اۋە رەيستەرىنىڭ كەشىگۋى قالىپتى ادەتكە اينالىپ بارادى - ۇكىمەت باسشىسى

«بۇگىندە اۆياتسيا سالاسىنىڭ دامۋ كورسەتكىشتەرى جامان ەمەس. ءبىر جىل ىشىندە رەيستەردىڭ سانى 2 ەسەگە جۋىق، ياعني 410 مىڭعا دەيىن ۇلعايدى. جولاۋشىلار اعىنى %22 ءوسىپ، شامامەن 13 ميلليون ادامعا جەتەدى دەپ كۇتىلۋدە. ەل ىشىندەگى اۋە تاسىمالى دا ەداۋىر ءوستى. 51 مارشرۋت بويىنشا اپتاسىنا 644 رەيس جاسالادى. بيىل 16 حالىقارالىق مارشرۋت اشىلدى جانە قايتا جانداندى. كەلەسى جىلى كۋالا-لۋمپۋر، سينگاپۋر، توكيو جانە باسقا قالالارعا جاڭا رەيستەر اشۋ جوسپارلانىپ وتىر. اۋەجايلاردىڭ ينفراقۇرىلىمى دا دامۋدا»، - دەدى ۇكىمەت باسشىسى.

ونىڭ اتاپ وتۋىنشە، وسى سالاعا كەلگەن جەكە ينۆەستورلار ءقازىردىڭ وزىندە اۋەجايلاردى دامىتۋعا 2,1 ميلليارد دوللارعا جۋىق قاراجات سالدى.

«اتاپ ايتقاندا، الماتىدا پەرروندى كۇردەلى جوندەۋ جۇمىستارى جۇرگىزىلۋدە. سونداي-اق، جۇكتەردى وڭدەۋ راسىمدەرىن جەتىلدىرۋ شارالارى قولعا الىندى. شىمكەنتتە جاڭا جولاۋشىلار تەرمينالىنىڭ قۇرىلىسى اياقتالۋعا جاقىن. استانادا بىرىككەن اراب امىرلىكتەرىنەن كەلگەن كومپانيا ۇشۋ-قونۋ جولاعىن رەكونسترۋكتسيالاۋدى، كارگو-تەرمينالىن كەڭەيتۋدى جوسپارلاپ وتىر»، - دەدى ول.

دەگەنمەن، پرەمەر-مينيستر بۇل سالادا شۇعىل شەشىمدەردى قاجەت ەتەتىن وزەكتى ماسەلەلەر بار ەكەندىگىنە توقتالدى.

«ايتالىق، نەگىزگى ماسەلەنىڭ ءبىرى - اۆياوتىن تاپشىلىعى. ول جىلىنا شامامەن 300 مىڭ توننانى قۇرايدى. بۇل تاپشىلىق يمپورت ەسەبىنەن جابىلىپ كەلەدى. ماسەلەنى شەشۋ ءۇشىن وتىن جەتكىزۋ كانالدارىن ءارتاراپتاندىرىپ، ونى ساقتاۋعا ارنالعان ءتيىستى ينفراقۇرىلىمدى دامىتۋ قاجەت. سونداي-اق، اۋەجايلاردى دامىتۋ دا قوسىمشا شارالاردى تالاپ ەتەدى. ول ءۇشىن اۋەجاي ينفراقۇرىلىمىن دامىتىپ، جۇكتەر مەن جولاۋشىلاردى راسىمدەۋ پروتسەسستەرىن تولىق اۆتوماتتاندىرۋ قاجەت. بۇل 2030-جىلعا قاراي وڭدەلەتىن جۇك كولەمىن جىلىنا 130 مىڭ توننادان 1 ميلليون تونناعا دەيىن، ال جولاۋشىلار اعىنىن 25 ميلليون ادامعا دەيىن ۇلعايتۋعا مۇمكىندىك بەرەدى»، - دەدى ءاليحان سمايىلوۆ.

ۇكىمەت باسشىسى سالانى كادرلارمەن قامتاماسىز ەتۋدە دە پروبلەما بار ەكەندىگىن اشىق ايتتى.

«بۇگىندە ۇشقىشتار، ينجەنەرلەر مەن تەحنيكالىق پەرسونالدار جەتىسپەيدى. رەيستەردىڭ كەشىگۋى دە قالىپتى ادەتكە اينالىپ بارادى. وعان قولايسىز اۋا-رايى عانا سەبەپشى ەمەس. سوندىقتان، اۆياكومپانيالار جولاۋشىلار مەن ۇشاقتارعا قىزمەت كورسەتۋ ساپاسىن جاقسارتىپ، اۋە پاركىن كەڭەيتۋى قاجەت»، - دەدى ۇكىمەت باسشىسى.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى