ا ق ش گيپەردىبىستى زىمىراندى سىناقتان وتكىزدى
استانا. KAZINFORM - زىمىران فلوريدا شتاتى كاناۆەرال مۇيىسىندەگى عارىش كۇشتەرى اسكەري بازاسىنان ۇشىرىلدى. بۇل تۋرالى ا ق ش قورعانىس مينيسترلىگى حابارلادى.
بۇل گيپەردىبىستى AllUpRound (AUR) كەشەنىنىڭ بيىلعى ەكىنشى رەت ءساتتى وتكىزىلگەن سىناعى. سونداي-اق بۇل باتارەيا باسقارۋ ورتالىعى مەن ۇشىرۋ قۇرىلعىسىن پايدالانا وتىرىپ، ۇزاق قاشىقتىققا باعىتتالعان گيپەردىبىستى جۇيەنىڭ اسكەري ماقساتقا پايدالانۋ شاراسى.
- بۇل سىناق ءبىزدىڭ ەڭ وزىق قارۋلاندىرۋ جۇيەمىزدى دامىتۋداعى ماڭىزدى كەزەڭ. ءبىز conventional Prompt Strike (جىلدام جاھاندىق سوققى) جۇيەسىن اسكەري-تەڭىز كۇشتەرىنىڭ سۋ ءۇستى جانە سۋ استى كەمەلەرىنە ينتەگراتسيالاۋ بويىنشا جۇمىستاردى جالعاستىرامىز، - دەدى اسكەري-تەڭىز كۇشتەرىنىڭ حاتشىسى كارلوس دەل تورو.
گيپەردىبىستى جۇيە دىبىس جىلدامدىعىنان 5 ەسە تەز ۇشادى جانە جىلدامدىق، قاشىقتىق، يكەمدىلىك، بيىكتىك سياقتى مۇمكىندىكتەردى ۇشتاستىرادى. ءوز كەزەگىندە ول كەز كەلگەن قيىندىقتان ءوتىپ، جاقسى قورعالعان، ەرەكشە ماڭىزدى نىساندى جويۋعا مۇمكىندىك بەرەدى.
اسكەري-تەڭىز كۇشتەرىنىڭ ستراتەگيالىق باعدارلامالارىنىڭ ديرەكتورى، ۆيتسە-ادميرال كىشى دجونني ۆۋلف بۇل سىناق بىرلەسكەن سوعىس تالاپتارىن قاناعاتتاندىرۋ ءۇشىن ريەۆوليۋتسيالىق گيپەر دىبىستى قارۋ جۇيەسىن جاساۋعا مۇمكىندىك بەرگەن اسكەري-تەڭىز كۇشتەرى مەن ارميانىڭ ءساتتى سەرىكتەستىگىنىڭ كورىنىسى ەكەنىن اتاپ ءوتتى.
وسىعان دەيىن ك ح د ر- ءدىڭ جاڭا بالليستيكالىق جانە جاڭارتىلعان قاناتتى زىمىرانداردى سىناقتان وتكىزگەنى تۋرالى جازعان ەدىك.
