اباي وبلىسىنداعى ءورت: 400 گەكتار ورمان القابى جانىپ كەتتى
سەمەي. KAZINFORM - اباي وبلىسىنداعى ءورت الدىن الا بولجام بويىنشا 1200 گەكتار اۋماقتى شارپىعان. ونىڭ 800 گەكتارى دالا، 400 گەكتارى - ورمان القابى. بۇل مالىمەتتەردى بۇگىن اباي وبلىسىنىڭ اكىمدىگى تاراتتى.
اكىمدىكتىڭ دەرەكتەرىنە قاراعاندا، اباي، شىعىس قازاقستان جانە پاۆلودار وبلىستارىنىڭ توتەنشە جاعدايلار دەپارتامەنتتەرى، وبلىستىق پوليسيا دەپارتامەنتى، «سەمەي ورمانى» مەن «ەرتىس ورمانى» مەكەمەلەرىنىڭ قىزمەتكەرلەرى جانە جەرگىلىكتى اتقارۋشى ورگاندار جاعدايدى ءالى دە باقىلاۋدا ۇستاپ وتىر.
قاراعاندى وبلىسى مەن استانا قالاسىنان قوسىمشا كۇشتەر مەن تەحنيكا كومەككە كەلدى.
اباي وبلىسىنىڭ اكىمى بەرىك ءۋالي توتەنشە جاعدايلار مينيسترلىگىنىڭ وكىلدەرىمەن بىرگە بۇگىن تاڭەرتەڭ ورتتەن زارداپ شەككەن موروزوۆ فيليالىنىڭ سوسنوۆ ورمانشىلىعىنا تىكۇشاقپەن اۋەدەن باقىلاۋ جۇرگىزدى.
- تىكۇشاقپەن ورتەنگەن اۋماقتاردى مۇقيات قاراپ شىقتىق. ءورتتىڭ تولىق توقتاتىلعانىنا كوز جەتكىزىپ، ەلدى مەكەندەرگە، تۇرعىندارعا قاۋىپسىز بولۋىن باقىلاۋدا ۇستايمىز، - دەدى ايماق باسشىسى.
ءورتتى ءسوندىرۋ جۇمىستارىنا 419 ادام، 140 قا جۋىق تەحنيكا جۇمىلدىرىلدى.
ەسكە سالايىق، كەشە تۇستەن كەيىن بەسقاراعاي اۋدانىنىڭ قويانباي اۋىلىنىڭ شەتىندە قۇرعاق ءشوپ جانىپ، قاتتى جەلدىڭ ەكپىنىمەن قىزىل جالىن «سەمەي ورمانى» موروزوۆ فيليالى اۋماعىنا تارالعان بولاتىن.
بۇگىن تاڭ اتا توتەنشە جاعدايلار مينيسترلىگىنىڭ باسپا ءسوز قىزمەتى اباي وبلىسىنداعى ءورتتىڭ وقشاۋلانعانىن حابارلادى.
