اۋە تاسىمالىنا قاتىستى ارىز-شاعىم كوپ - ۇكىمەت باسشىسى
استانا. KAZINFORM - ۇكىمەت باسشىسى ولجاس بەكتەنوۆ وتاندىق اۋە قاتىناسى سالاسىنداعى ماڭىزدى فاكتورلاردى اتادى.
- ەلىمىزدىڭ اۋەجايلارى حالىقارالىق ستاندارتتار بويىنشا مۋلتيمودالدى ورتالىققا اينالۋعا ءتيىس. بۇل ءارتۇرلى كولىك تۇرلەرىمەن جەتكىزىلەتىن جۇكتەردى قابىلداۋ جانە تاراتۋ قىزمەتىنىڭ ساپاسىن ارتتىرۋعا مۇمكىندىك بەرەدى. اتالعان ءىس-شارا اۋە حابىنا اۆتوموبيل جانە تەمىرجولداردى تارتا وتىرىپ، ينفراقۇرىلىمدى جاڭعىرتۋ جۇمىستارىمەن قاتار جۇرۋگە ءتيىس. جۇك تاسىمالى جانە ولاردى وڭدەۋ بويىنشا وزىق سيفرلىق تەحنولوگيالاردى ەنگىزۋ كەرەك. سونداي-اق جولاۋشىلارعا ەڭ جوعارى ستاندارتتار بويىنشا قىزمەت كورسەتۋ ساپاسىن ارتتىرۋعا ەرەكشە نازار اۋدارىڭىزدار. بۇل ماسەلەگە قاتىستى ارىز-شاعىم كوپ، - دەدى ولجاس بەكتەنوۆ ۇكىمەت وتىرىسىندا.
وسى ورايدا پرەمەر-مينيستر جولاۋشىلارعا ساپالى قىزمەت كورسەتۋگە قاتىستى پروبلەمالاردى شۇعىل ءارى جۇيەلى شەشۋ كەرەكتىگىن ايتتى.
- زاماناۋي سيفرلىق تەحنولوگيالار وپەراتسيالىق پروتسەستەردى وڭتايلاندىرۋعا، جولاۋشىلارعا قىزمەت كورسەتۋ ءىسىن جەدەلدەتۋگە جانە شىعىنداردى ازايتۋعا مۇمكىندىك بەرەدى، - دەيدى ول.
سونداي-اق ۇكىمەت باسشىسى اۆياتسيا سالاسىنىڭ ءتۋريزمدى دامىتۋدىڭ ماڭىزدى فاكتورى ەكەنىنە توقتالدى.
- كەندىرلى، زايسان جانە قاتونقاراعاي كۋرورتتىق ايماقتارى ايقىندالدى. ولاردا جاڭا اۋەجايلاردىڭ قۇرىلىس جۇمىستارى جاقىندا باستالىپ، بيىل اياقتالۋى ءتيىس. كولىك مينيسترلىگى شاعىن اۆياتسيانى دامىتۋ جۇمىستارىن كۇشەيتۋى كەرەك. بۇگىندە اۆياتسيا سالاسىنىڭ ءوسۋ رەزەرۆتەرى جانە الداعى جىلعا ارنالعان مىندەتتەر ايقىندالدى. دەگەنمەن، شەشىمىن تاپپاعان سۇراقتار بار، - دەپ تولىقتىردى و. بەكتەنوۆ.
بۇعان دەيىن ۇكىمەت وتىرىسىندا اۋە رەيستەرىنىڭ كەشىگۋىن ازايتۋ ءۇشىن جاڭا ۇشاقتار الىناتىنى ايتىلدى.
