اباي وبلىسىندا 3 مىڭعا جۋىق سۋقۇزعىندى اتۋعا رۇقسات بەرىلمەك
سەمەي. KAZINFORM - اباي وبلىسىندا سۋقۇزعىندارىنىڭ ءوسىپ كەلە جاتقان پوپۋلياتسياسىن رەتتەۋ بويىنشا جۇمىس جۇرگىزىلۋدە.
وبلىس اكىمدىگى قورشاعان ورتانى قورعاۋ جونىندەگى 2023-2025 -جىلدارعا ارنالعان ءىس-شارالار جوسپارى شەڭبەرىندە سۋقۇزعىندارىنىڭ ءوسىپ كەلە جاتقان پوپۋلياتسياسىن رەتتەۋ بويىنشا جۇمىس جۇرگىزۋدە.
«سوڭعى ۋاقىتتا اباي وبلىسىندا سانى ارتىپ كەلە جاتقان سۋقۇزعىندار كۇنىنە 5 تونناعا جۋىق بالىق تۇتىنادى. ەگەر جاعداي وزگەرىسسىز قالسا، وندا سۋ ايدىندارىنىڭ بيولوگيالىق تەپە-تەڭدىگى مەن يحتيولوگيالىق جاعدايىنا ەلەۋلى زالال كەلتىرىلەدى. سوندىقتان سۋقۇزعىن پوپۋلياتسياسىن رەتتەۋدىڭ دەرەۋ ءتيىمدى ادىستەرى قاجەت»، - دەپ حابارلادى ءوڭىر اكىمدىگىنەن.
سونداي-اق ولاردىڭ وسىمدىك جانىندا قالدىراتىن ءناجىسىنىڭ كەسىرىنەن جاسىل جەلەك ولەدى. ويتكەنى وندا ازوتتىڭ جوعارى بولۋى وسىمدىكتەر ءۇشىن اسا زياندى.
«وسىعان بايلانىستى، 2023 -جىلى وبلىستىڭ بالىق شارۋاشىلىعى سۋ ايدىندارىندا بالىق ونىمدىلىگىن ارتتىرۋ ماقساتىندا سۋقۇزعىندارىنىڭ سانىن رەتتەۋدىڭ بيولوگيالىق نەگىزدەمەسىن ازىرلەي وتىرىپ، زەرتتەۋ جۇمىستارى جۇرگىزىلدى. بيولوگيالىق نەگىزدەمەگە سايكەس، 2979 سۋقۇزعىندا اتۋ ارقىلى ازايتۋ ۇسىنىلادى. بۇل قۇستىڭ جالپى سانىنىڭ %20 قۇرايدى»، - دەلىنگەن اقپاراتتا.
ەندى اباي وبلىسىنىڭ تابيعي رەسۋرستار جانە تابيعات پايدالانۋدى رەتتەۋ باسقارماسى سۋقۇزعىندارىنىڭ سانىن قىسقارتۋ ماقساتىندا ەرتىس وزەنى، الاكول جانە ساسىقكول اۋماعىندا قۇستاردى اتقىزۋ ءۇشىن مەملەكەتتىك ساتىپ الۋ پورتالىندا كونكۋرس وتكىزەدى.
اۆتور
تالعاتجان مۇحامەتبەك ۇلى
