اۋدان اكىمدەرىن سايلاۋعا ب ق و دومبىراشىلارى بەلسەندى قاتىستى

تۇرعىنداردىڭ كەيبىرى ەلدەگى ەلەۋلى ءساتتى ەرەكشە ءىس-شارالارمەن ايشىقتاپ، كوپشىلىككە كوتەرىڭكى كوڭىل- كۇي سىيلادى. مىسالى، قاراتوبە اۋدانىنداعى №278-سايلاۋ ۋچاسكەسىندە «اسىل اجەلەر» انسامبلى ۇلتتىق ناقىشتا كيىنىپ، ءداستۇرلى اندەر شىرقادى.

«اۋدان اكىمىن سايلاۋ مۇمكىندىگى حالىقتىڭ تاڭداۋىنا بەرىلىپ وتىر. بۇل، ارينە، دۇرىس. ەندى جەرگىلىكتى تۇرعىندار بىرلەسە شەشىم قابىلداي الامىز. ءبىزدىڭ انسامبل قۇرامىنداعى اجەلەردىڭ ءبارى داۋىس بەردى. ءبىز ساياسي ناۋقانعا بەي-جاي قارامايمىز. سوندىقتان جەرلەستەرىمىزدى سايلاۋعا ءبىر كىسىدەي اتسالىسۋعا شاقىرامىن»، - دەيدى انسامبل جەتەكشىسى گۇلسارا عابدي قىزى.

ال تاسقالا اۋدانىنىڭ ورتالىعىندا دومبىراشىلار دا سايلاۋدى مەرەكەگە اينالدىردى. ولار كيەلى اسپاپپەن ءتول مۋزىكالاردى ورىنداپ، ساياسي ناۋقاننىڭ ءسانىن كەلتىردى. مانشۇك ساميەۆا بالالار مۋزىكا مەكتەبىندە ساباق بەرەدى. ول ءوز ۇجىمىمەن بىرگە وسى باستاماعا ۇيىتقى بولعان.

«ءبىزدىڭ شىعارماشىلىق ۇجىمدا 8 ادام جۇمىس ىستەيدى. ءبارىمىز ءبىر اۋىزدان سايلاۋ كۇنى ونەر كورسەتۋدى ۇيعاردىق. ۇلتتىق ونەر اركەز ۇلىقتالۋى ءتيىس. وسىنداي كوڭىل-كۇيمەن تاسقالالىقتار سايلاۋعا بەلسەنە قاتىسىپ جاتىر»، - دەيدى ول.

ءۇش اۋداندا بارلىعى 63 سايلاۋ ۋچاسكەسى جۇمىس ىستەپ تۇر. ولاردا 28884 سايلاۋشى تىركەلگەن.

«جەرگىلىكتى ۋاقىتپەن 13.00 دەگى اقپارات بويىنشا، 10 مىڭنان استام ادام داۋىس بەرىپ ۇلگەردى. سايلاۋ ۋچاسكەلەرىندە قوعامدىق ءتارتىپ بۇزۋ دەرەكتەرى مەن زاڭعا قايشى ارەكەتتەر تىركەلگەن جوق»، - دەدى اۋماقتىق سايلاۋ كوميسسياسىنىڭ ءتوراعاسى عايسا قاپاقوۆ.

ەلىمىزدە پرەزيدەنت تاپسىرماسىنا بايلانىستى سايلاۋ جۇيەسىنە كوپتەگەن جاڭاشىلدىق ەنگىزىلدى. ءار ساياسي جاڭعىرۋ مەملەكەتتى باسقارۋ ىسىندە حالىقتىڭ ءرولى مەن ماڭىزىن ارتتىرۋدى كوزدەيدى. سوڭعى ەكى جىلدا ءبىرقاتار وزگەرىس جاسالدى. اتاپ ايتقاندا، پارتيالاردىڭ ماجىلىسكە ءوتۋ شەگى 5 پايىزعا دەيىن تومەندەدى. سايلاۋ بيۋللەتەندەرىنە «بارىنە قارسىمىن» باعانى قوسىلدى. ەندى، مىنە، العاش رەت اۋدان اكىمدەرىن سايلاۋ ناۋقانى ءوتىپ جاتىر. بۇل - دەموكراتياعا دەگەن ۇلكەن قادام.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى