ا ق ش يزرايلگە قولداۋ كورسەتۋدى جالعاستىرادى - دجو بايدەن
ا ق ش پرەزيدەنتى دجو بايدەن سارسەنبى كۇنى تەل-اۆيۆتە يزرايل پرەمەر-مينيستر بينيامين نەتانياحۋ جانە ەلدىڭ اسكەري كابينەتىنىڭ مۇشەلەرىمەن وتكەن كەڭەيتىلگەن ەكىجاقتى كەزدەسۋدە ا ق ش يزرايلگە قولداۋ كورسەتەتىنىن ايتىپ، ءسوز بەردى.
Kazinform اگەنتتىگى بۇل تۋرالى CNN تەلەارناسىنا سىلتەمە جاساپ حابارلايدى.
كەزدەسۋدە بايدەن ا ق ش يزرايلگە «ءوز حالقىن قورعاۋ» كەزىندە قولداۋ كورسەتۋدى جالعاستىراتىنىن ايتتى.
«ءبىز جازىقسىز بەيبىت تۇرعىندار جاپا شەگەتىن قايعىلى وقيعالاردىڭ الدىن الۋ ءۇشىن سىزبەن جانە ايماقتاعى سەرىكتەستەرمەن جۇمىس ىستەۋدى جالعاستىرامىز»، - دەدى بايدەن.
ول 7- قازانداعى حاماس شابۋىلىن «قاتىگەز جانە ادامگەرشىلىككە جاتپايتىن ءىس» دەپ اتادى.
ءوز كەزەگىندە نەتانياحۋ حاماستى «ادامزاتقا قارسى سۇمدىق قوس سوعىس قىلمىسىن» جاساعانى ءۇشىن سىنادى.
«يزرايل بەيبىت تۇرعىنداردىڭ شىعىنىن ازايتۋعا، ال حاماس ولاردى بارىنشا ارتتىرۋعا تىرىسۋدا»، - دەپ اتاپ ءوتتى نەتانياحۋ حاماستىڭ بەيبىت تۇرعىنداردى ءتىرى قالقان رەتىندە پايدالانىپ جاتقانىن تىلگە تيەك ەتە وتىرىپ.
يزرايل پرەمەر-ءمينيسترى تۇندە گازا سەكتورىنداعى اۋرۋحانادا بولعان جارىلىسقا دا توقتالدى. ونىڭ ايتۋىنشا، لاڭكەستەر اتقىلاعان زىمىران دۇرىس اتپاي، پالەستينا اۋرۋحاناسىنا قۇلاعان.
«بۇكىل الەم ادىلەتتى تۇردە اشۋعا بۋلىقتى - ءبىراق بۇل اشۋ يزرايلگە ەمەس، لاڭكەستەرگە باعىتتالعان بولۋى كەرەك. بۇل سوعىس كەزىندە يزرايل بەيبىت تۇرعىنداردى قاۋىپتەن ساقتاپ قالۋ ءۇشىن قولدان كەلگەننىڭ ءبارىن جاسايدى»، - دەدى ول.
گازا بيلىگى جارىلىسقا يزرايل جاۋاپتى ەكەنىن مالىمدەدى، ال يزرايل قورعانىس كۇشتەرى بارلاۋ مالىمەتتەرى جارىلىسقا پالەستينالىق «يسلامدىق جيھاد» توبىنىڭ جاۋاپتى ەكەنىن كورسەتتى دەپ جاۋاپ بەردى.
وسىعان دەيىن ا ق ش پرەزيدەنتى دجو بايدەننىڭ يزرايلگە بارعانى تۋرالى حابارلاعان ەدىك.
