اۋعانستان زينا جاساعان ايەلدەرگە تاسپەن ۇرۋ ءادىسىن قايتا قولدانباق
كابۋل. KAZINFORM - «تاليبان» قوزعالىسىنىڭ جوعارعى كوشباسشىسى حايباتۋللا احۋنزادا ەلدە زينا جاساعانى ءۇشىن ايەلدەردى جاپپاي دۇرە سوعۋ جانە تاسپەن ۇرۋ ادىستەرى قايتارىلاتىنىن حابارلادى. بۇل تۋرالى The Guardian جازدى.
- ايەلدەردى (قياناتى ءۇشىن) قامشىمەن ساباپ، تاسپەن ۇرامىز، - دەيدى احۋنزادا.
«تاليبان» قوزعالىسىنىڭ جوعارعى كوشباسشىسى مۇنداي ءادىستى ايەل قۇقىعىنىڭ بۇزىلۋى دەپ سانايتىنداردى «شايتاننىڭ قىزمەتشىلەرى» دەپ اتادى.
- ءسىز مۇنى ايەلدەر قۇقىعىن بۇزۋ دەپ اتاي الۋىڭىز مۇمكىن، ويتكەنى بۇل ءسىزدىڭ دەموكراتيالىق پرينتسيپتەرىڭىزگە قايشى كەلەدى، - دەيدى ول.
حايباتۋللا احۋنزادا بۇل ارەكەتىن تاليباننىڭ باتىس ىقپالىنا قارسى كۇرەسىنىڭ جالعاسى دەپ باعالادى.
- تاليباننىڭ جۇمىسى كابۋلدى باسىپ الۋمەن بىتكەن جوق، ەندى عانا باستالدى، - دەيدى «تاليبان» قوزعالىسىنىڭ جوعارعى كوشباسشىسى.
زاڭگەر ءارى اۋعانستانداعى «ايەلدەردىڭ ءۇمىت ايناسى» قۇقىق قورعاۋ ۇيىمىنىڭ جەتەكشىسى سافيا ارەفيدىڭ ايتۋىنشا، بۇل مالىمدەمە اۋعان ايەلدەرىن 1990-جىلدارداعى تاليبان بيلىگىنىڭ ەڭ زۇلمات كۇندەرىنە قايتارادى.
- قازىر اۋعان ايەلدەرىن قۇتقاراتىن ەشكىم جوق. حالىقارالىق قوعامداستىق ايەلدەر قۇقىعىنىڭ بۇزىلۋىنا ءۇنسىز قاراپ تۇرۋ جولىن تاڭدادى، - دەيدى ارەفي.
قۇقىق قورعاۋشىلار ەلدەگى 14 ميلليون ايەل مەن قىزداردىڭ قۇقىقتارى تولىقتاي جويىلدى دەپ ەسەپتەيدى.
اۋعانستانداعى Human Rights Watch ۇيىمىنىڭ مالىمەتىنشە، وتكەن جىلدىڭ وزىندە تاليبان تاعايىنداعان سۋديالار 417 ادامدى جاپپاي ۇرىپ-سوعۋعا جانە ءولىم جازاسىنا كەسۋگە بۇيرىق بەرگەن. ولاردىڭ 57- ءسى ايەلدەر.
