اكىم حالىقتى قىتايلىق ينۆەستورلاردان قورىقپاۋعا شاقىردى
باتىس قازاقستان وبلىسىنىڭ اكىمى ناريمان تورەعاليەۆ قازاقستاندىقتاردى قىتايلىق ينۆەستورلاردان قورىقپاۋعا شاقىردى.
ءوڭىر باسشىسى وبلىسقا ەت وڭدەيتىن كومبيناتتار سالاتىن ينۆەستورلار كەرەگىن جەتكىزدى. شەتەلدىكتەرگە جەر تەك جالعا، جۇمىس ىستەۋگە بەرىلەدى.
«جەر ماسەلەسى زاڭ بويىنشا شەشىلەدى. بىرىنشىدەن، بىزگە ينۆەستور تارتۋ كەرەك. ەكىنشىدەن، بۇگىندە الدىمىزدا پرەزيدەنت بەرگەن ۇلكەن تاپسىرمالار تۇر. مىسالى، شيكىزاتقا تاۋەلدى بولماۋ، ءونىمدى تەرەڭ وڭدەۋ. وسىعان بايلانىستى ءبىز ەتتى تەرەڭ وڭدەپ، ونى قىمباتقا ساتىپ، وبلىسىمىزدىڭ ەكونوميكاسىن كوتەرۋىمىز كەرەك.
وبلىس ەكونوميكاسىنىڭ كوتەرىلۋى وڭىردەگى بارلىق ماسەلەنى شەشۋگە سەپتىگىن تيگىزەدى. ناتيجەسىندە اقشا بولادى»، - دەدى وبلىس اكىمى و ق ك- دە وتكەن باسپا ءسوز ءماسليحاتىندا.
ناريمان تورەعاليەۆ شەتەلدىك ينۆەستورلارعا ناقتى قانداي تالاپ قويىلاتىنىن ءتۇسىندىردى.
«ينۆەستوردىڭ اقشاسى بار بولسا، وزىنە العان مىندەتتەردى جاقسى ورىندايتىن بولسا، ونىمەن كەلىسۋگە ءازىرمىز. بۇل - وبلىسىمىزدىڭ مۇددەسى. تاعى قايتالاپ ايتامىن، بىزدە سالىق بازاسىن كوبەيتۋ، ادامداردى جۇمىسقا ورنالاستىرۋ ەڭ ءبىرىنشى كەزەكتە تۇرعان ماسەلە. قازىر ءبىز نەگە اۋىلداردى ىزدەپ ءجۇرمىز؟ وسى ەت كومبيناتتارىن ينۆەستورلارعا اۋىلداردا سالىڭدار دەپ وتىرمىز. اۋىل ادامدارىن جۇمىسپەن قامتىساق، ولاردىڭ ماتەريالدىق جاعدايى تۇزەلەدى. سوندىقتان ينۆەستوردان قورقۋدىڭ قاجەتى جوق، ول تەك ەلگە پايدالى بولادى»، - دەدى ول.
وبلىس اكىمى حالىق قىتايدان كەلگەن ينۆەستورلاردان قورىقپاۋى كەرەك دەگەن پىكىردى ۇستانادى.
«بىرىنشىدەن، جەر ساتىلمايدى. تاعى قايتالاپ ايتامىن، جەر (شەتەلدىك ينۆەستورعا) ۋاقىتشا بەرىلەدى. ەكىنشىدەن، زاۋىت سالىنعان جاعدايدا، ول (ينۆەستور) زاۋىتتى ارقالاپ الىپ كەتپەيدى عوي. بۇل حالىققا پايدالى. ءبىز وسىنى جاقسىلاپ ءتۇسىنۋىمىز كەرەك. سوندىقتان قىتاي كەلدى ەكەن دەپ ودان قورقۋدىڭ قاجەتى جوق. ەگەر قىتايدان ينۆەستور كەلىپ، وسىنداي شارۋا ىستەيمىن دەپ جاتسا، ءبىز ونى قابىلدايمىز»، - دەدى ناريمان تورەعاليەۆ.
ءوڭىر باسشىسى ەلىمىزدىڭ مالدىڭ ونىمدەرى وڭدەلمەي، ىسىراپ بولىپ جاتقانىن مىسالعا كەلتىردى.
«قازىر ءبىز مالدى سويىپ جاتىرمىز. ءىرى قارا جانە جانە باسقا مالدار بولسىن. ءبىز ونىڭ تەرىسىن قايدا جىبەرىپ جاتىرمىز؟ وڭدەي المايمىز. سۇيەكتەرى قايدا جاتىر؟ ونى دا وڭدەي المايمىز، پايداعا اسىرا الماي وتىرمىز. كەشە ينۆەستورلارمەن سويلەستىم. ولارعا «مالدىڭ قانى مەن تەرىسىن، سيراعىنان باستاپ، مۇيىزىنە دەيىن جالپى سۇيەكتەرى قايدا كەتەدى؟ سىزدەر ولاردى وڭدەيسىزدەر مە؟» دەپ سۇراق قويدىم. ولار وسىنى وڭدەۋگە دايىن. ولاردا تەحنولوگيا بار. بىزدە ۇلكەن زاۋىتتار سالىنسا، وتە پايدالى بولادى. مالدىڭ قانىنا دەيىن وڭدەيمىز. قاننان مالدىڭ ازىعىن دايىنداۋعا بولادى. سۇيەكتى وڭدەپ، «سۇيىكتىڭ ۇنىن» الامىز. ول دا مالدىڭ ازىعىنا جارايدى. مىنە، وسىلاردى نەگە پايدالانباسقا؟ مالدىڭ تەرىسىن تاعى پايدالانادى.
ەگەر كيىك سويىلسا، ونىڭ مۇيىزىنەن ءدارى جاساۋعا بولادى. وسىنىڭ ءبارىنىڭ ۇلكەن پايداسى بار. قىتايدىڭ ينۆەستورلارىمەن ءبىز ءالى كەلىسىمگە كەلگەن جوقپىز. ولار كەلىپ كەتتى. وسىنداي بولسا، وسىنداي شارتتارىمىز بار دەپ تەك ويىن ايتتى. ءبىراق ولاردىڭ ناقتى ۇسىنىسى جوق»، - دەدى وبلىس اكىمى.
Massaget.kz
