اجىراسۋ ىستەرىنىڭ نەشە پايىزى لۋدومانيادان بولادى - سۋديا پىكىرى
استانا. KAZINFORM - استانا قالاسىنىڭ كامەلەتكە تولماعاندار ىستەر جونىندەگى مامانداندىرىلعان اۋدانارالىق سوتىنىڭ ءتوراعاسى لەيلا زيناشەۆا اجىراسۋ ءىسى بويىنشا جاسالاتىن مەدياتسيالىق كەلىسىمدەردەن اليمەنتتەن باس تارتۋ تەتىگىن الىپ تاستاۋدى ۇسىندى.
«سوت ماجىلىسىندە اجىراسۋ تالابىن قويۋشىلاردىڭ كوبى انالار. ولاردىڭ ىشىندە اليمەنتتى رەسمي تولەتۋدەن باس تارتاتىندار بار. ايتاتىن ۋاجدەر - بالاسى بولعاندىقتان دا بىلاي دا كومەكتەسەدى. بىزدە مەدياتسيا قىزمەتى دامىعاننان بەرى مەدياتسيالىق كەلىسىمنىڭ كۇشىن جويۋ تۋرالى داۋلار پايدا بولا باستادى. ويتكەنى مەدياتسيالىق كەلىسىمدەردىڭ كەيبىرىندە اناسى اليمەنتتەن باس تارتاتىنى كورسەتىلەدى. مەنىڭ ويىمشا، مۇنداي كەلىسىمگە جول بەرۋگە بولمايدى. ويتكەنى وسىنداي كەلىسىمگە كەلۋ ارقىلى اكە مەن انا بالانىڭ قۇقىعىن، زاڭدى مۇددەلەرىن تاپتايدى. بالا كامەلەتكە تولماعاندىقتان ونداي كەلىسىم جاساي المايدى. جالپى اتا-انانىڭ ەكەۋى دە قاي جاقتا جۇرسە دە بالاسىن اسىراۋعا جاۋاپتى. مەن وسىندا كەلىسىمدەرگە جول بەرمەۋ ءۇشىن مەدياتورلاردىڭ ادەپ ەرەجەسىن بەكىتۋ كەرەك دەپ ويلايمىن. سول ەرەجەگە وسى اليمەنت ماسەلەسىن ناقتىلايتىن نورمالار ەنگىزۋدى ۇسىنامىن»، - دەيدى سۋديا.
سونداي-اق، ول لۋدومانيانىڭ(قۇمار ويىنعا تاۋەلدىلىك - رەد.) اجىراسۋ ستاتيستيكاسىنا قالاي اسەر ەتىپ جاتقانىن ايتتى.
«اجىراسۋ تالابىمەن كەلگەن 100 ءىستىڭ ىشىندە ءبىر-ەكەۋى ءىستىڭ سەبەبى لۋدومانيا بولىپ جاتادى. ءبىراق بۇل ناقتى ستاتيستيكا دەۋگە بولمايدى. ويتكەنى سوتقا جۇگىنۋشىلەردىڭ ءبارى اجىراسۋدىڭ سەبەبىن اشىپ ايتا بەرمەيدى. سوت ونى قازبالاپ سۇراي المايدى. زاڭدا سونداي نورما بار. ەكى تاراپ اجىراسۋدىڭ سەبەبىن سوتقا ايتپايمىز دەپ شەشسە، سۋديا قازبالاپ سۇراي المايدى. ال ءبىر تاراپ اجىراسۋعا كەلىسپەيتىن بولسا، سونداي جاعدايدا عانا سەبەبىن قازبالاپ سۇرايمىز»، - دەدى لەيلا زيناشەۆا.
اۆتور
ەسىمجان ناقتىباي
