ادامنىڭ ءبىر قىزىعى بالا دەگەن
استانا. KAZINFORM – جىبەك جولى تەلەارناسىنان كورسەتىلەتىن «انا بولعىم كەلەدى» جوباسىنىڭ پاتسيەنتتەرى: جاڭاوزەندىك - اقبايان 45 جاسىندا، الماتى وبلىسىنىڭ تۇرعىنى - ايجان 42 جاسىندا انا اتاندى.
بەدەۋلىك پەن بەلسىزدىك ماسەلەسى سوڭعى جىلدارى قوعامدا ءجيى كەزدەسىن، جانۇيانىڭ تۇتاستىعىنا اسەر ەتەتىن نەگىزگى فاكتورعا اينالىپ ۇلگەردى. بۇل ماسەلەنى «تابۋ» تاقىرىپقا جاتقىزىپ، جاسىرىپ، شەشۋ جولىن قاراستىرماۋ - وسى دياگنوزعا ۇشىراعان جانداردىڭ بالالى بولۋ مۇمكىندىگىن ازايتا بەرەدى. دەنساۋلىق جاعدايىنا بايلانىستى تابيعي جولمەن بالالى بولا الماي جۇرگەن وتباسىلاردىڭ سوڭعى ءۇمىتى - ەكستراكورپورالدى ۇرىقتاندىرۋ (ە ك و).
ە ك ۇ كومەگىنە بىرنەشە مارتە جۇگىنگەن، ىزدەنگەن، ەڭبەك ەتىپ، ەڭ باستىسى ءۇمىتىن ۇزبەگەن جۇپتاردىڭ ءبىرى - اقبايان تىلەۋقۇلوۆا مەن ساعىنباي قيباسوۆ. وتاۋ قۇرعاندارىنا 28 جىل. وسى جىلدار ارالىعىندا بىرنەشە مارتە ە ك ۇ جاساعان. ءبىراق ءبارى ءساتسىز بولعان. وتكەن جىلى «ەكومەد» ورتالىعىنىڭ رەپرودۋكتولوگ ماماندارى جاڭاوزەندىك ەرلى-زايىپتىنىڭ وتىنىمىمەن تانىسىپ، «انا بولعىم كەلەدى» جوباسىنىڭ پاتسيەنتتەرى قاتارىنا قابىلداعان بولاتىن.
جوبا اياسىندا ەكىنشى رەت جاسالعان ەمبريون تاسىمالى ءساتتى بولىپ، اقبايان 28-ءساۋىر كۇنى دۇنيەگە ۇل بالانى الىپ كەلدى. ەسىمىن ءوز اجەسى ىرىمداپ - تۇرسىنبەك قويدى. سالماعى - 2950 گرام، بويى - 51 س م. بولىپ تۋعان تۇرسىنبەك پەن اناسىنىڭ جاعدايى جاقسى. ءساۋىردىڭ ءبىرىنشى كۇنى پەرزەنتحانادان شىقتى.
جوبانىڭ پاتسيەنتتەرى ايجان قاسىمبەكوۆا مەن قانات وتاربايەۆتىڭ شاڭىراعىندا دا كوپتەن كۇتكەن قۋانىش. ون سەگىز جىل وتاسقان جۇپ ايالا ەسىمدى كىشكەنتاي حانشايىمنىڭ اتا-اناسى اتاندى. ايجان مەن قانات ءسابيلى بولۋ ءۇشىن التى رەت ە ك ۇ جاساتقان. ءساتسىز بولعان. دارىگەرلەر بۇل وتباسىلىق جۇپتىڭ دا وقيعاسىمەن تانىسىپ، جوبا پاتسيەنتتەرىنىڭ قاتارىنا قابىلدادى. العاشقى ەمبريون تاسىمالى ءساتتى بولىپ، 20-ناۋرىز كۇنى ايجان سالماعى - 3 كەلى، بويى - 55 س م. دەنى ساۋ قىز بالانى دۇنيەگە الىپ كەلدى. انا مەن بالانىڭ دەنساۋلىعى جاقسى، 25-ناۋرىز كۇنى پەرزەنتحانادان شىقتى.
ەكى ماۋسىمعا جالعاسقان جوبا اياسىندا بۇگىنگە دەيىن 8 ءسابي دۇنيەگە كەلدى، 9 كەلىنشەكتىڭ اياعى اۋىر، 10 پاتسيەنت ەمبريون تاسىمالىنا دايىندالۋدا.
پاتسيەنتتەردىڭ ەكۇ شىعىنىنا كەتەتىن قارجىنى تولىقتاي جوبانىڭ يدەيا اۆتورى، جۇرگىزۋشىسى - ءلايلا سۇلتان قىزى قۇرعان «Mariyam» قايىرىمدىلىق قورى قارجىلاندىرادى.
ەگەر ءسىز نەمەسە جاقىنىڭىز بالالى بولۋدى ارمانداپ جۇرسە http://www.mariyamfund.kz/ سايتىنا كىرىپ، ءوتىنىم قالدىرىڭىز. ءبىر جانۇيانىڭ باقىتىنىڭ ەسەلەنۋىنە اتسالىسام دەسەڭىز، قايىرىمدىلىق جاساي الاسىز.
