ا ق ش ۆيتسە-پرەزيدەنتى يزرايل مەن گازاعا بايلانىستى جوسپارلارى تۋرالى ايتتى

ۆيتسە-پرەزيدەنت يزرايل «ءوزىن-ءوزى قورعاۋعا قۇقىلى» ەكەنىن، ءبىراق «حاماس پەن پالەستينالىقتاردى شاتاستىرماۋ كەرەكتىگىن» باسا ايتتى.

ونىڭ سوزىنشە، پالەستينالىقتار يزرايلدىكتەرمەن قاتار قاۋىپسىزدىككە، ءوز تاعدىرىن ءوزى شەشۋگە، جانە قۇرمەتكە لايىقتى.

حارريس سونىمەن قاتار يزرايل-پالەستينا قاقتىعىسىندا سوعىس ەرەجەلەرىن ۇستانۋ قاجەتتىگىن اتاپ ءوتتى. ال يراندى بۇل ماسەلەگە ارالاسپاۋعا شاقىردى.

7-قازان كۇنى تاڭەرتەڭ حاماس-تىڭ «يزز اد-دين ءال-قاسسام بريگادالارى» اسكەري قاناتى يزرايلگە قارسى «ءال-اقسا تاسقىنى» وپەراتسياسىنىڭ باستالعانىن حابارلادى. گازا سەكتورىنان يزرايلگە قاراي مىڭداعان زىمىران اتىلىپ، قارۋلى توپتار يزرايل ەلدى مەكەندەرىنە باسىپ كىردى.

حاماس بۇل وپەراتسيانىڭ وككۋپاتسيالانعان شىعىس يەرۋساليمدەگى ءال-اقسا مەشىتىنە جاسالعان شابۋىل جانە يزرايلدىك قونىستانۋشىلار تاراپىنان پالەستينالىقتارعا زورلىق-زومبىلىقتىڭ كۇشەيۋىنە جاۋاپ رەتىندە جاسالعانىن ايتتى.

بۇعان جاۋاپ رەتىندە يزرايل ارمياسى ونداعان جويعىش ۇشاقتى پايدالانىپ، گازا سەكتورىندا حاماس-قا قارسى «تەمىر قىلىشتار» وپەراتسياسىن باستايتىنىن مالىمدەدى.

يزرايل-پالەستينا قاقتىعىسى ۋشىعا باستاعاننان بەرى 8 مىڭنان استام پالەستينالىق قازا تاپتى. رەسمي دەرەك بويىنشا، كوز جۇمعان پالەستينالىقتاردىڭ 70 پايىزعا جۋىعى - ايەلدەر مەن بالالار.

يزرايلدە قازا بولعاندار سانى 1400 ادامنان استى.

گازا سەكتورىنىڭ 2,3 ميلليون تۇرعىنى يزرايلدىڭ جاپپاي اۋەدەن بومبالاۋىنان جانە انكلاۆتىڭ تولىق بلوكاداسى سالدارىنان بولعان ازىق-تۇلىك، سۋ جانە ءدارى-دارمەك تاپشىلىعىنان زارداپ شەگىپ وتىر.

ب ۇ ۇ باس اسسامبلەياسى گۋمانيتارلىق جۇك جەتكىزۋ ءۇشىن اتىستى دەرەۋ توقتاتۋعا شاقىردى. بۇل رەتتە يوردانيا ۇسىنعان قاراردى 120 مەملەكەت قولدادى. الايدا يزرايل بۇل ۇسىنىستى قابىلدامادى.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى