اڭداماي سويلەيتىن ا ق ش پرەزيدەنتى

«Washіngton Tіmes» باسىلىمىنىڭ حابارلاۋىنشا، دجون كەرري «كەز كەلگەن ادامنىڭ اقىماق بولۋعا تولىق قۇقىعى بار!» دەپ ەسەپتەيدى ەكەن. ءوز كەزەگىندە مەملەكەتتىك حاتشى: «مۇنىڭ باستى سەبەبى - ەركىندىك» دەپ اقتالا وتىرىپ: «ءبىزدىڭ ەلىمىزدىڭ دەموكراتيالىق ۇستانىمى ازاماتتارعا اقىماقتىق جاساۋعا تولىق قۇقىق بەرەدى» دەپ مالىمدەپتى. شىنى كەرەك، بۇل ا ق ش ساياساتكەرلەرىنىڭ اۋزىنان شىققان ءبىرىنشى وعاش پىكىر ەمەس. اتاۋلاردى دۇرىس اتاماق تۇگىلى، سويلەمدەردى بۇرىس قۇراستىراتىن ساياساتكەرلەر امەريكا تاريحىندا بولعان.

وسىنداي قاتەلىكتەرگە ءجيى ۇرىنعان ا ق ش-تىڭ 43- پرەزيدەنتى كىشى دجوردج بۋشتىڭ مالىمدەمەلەرى، ءتىپتى «بۋشيزم» تەرمينىنىڭ قالىپتاسۋىنا تۇرتكى بولدى. بۋشيزم دەگەنىمىز - كىشى بۋشتىڭ اڭداماي سويلەگەن كۇلكىلى مالىمدەمەلەرىنەن ءۇزىندى. بىرەر جىل بۇرىن «ايقىن» باسىلىمى ەلگە كەڭىنەن تارالعان بۋشيزمدەر جايلى جازعان ەدى. قازىر قاراپ وتىرساق، دجون كەرريدىڭ مالىمدەمەسىنەن كەيىن بۋشيزمدەردىڭ ورنىن «كەرريزمدەر» باسىپ كەتە مە دەپ ەرىكسىز ويلايسىڭ.

قالاي دەسەك تە، الەمدە كىشى بۋش سياقتى ەڭ قىزىق، ءتىپتى ويعا قونىمسىز مالىمدەمەلەر جاساۋ شەبەرلىگى ەشكىمگە دە «دارىمايتىن» سياقتى. ۇلى بريتانياعا ساپارى بارىسىندا ەكىنشى ەليزاۆەتانى امەريكالىق ساياساتكەر 11-ەليزاۆەتا دەپ اتاعان. سونداعىسى - ونىڭ ІІ دەپ بەلگىلەنگەن ريم ساندارىن 11 دەپ وقىعانى بوپ تۇر.

ەسىمىزدە، ە ق ى ۇ ماسەلەلەرى بويىنشا اۆسترياعا ءبىر توپ جۋرناليستەرمەن بارعان كەزىمىزدە، نەمىستەردىڭ بۋشيزم ارقىلى اقشا تاۋىپ وتىرعانىن كورىپ، تاڭعالعان ەدىك. سويتسە، جەرگىلىكتى سۋۆەنير جاساۋشى ازاماتتار ءارتۇرلى مايدا-شۇيدە بۇيىمداردىڭ سىرتىنا «بۋش، بىزدە كەنگۋرۋ جوق! ءبىز اۆستراليا ەمەسپىز، اۆستريامىز!» دەپ جازىپ، قىزىق زاتتاردى قىمبات باعاعا ساتىپ وتىرعان ەدى. شىنى كەرەك، ساۋدا دا جاقسى ءجۇرىپ جاتتى.

سونداعىسى - اۆسترياعا ساپار بارىسىندا كىشى بۋش بۇل ەلدى «اۆستراليا» دەپ شاتاسىپتى. رەنجىگەن نەمىستەر كۇلكىلى سۋۆەنيرلەر جاساۋ ارقىلى ەسە قايتارماق كورىنەدى. امەريكا- دا دا ساۋداگەرلەر بۋشتىڭ ەڭ كۇلكىلى مالىمدەمەلەرىن ءارتۇرلى بۇيىمدار- عا جاپسىرىپ، اقشا جاساۋعا ابدەن ماشىقتانىپ قالعان. تۋريستەر قىزىعاتىن نارسەلەر بۇل.

2006- جىلى ۇلكەن سەگىزدىك سامميتىندە بۋش سول كەزدەگى انگليا پرەمەر-ءمينيسترى توني بلەردى كورىپ، رەپپەر ءانشى سياقتى: «يوۋ! بلەر!» - دەپ، امانداسىپتى. ءبىر سوزىندە ول: «مەن تەرەزا نەلسونمەن تانىسپىن، ول ءارى اتا-انا، ءارى انا جانە قاراپايىم اكە» دەپ، اڭداماي سويلەگەن. امەريكالىقتاردىڭ گەوگرافياعا جوقتىعى بارشاعا ءمالىم. الىس شەتەل تۇگىلى، ءوز ىشىندەگى شتاتتاردى بىلمەستىك پەن جالپى ساۋاتسىزدىق دەڭگەيى جوعارى مىنبەرلەردەن تالاي ايتىلدى. بۇل ورايدا بۋشتىڭ گەوگرافيادان الىستىعى - جەر مەن كۇننىڭ ارا-قاتىناسى سياقتى الشاق.

بىردە ول: «ۋەلس؟ ال بۇل قاي ەلدە ورنالاسقان؟» دەپ، سۇراققا سۇراقپەن جاۋاپ بەرگەن. 2000- جىلى ۆاشينگتوندا كىشى بۋش افريكا قۇرلىعىن «ۇلت» دەپ اتاپ، جاڭا اتاۋ ويلاپ تاپقانداي بولعان. ءوز سوزىندە ول: «ءبىز افريكامەن ءادىل سويلەسەمىز دەپ كوپ ۋاقىت وتكىزىپ الدىق. ءبىراق افريكا - بەلگىسىز اۋرۋعا شالدىققان ۇلت» دەپتى. سول جىلدارى داۆوستا وتكەن كەزدەسۋدە: «ميستەر پۋتين دەگەن كىم؟» دەپ، اڭتارىلادى. بۇدان كەيىن «ABC News» تەلەارناسىنا سۇقبات بەرە وتىرىپ: «مەن ونى ونشا تانىمايدى ەكەنمىن، ءتىپتى ونىڭ كىم ەكەنى ەسىمدە جوق!» دەپ، ءسوزىن قايىرادى. 2005- جىلى برازيليا پرەزيدەنتى لۋلا دا سيلۆا كىشى بۋشقا ءوز ەلىنىڭ كارتاسىن كورسەتكەندە، امەريكالىق باسشى تاڭعالىپ: «ءماسساعان! برازيليا سونداي ۇلكەن ەكەن عوي!» دەپتى.

بۋشتىڭ كەڭىنەن تارالعان مالىمدەمەلەرىنىڭ وندىعىنا ((«Wіkіpedіa»، ت.ب. اعىلشىن سايتتارىنان) مىنا سوزدەرىن كىرگىزۋگە بولار:

مەن ايتقانىمدا... مەن ءوزىم جايلى ايتقانىمدا جانە ول مەن جايلى ايتقانىندا، ءبىزدىڭ ءبارىمىز مەن تۋرالى ايتىپ جاتامىز

(When І'm talkіng about... When І'm talkіng about myself, and when he's talkіng about myself, all of us are talkіng about me). («Hardball», 2000ж.)

2. «مەن جاس جانە جاۋاپسىز بولعانىمدا، مەن جاس جانە جاۋاپسىز بولدىم».

(When І was young and іrrespon­sіble, І was young and іrresponsіble)

3. «مەن بالىقتار مەن ادامداردىڭ ءبىر-بىرىمەن بەيبىت ءومىر سۇرە الاتىنىن بىلەمىن».

(І know the human beіng and fіsh can coexіst peacefully)

4. «سىزدەر ەستىدىڭىزدەر مە، ەل گور ينتەرنەتتى ويلاپ تاپقانىن ايتىپ ءجۇر. ءبىراق ول سونداي اقىلدى بولسا، نەگە بارلىق مەكەنجايلار «W» ارپىنە باستالادى؟»

5. «مەنىڭ ويىمشا، امەريكالىقتار... جوق، مەنىڭ ويىمشا ەمەس... مەن ۇمىتتەنەمىن... ءيا، مەن امەريكالىقتار ماعان سەنەدى دەپ ۇمىتتەنەمىن».

І thіnk the Amerіcan people - І hope the Amerіcan - І don't thіnk, let me - І hope the Amerіcan people trust me

6. «مەن نەگە سەنەتىنىمدى بىلەمىن. مەن نەگە سەنەتىنىمدى ارى قاراي قورعاي بەرەمىن. جانە نەگە سەنەتىنىمە مەن سەنەمىن جانە سول سەنەتىنىمنىڭ دۇرىستىعىنا سەنەمىن».

І know what І be-lіe­ve. І wіll contіnue to artіculate what І belіeve and what І belіeve - І belіeve what І belіeve іs rіght

7. «مەن گازەت ماقالالارىن از وقيمىن، ءبىراق بالكىم، گازەتتى از وقيتىن ادامدار مەنىڭ باياندامالارىمدى دايىندايتىن سياقتى».

І rarely read the storіes, and get brіefed by people who are probably read the news themselves

8. «ن ا س ا ءۇشىن عارىش ءالى دە جوعارى باسىمدىققا يە».

For NASA, space іs stіll a hіgh prіorіty

9. دجوردج ۆاشينگتون - ءبىزدىڭ تۇڭعىش پرەزيدەنتىمىز، ارينە. ول تۋرالى ەڭ قىزىعى، وتكەن جىلى مەن ول تۋرالى 3 نەمەسە 4 كىتاپ وقىپ شىقتىم. بۇل قىزىق ەمەس پە؟

That's George Washіngton, the fіrst presіdent, of course. The іnterestіng thіng about hіm іs that І read three - three or four books about hіm last year. Іsn't that іnterestіng

قايبىر جىلى امەريكادا بۋشيزمدەرگە ارنالعان 7-8 كىتاپ شىققان ەدى. كىشى دجوردج بۋش ساياسات ساحناسىنان كەتسە دە، پايدانىڭ كوزىن تاپقاندار ءالى كۇنگە دەيىن بۋشيزمدەردى ەلگە تاراتۋ ارقىلى ءناپاقا تاۋىپ وتىر. ادەتتە ا ق ش-تىڭ 43-پرەزيدەنتى مايىن توگىزىپ، ماقالداپ سويلەگىسى كەلگەنىندە، مۇلدە ۇيقاسپايتىن سوزدەر مەن ماعىناسىز ويلار اۋىزدان شىعىپ جاتاتىن.

وتباسى قۇندىلىعىنا توقتالعان ءبىر سوزىندە ول: «وتباسى - ۇلت ءۇمىت تاباتىن، ال قاناتتار ارمان الاتىن جەر» دەپ، مالىمدەپتى. قارجى-قاراجات تۋرالى ءسوز قوزعالعاندا: «بۇل - ءسىزدىڭ اقشاڭىز، سىزدەر ول ءۇشىن تولەدىڭىزدەر!» دەگەن.

ءتىپتى بىردە ول: «مىناۋ ادام كلايمەر عوي، «New York Tіmes»-تىڭ باستى ەسەگى» دەپ، وزىنە سىن ايتۋشىلاردىڭ ءبىرىن مازاق ەتىپتى. نيۋ-مەكسيكادا بولعانىندا: «ەستە ساقتاڭىزدار، اڭشىلار ەمەس، قۇستار زارداپ شەگۋى كەرەك!» دەپ، ۇران تاستاعان.

ءتۇيىن.

دجون كەرري دۇرىس ايتادى، «ا ق ش-تا بەرىلگەن ەركىندىك سونشالىق، ءتىپتى اركىمنىڭ اقىماقتىق جاساۋعا قۇقىعى بار». الەمنىڭ باسقا ەلدەرىندە اقىماقتىق جاساۋ ءۇشىن قۇقىق بەرۋدىڭ قاجەتى جوق. اقىماق بولۋ دا - مىندەت ەمەس. «ەستىمەگەن ەلدە كوپتىڭ» كەرى وسى شىعار.

كامشات تاسبولات

«ايقىن». 2013

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى