ا ق ش- تىڭ ديپلوماتتارىنا قىتايلىقتارمەن رومانتيكالىق قارىم-قاتىناس ورناتۋعا تىيىم سالىنعانى راس پا
استانا. KAZINFORM - ا ق ش ۇكىمەتى قىتايداعى ديپلوماتيالىق قىزمەتكەرلەر مەن ولاردىڭ وتباسىلارىنا، سونداي-اق قاۋىپسىزدىك رۇقساتى بار مەردىگەرلەرگە جەرگىلىكتى تۇرعىندارمەن كەز كەلگەن رومانتيكالىق نەمەسە جىنىستىق قارىم- قاتىناس ورناتۋعا تىيىم سالدى، دەپ حابارلايدى Kazinform «Deutsche Welle» (DW) باسىلىمىنا سىلتەمە جاساپ.
بۇل ساياسات ا ق ش- تىڭ قىتايداعى ەلشىسى نيكولاس بەرنستىڭ وسى جىلدىڭ قاڭتارىندا قىتايدان كەتكەنگە دەيىن جۇزەگە اسىرىلعان، الايدا ب ا ق وكىلدەرىنە جاقىندا عانا ءمالىم بولدى.
بۇعان دەيىن كەيبىر امەريكالىق مەكەمەلەر وسىنداي قارىم- قاتىناستارعا قاتىستى قاتاڭ شەكتەۋلەر ەنگىزگەنىمەن، قىرعي قاباق سوعىستان كەيىن مۇنداي اۋقىمدى تىيىم تۋرالى حابارلانعان ەمەس.
DW ءنىڭ حابارلاۋىنشا، وتكەن جىلدىڭ جازىندا ا ق ش قىتايداعى ديپلوماتيالىق وكىلدىكتەرىندە قىزمەت ەتەتىن تۇلعالارعا جەرگىلىكتى كۇزەت قىزمەتكەرلەرىمەن جانە باسقا دا قىتايلىق پەرسونالمەن رومانتيكالىق قارىم-قاتىناس ورناتۋعا تىيىم سالعان بولاتىن. ال بەرنس ەلشى بۇل شەكتەۋدى بارلىق قىتاي ازاماتتارىن قامتيتىنداي ەتىپ كەڭەيتكەن.
جاڭا ەرەجە ا ق ش- تىڭ بەيجىڭدەگى ەلشىلىگىن، گۋاڭجوۋ، شاڭحاي، شەنيان جانە ۋحانداعى باس كونسۋلدىقتاردى، سونداي-اق گونكونگتاعى امەريكالىق كونسۋلدىقتى قامتيدى. تىيىم قاڭتار ايىندا اۋىزشا جانە ەلەكتروندى حابارلامالار ارقىلى جەتكىزىلگەنىمەن، رەسمي تۇردە جاريالانعان جوق. ا ق ش مەملەكەتتىك دەپارتامەنتى بۇل ماسەلە بويىنشا تۇسىنىكتەمە بەرۋدەن باس تارتتى.
ساراپشىلاردىڭ پىكىرىنشە، قىرعي قاباق سوعىسى جىلدارىندا ا ق ش- تىڭ شەتەلدەگى ديپلوماتيالىق قىزمەتكەرلەرى قارسى بارلاۋ قىزمەتتەرىنىڭ ەرەكشە نازارىندا بولعان. 1980-جىلداردىڭ سوڭىندا ا ق ش ۇكىمەتى كەڭەس وداعى، شىعىس ەۋروپا جانە قىتايداعى ديپلوماتيالىق قىزمەتكەرلەرىنە جەرگىلىكتى تۇرعىندارمەن جىنىستىق قارىم-قاتىناس ورناتۋعا تىيىم سالعان بولاتىن. ءبىراق كەڭەس وداعى ىدىراعاننان كەيىن بۇل شەكتەۋلەر جۇمسارتىلدى.
قىتايداعى جاڭا ەرەجە كۇشىنە ەنگەنگە دەيىن امەريكالىق ديپلوماتتار جەرگىلىكتى تۇرعىندارمەن جاقىن قارىم-قاتىناس ورناتقان جاعدايدا ونى باسشىلىققا حابارلاۋعا مىندەتتەلگەن، ءبىراق تىكەلەي تىيىم سالىنباعان ەدى.
وسىعان دەيىن پرەزيدەنت دونالد ترامپ ا ق ش- تىڭ بارلىق ساۋدا سەرىكتەسى ءۇشىن %10 تاريفتى جانە ءوزىنىڭ «امەريكا ءبىرىنشى كەزەكتە» اتتى باعدارلاماسى اياسىندا وزگە ونداعان مەملەكەتكە جوعارى باج سالىعىن ەنگىزۋدى قاراستىراتىن، بارلىق سالانى قامتيتىن پاكەتىن ۇسىنعانىن جازعان ەدىك.
مۇقتار مۇرات
