اكيرە تاكەگۋچي: قازاقتىڭ 100 كۇيىن ءوز بەتىمشە ۇيرەندىم

- ارباتتا دومبىرادا شەبەر ويناعانىڭا تامسانعان كوپشىلىك سەنى ءاۋ باستا قازاق مۋزىكانتى ەكەن دەپ قالسا كەرەك. سوندىقتان الدىمەن ءوزىڭدى كەڭىنەن تانىستىرا وتىرساڭ.

- مەنىڭ ەسىمىم - اكيرا. جاپونيا استاناسى توكيونىڭ قاسىندا ورنالاسقان كاۆاساكي قالاسىندا دۇنيەگە كەلدىم. مۋزىكانتپىن. ءوز ەلىمدە كونسەرۆاتوريانى ءتامامدادىم. العاشىندا مەكتەپتە وقىپ جۇرگەندە گيتارا تارتۋدى ۇيرەندىم. سوسىن ورتالىق ازيا ەلدەرىنىڭ، اراب ەلدەرىنىڭ مۋزىكاسىنا قىزىعۋشىلىعىم اۋدى. جوعارى سىنىپتا وقىپ جۇرگەنىمدە تۇركيا ەلىنىڭ باي تاريحىنا قىزىعا باستادىم. ولاردىڭ مىقتى يمپەريا قۇرىپ، ەۋروپا تورىندە قۋاتتى اسكەري كۇشتىڭ يەسى بولعانى تاڭعالدىردى. جاپونيا دا مىقتى مەملەكەت. ەكى ەلدىڭ مىقتى يمپەريا قۇرۋ جاعىنان ۇقساستىق كوپ. سوندىقتان ول ەلدىڭ تاريحىن زەردەلەپ كورگىم كەلدى. مۋزىكانت بولعان سوڭ ول ەلدىڭ مۋزىكاسىمەن تانىسقىم كەلدى. اقىرىندا بۇل قىزىعۋشىلىعىم مەنى ىستامبۇلعا جەتەلەپ اكەلدى. وندا بەس جىل تۇراقتادىم.

- ۇلتتىق اسپابىمىز - دومبىرانى العاش رەت سول تۇركيا ەلىنە قونىس اۋدارعاندا كورىپسىز. ونداعى جەرگىلىكتى قازاقتار تانىستىردى ما، الدە وندا ءجيى كونسەرت قوياتىن قازاقستاندىق مۋزىكانتتاردىڭ ونەرىن تاماشالادىڭىز با؟

- جوق، ماعان دومبىرانى انكارادا العاش رەت كورسەتكەن تۇركياداعى ۇستازىم - اكدەنيز ەرباش. ول - قىرىم نوعايى. تۇركيادا تانىمال تۇلعا. بىرنەشە اسپاپتا وينايدى ءارى التاي اندەرىن كەرەمەت ورىندايدى. ءوزىنىڭ YouTube ارناسىندا تۇركى ەلدەرىنىڭ مۋزىكاسىن ناسيحاتتايدى. ءارى انكارا حادجي بايرام ۆەلي ۋنيۆەرسيتەتىندە تۇركى ەلدەرىنىڭ ديالەكتەرى جانە ادەبيەتى فاكۋلتەتىندە زەرتتەۋشى بولىپ جۇمىس ىستەيدى. ءبىر ەرەكشەلىگى، ول كىسى جاپون ءتىلىن جاقسى بىلەدى. سول كىسى بىردە ماعان دومبىرانىڭ «قۇدىرەتىن» كورسەتىپ، ول اسپاپ تۋرالى كەڭىنەن ايتىپ بەردى. مەن بىردەن قىزىعا كەتتىم. وعان قوسا، ەكى ىشەكتى ءارى ونى نوتا ارقىلى ۇيرەنۋگە بولاتىندىقتان ۇيرەنۋدى ماقسات ەتتىم.

- اعىلشىن ءتىلىن بىلەتىن دومبىراشىلاردان ونلاين ساباق الىپ، كەيىن قازاقستانعا كەلىپ، وسىندا بىرنەشە رەت كونسەرت بەرگەن اۋستراليالىق، امەريكالىق مۋزىكانتتاردىڭ بىرنەشەۋىنەن سۇحبات العان ەدىك. سەن دە سولار سەكىلدى ونلاين ساباق الدىڭ با؟

- جوق، مەنىڭ جەكە مۇعالىمىم بولمادى. ىستامبۇلدا دومبىرا دەسە، ىشەر اسىن جەرگە قوياتىن ۇلكەن قازاق كوميۋنيتي بار. ارا- تۇرا سولاردان ۇيرەندىم. كوبىنە YouTube-قا جۇكتەلگەن ۆيدەولاردان ۇيرەندىم. سوسىن dombyra.art سايتى جاقسى كومەكتەستى. دەسە دە، ول سايت قازىر جابىلىپ قالدى. الايدا مەن ول سايتتان بەس جۇزگە جۋىق نوتانى جۇكتەپ ۇلگەردىم. سودان سوڭ ونى ءوز بەتىمشە قايتالاپ، ۇيرەنىپ الدىم.

- جەكە دومبىراڭىز بار ما؟

- ءيا. 2017 -جىلى ebay جۇيەسى ارقىلى ساتىپ الىپ، قازاقستاننان جاپونياعا الدىرتتىم. باعاسى 100 دوللار بولدى- اۋ دەيمىن. جەكە اسپاپ ساتىپ الماسام، ۇيرەنۋىم قيىن ەكەنىن ءتۇسىندىم. ىستامبۇلعا قانشا اسپاپپەن كەلگەنىم تاسپالانعان سۋرەتىمدى سىزگە جىبەرەمىن. ەكى دومبىرا، ازەربايجان اسپابى، ەلەكتر گيتاراسى، داربۋكا، بەندير اتتى تۇرىكتەردىڭ ۇلتتىق اسپابى، ءارى ولاردىڭ چانگ اتتى كونە اسپابى، ماندولين جانە ەكى كلاسسيكالىق گيتارامەن كوشتىم. تۇركيادا تۇرعان بەس جىل ىشىندە تاعى دا بىرنەشە اسپاپ قوسىلدى. الايدا ونىڭ ءبارىن كەيىن ساتىپ جىبەردىم. تەك دومبىراعا عانا كوڭىل بولگىم كەلدى.

- قازىر قانشا كۇي ورىنداي الاسىز؟

- جۇزگە جۋىق كۇي تارتا الامىن. الايدا نوتاعا قاراپ وينايمىن. كوپ مۋزىكانت سەكىلدى ەسىمدە ساقتاي المايمىن.

- ەڭ سۇيىكتى كومپوزيتسياڭىز قايسىسى؟

- «اققۋ» كۇيى. قاتتى ۇنايدى. پاندەميا كەزىندە ونلاين فورماتتا وتكەن جارىستا وسى كۇيدى تارتىپ، جۇلدەگەر اتانعانمىن. تۇركيا استاناسى انكارادا قازاقستان ەلشىلىگى ۇيىمداستىرعان جارىستا دا وسى كۇيدى ورىنداپ، ابىرويمەن ونەر كورسەتتىم.

 - داۋلەسكەر كۇيشى سەكەن تۇرىسبەكوۆپەن قاتتى تانىسقىڭىز كەلگەن ەكەن. كەشە الەۋمەتتىك جەلىدەگى جەكە پاراقشاڭنان ونىمەن تانىسىپ قانا قويماي، بىرگە كۇي شەرتىپ، اقىرىندا ول كىسىنىڭ ساعان ءدان ريزا بولىپ تۇرعان ءساتىن بايقادىم.

- ءيا، كەشە ەستە كوپكە دەيىن قالاتىن كەرەمەت كەزدەسۋ بولدى. مەن سەكەن تۇرىسبەكوۆتى دومبىرا تارتۋعا قىزىققاننان بەرى بىلەمىن. ونىڭ قازاقستاندا وتە تانىمال تۇلعا ەكەنىنەن حاباردارمىن. ول كىسىمەن كەزدەسۋدى كوپتەن بەرى ارماندادىم. ينتەرنەتتەگى ۆيدەولار ارقىلى ۇيرەنىپ جۇرگەن كەزىمدە ول كىسىنىڭ كۇي تارتقانى تاسپالانعان كوپ ۆيدەونى قايتا-قايتا كورەتىنمىن. ونىڭ كۇي تارتۋ ءستيلى وزگەشە. سيپاتتاۋعا ءسوز جەتپەيدى. مەن قانشا ۇيرەنسەم دە، ولاي عاجاپ شەرتە المايتىن سەكىلدىمىن.

- الماتىعا كەلۋدەگى ماقساتىڭ قانداي؟

- الماتى سەكىلدى كورىكتى قالادا ۇزاق ۋاقىت تۇرعىم كەلەدى. مەن بۇعان دەيىن بۇل قالاعا ەكى رەت كەلگەنمىن. ەكى رەتىندە دە بۇل قالاعا تامسانىپ قايتتىم. سوندىقتان كوپ مادەنيەت توعىسقان بۇل قالادا ءوز مادەنيەتىممەن وزگەلەرمەن الماسقىم كەلەدى. وزگەلەردىڭ، سونىڭ ىشىندە، البەتتە قازاق مادەنيەتىن تەرەڭ زەرتتەسەم دەيمىن. سودان سوڭ جاپون ءتىلىن ۇيرەنەمىن دەۋشىلەرگە ۇيرەتكىم كەلەدى. البەتتە، قازاق ءتىلىن مەڭگەرۋ دە جوسپارىمدا بار. سەبەبى دومبىرادا ويناپ قانا قويماي، ول اسپاپتىڭ سۇيەمەلدەۋىمەن ايتىلاتىن اندەردىڭ ماعىناسىن تۇسىنسەم دەيمىن.

- اڭگىمەڭە راحمەت!

سۇحباتتاسقان -

ءاليا تىلەۋجان قىزى

turkystan.kz

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى