اجىراسۋ كەزىندە يپوتەكاعا الىنعان پاتەر بولىسكە سالىنا ما؟
استانا. KAZINFORM - اجىراسۋ كەزىندە ەرلى-زايىپتىنىڭ ورتاق مۇلىگىنىڭ ءبارى بولىسكە سالىنادى. ال سول مۇلىكتى يپوتەكاعا العان ەرلى-زايىپتىلار نە ىستەيدى؟ مۇنداي جاعدايدا جىلجىمايتىن مۇلىك بولىسكە سالىنا ما؟
بۇل سۇراقتاردىڭ جاۋابىن Massaget.kz ءتىلشىسى ادۆوكات البينا باحتيار قىزىنان سۇرادى.
ادۆوكاتتىڭ ايتۋىنشا، نەكەنى بۇزۋ كەزىندە مۇلىكتەر عانا بولىسكە تۇسپەي، ورتاق قارىزدار مەن مىندەتتەمەلەر دە ءبولىنۋى مۇمكىن. ەگەر پاتەر نەكەدە تۇرعاندا ساتىپ الىنسا، ول ورتاق مۇلىك سانالادى جانە ەكىگە بولىنەدى.
البينا باحتيار قىزى سونداي-اق مۇلىكتى ءبولۋ جانە بانك الدىنداعى يپوتەكالىق مىندەتتەمە - ەكى ءتۇرلى ۇعىم ەكەنىن العا تارتتى. يپوتەكاسى بار ەرلى-زايىپتىنىڭ اجىراسۋى ادەتتەگى اجىراسۋدان ەرەكشەلەنەدى، ويتكەنى ءبرىنشى جاعدايدا ءۇشىنشى تاراپ - بانك بار.
«كەز كەلگەن مۇلىك قولما-قول الىنسا دا، يپوتەكاعا الىنسا دا، ەرلى-زايىپتىنىڭ ورتاق مۇلكى سانالادى. تاعى ءبىر نازار اۋداراتىن جايت - مىندەتتەمە. بىرىنشىدەن، ەگەر نەكە شارتى بولماسا جانە يپوتەكانى جۇبايى راسىمدەسە، وندا، تيىسىنشە، مىندەتتەمە كۇيەۋىنە جۇكتەلەدى. ياعني بانك مىندەتتەمەنى تەك جۇبايىنان وتەۋدى تالاپ ەتەدى. نەمەسە كەرىسىنشە»، - دەيدى البينا باحتيار قىزى.
قارىز تولىق تولەنبەيىنشە، پاتەر يەسى نەسيە بەرگەن بانك بولىپ قالا بەرەدى. دەگەنمەن ەرلى-زايىپتىلار زاڭدى تۇردە تۇرعىن ءۇيدى تەڭ بولۋگە قۇقىلى، ويتكەنى ولار ونى نەكە كەزىندە العان. ءبىراق قارىزدى، ادەتتە، ەرلى-زايىپتىنىڭ بىرەۋى عانا تولەيدى.
«ەرلى-زايىپتىلار ولاردىڭ بىرەۋى ورتاق قارىز الۋشى بولعان جاعدايدا عانا ورتاق جاۋاپكەرشىلىككە تارتىلادى. ەگەر نەكە شارتى بولسا جانە بانكتىك قارىزدى وتەۋ شارتتارى بولسا، وندا كەلىسىمشارتقا سۇيەنىپ، يپوتەكانى ەرلى-زايىپتىلاردىڭ ەكەۋى دە تولەيدى»، - دەپ ءتۇسىندىردى ادۆوكات.
يپوتەكاعا الىنعان مۇلىكتى ءبولۋ قالاي جۇزەگە اسىرىلادى؟
ەكى تاراپ تەڭدەي بولىسەدى. ەگەر يپوتەكانى بىرگە تولەگەن بولسا، پاتەر ەكىگە بولىنەدى، ال بىرەۋىنىڭ ونى الۋعا قۇقىعى بولماسا، ەكىنشى تاراپ وتەماقى تولەيدى؛
مۇلىك يپوتەكاعا تولەپ وتىرعان تاراپقا قالادى. ەگەر ءبىر جۇبايى يپوتەكانى ءوزى تولەگەنىن دالەلدەسە (مىسالى، جالاقىسىنان عانا تولەم جاسالسا)، سوت پاتەردى سوعان قالدىرىپ، ەكىنشى تاراپقا وتەماقى بەرۋى دە/بەرمەۋى دە مۇمكىن.
يپوتەكالىق شارتتا كىمنىڭ اتى جازىلعانىنا بايلانىستى. ەگەر تەك ءبىر جۇبايىنىڭ اتىندا بولسا، سوت نەسيە تولەمىن ەسكەرىپ، سوعان قالدىرۋى مۇمكىن.
