اكتيۆتى ماجبۇرلەپ قايتارۋ مەن كەلىسىم ارقىلى قايتارۋدىڭ ايىرماشىلىعى نەدە
استانا. KAZINFORM - باس پروكۋراتۋرا جانىنداعى اكتيۆتەردى قايتارۋ كوميتەتىنىڭ ءتوراعاسى نۇرداۋلەت سۇيىندىكوۆ زاڭسىز يەمدەلگەن اكتيۆتەردى ءوز ەركىمەن قايتارۋ يەسىنە قانداي ارتىقشىلىق بەرەتىنىن ەسكە سالدى.
ونىڭ سوزىنشە بۇگىنگە دەيىن قايتارىلعان اكتيۆتىڭ باسىم بولىگى ەرىكتى تۇردە، ەكىجاقتى كەلىسىم نەگىزىندە مەملەكەت مەنشىگىنە وتكەن.
- ەرىكتى قايتارۋدىڭ ارتىقشىلىعى تەڭ قۇقىلى كەلىسىم پروتسەدۋرالار قولدانىلاتىنىندا. ياعني، ەكى تاراپتىڭ ارىپتەستىگى ناقتى شارتتارمەن بەلگىلەنەدى. مىسالى، ماجبۇرلەپ قايتارۋ تاسىلىندە زاڭسىز يەمدەلدى دەپ ەسەپتەلگەن مۇلىكتىڭ ءبارى تۇگەل مەملەكەتكە ءوتۋى كەرەك. ال ەرىكتى تۇردە قايتارعان كەزدە مۇلىكتىڭ ءبىر بولىگى يەسىندە قالۋى مۇمكىن. ونداي شەشىمدى كوميسسيا قابىلدايدى، - دەدى ول Kazinform اگەنتتىگىنە بەرگەن ەكسكليۋزيۆ سۇحباتىندا.
كوميتەت باسشىسى مۇلىكتى ەرىكتى قايتارۋدىڭ تاعى ءبىر جولى بار ەكەنىن ايتادى. ول جولدى تاڭداعاندار مەملەكەتتىڭ ۇسىنىسىن نەمەسە تالابىن كۇتپەي- اق، ءوز ەركىمەن الەۋمەتتىك ماڭىزى بار جوبالاردى ءوز قالتاسىنان ىسكە اسىرۋعا كىرىسىپ تە كەتكەن.
زاڭسىز اكتيۆتەردى قايتارۋ تۋرالى زاڭ كۇشىنە ەنگەننەن بەرى بۇل ىستە «نەگىزسىز بايۋ» نەگىزدەمەسى بويىنشا ىستەر قوزعالا باستاعان بولاتىن.
- وسىنداي ءىستىڭ ءبىرى سوتقا تۇسكەن بويدا جاۋاپكەر تاراپ بىردەن ءبىزدىڭ تالاپپەن كەلىسىپ، مۇلىكتى مەملەكەتكە قايتاردى. قالعان ەكى ىستە ماجبۇرلەپ قايتارۋ ءتاسىلى اياعىنا دەيىن قولدانىلدى. ونىڭ بىرەۋى بويىنشا سوت شەشىمىمەن 5 ميلليارد تەڭگە تولىق قايتارىلدى. ەكىنشى ءىستىڭ شەشىمىن اپەللياتسيالىق سوت قاراپ جاتىر، - دەدى باس پروكۋراتۋرا وكىلى.
