان 1 250 تونناعا جۋىق ءونىم جينالدى. قازىر ءۇشارال جانە كولباي اۋىلدىق وكرۋگتەرىندە قىزىلشا جيناۋ ناۋقانى جالعاسىپ جاتىر.
