ابزال قۇسپان باس پروكۋرورعا التاي كولگىنوۆ قول قويعان قاۋلى جونىندە ساۋال جولدادى

«اكىمنىڭ قاۋلىسىنا سايكەس، قالا تۇرعىندارىنا باعباندىقپەن اينالىسۋ ءۇشىن «ۆەنەرا» باعباندىق سەرىكتەستىگى ارقىلى جەر ۋچاسكەلەرى زاڭسىز بەرىلگەن. زاڭسىزدىعى سول، اتالعان جەر ۋچاسكەلەرى جايىق وزەنىنىڭ رەكرەاتسيالىق سۋ قورعاۋ ايماعىنا جاتادى، قالىڭ اعاش ءوسىپ تۇر سوعان قاراماستان ول جەرلەر جايىق-كاسپي باسسەين ينسپەكتسياسىنىڭ كەلىسىمىنسىز بەرىلگەن. ناتيجەسىندە قولدانىستاعى جەر كودەكسى، سۋ كودەكسى، ەكولوگيا كودەكسىمەن، 200 مىڭعا جۋىق جەر كەزەگىندە تۇرعان ورالدىقتاردىڭ كونستيتۋتسيالىق قۇقىقتارى بۇزىلعان»، - دەدى دەپۋتات.

ونىڭ مالىمەتىنشە، قالا اكىمىنىڭ وكىلى سوتتا زاڭبۇزۋشىلىقپەن تولىق كەلىسكەنىمەن، جەر بەرىلگەنىنە 3 جىلدان استام ۋاقىت ءوتىپ كەتكەنىن العا تارتىپ، ۋاكىلەتتى ورگاننىڭ تالاپ ارىزىن قاناعاتتاندىرۋدان باس تارتۋدى سۇراعان.

پروكۋراتۋرا وكىلى دە قالالىق اكىمشىلىكتى قولداپ قورىتىندى بەرگەن. سۋديا دا ولارمەن كەلىسىپ، تالاپ ارىزدى قاناعاتتاندىرۋسىز قالدىرادى.

ورال قالاسىنىڭ سول كەزدەگى اكىمى ا. كولگىنوۆ قول قويعان قاۋلى بويىنشا، زاڭسىز جەر ۋچاسكەسىن العان جەر يەلەرىنىڭ الداعى كوكتەمدە جايىق جاعاسىنداعى اعاشتاردى قىرقىپ، تابيعاتقا ولشەۋسىز زيان كەلتىرە وتىرىپ، قۇرىلىس جۇمىستارىن باستاۋىنا كەڭىنەن جول اشىلدى.

«سەبەبى قولىندا جوعارعى سوتتىڭ شەشىمى بار. ول، ءوز كەزەگىندە قالا تۇرعىندارى مەن تابيعات جاناشىرلارىنىڭ اشۋ- ىزاسىن تۋدىراتىنى تۇسىنىكتى، الايدا ول جەر يەلەرىنىڭ قۇرىلىس جۇرگىزۋىنە ەندىگى جەردە ەشكىم توسقاۋىل قويا المايدى. سونىمەن قاتار، وسى ىسپەن اينالىسۋ بارىسىندا، قولىما «ۆەنەرا» باعباندىق سەرىكتەستىگىنىڭ ارىزى بويىنشا جەرگىلىكتى انتيكور تاراپىنان جۇرگىزىلگەن تەرگەۋ ماتەريالدارى ءتۇستى. وعان سايكەس 2019-جىلدان باستاپ وسى فاكت بويىنشا تىركەلگەن قىلمىستىق ءىس ەكى رەت قىسقارتىلعان»، - دەيدى ابزال قۇسپان.

دەپۋتات جەردى مۇددەلى ادامدارعا راسىمدەۋدىڭ قۇيتىرقى سحەماسى بولعانىن ايتادى.

«مىنە، مەنىڭ قولىمدا - اتالعان سەرىكتەستىك باسشىسى 2019-جىلدىڭ 13- مامىرىندا قولىن قويىپ، ءمورىن باسقان ارىز. وعان سايكەس، جايىق وزەنى بويىنداعى جەرلەر ءاۋ باستا جەرگىلىكتى اكىمدىك، جەرگە ورنالاستىرۋ جونىندەگى مەملەكەتتىك جوبالاۋ ينستيتۋتى مەن پروكۋراتۋرا قىزمەتكەرلەرى ۇسىنعان ءتىزىم بويىنشا ءوز كىسىلەرىنىڭ، ورىسشا ايتقاندا „پودستاۆنوي“ ادامدار اتىنا راسىمدەلىپ، كەيىن باسقا ادامدارعا اۋىستىرىلعان. بۇل فاكتىلەر تەرگەۋ بارىسىندا انىقتالسا دا، قىلمىستىق ءىس بۇگىنگى كۇنى توقتاپ تۇر. ەڭ قىزىعى، ءدال وسى قىلمىستىق ءىس تەرگەلىپ جاتقان تۇستا، 2022-جىلدىڭ 30- جەلتوقسانىندا، ياعني جاڭاجىلدىق قاربالاستى پايدالانىپ الدەكىمدەر جەرگە ورنالاستىرۋ جونىندەگى مەملەكەتتىك جوبالاۋ ينستيتۋتىنىڭ ارحيۆىنە قاساقانا ءورت قويعان، سونىڭ سالدارىنان جەر كاداسترىنىڭ مالىمەتتەر بازاسى ورنالاسقان سەرۆەر جانىپ كەتكەن. قازىرگى تاڭدا بۇل قىلمىستىق ءىس تە كۇدىكتىنىڭ تابىلماۋىنا بايلانىستى توقتاتىلعان»، - دەيدى ول.

ساۋال يەسى قۇزىرلى ورگان باسشىسىنان جوعارعى سوتتىڭ وسى كۇماندى شەشىمىنە تالداۋ جۇرگىزۋ كەرەك دەپ ەسەپتەيدى.

«قۇرمەتتى بەرىك نوعاي ۇلى، سىزدەن ب ق و- داعى الەۋمەتتىك شيەلەنىستەردىڭ الدىن الۋ ماقساتىندا جوعارعى سوتتىڭ ازاماتتىق ىستەر بويىنشا قالىپتاسقان سوت تاجىريبەسىنە تالداۋ جۇرگىزىپ، پروكۋرورلىق ىقپال ەتۋ شارالارىن قولدانۋدى سۇرايمىن»، - دەدى ابزال قۇسپان.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى