ا ق ش-تىڭ ءبىرجاقتى تاريف ەنگىزۋى د س ۇ ەرەجەلەرىن ورەسكەل بۇزۋ بولىپ سانالادى - قىتاي
استانا. KAZINFORM - قىتاي ساۋدا پروتەكتسيونيزمىنىڭ سىن-قاتەرلەرىنە جاۋاپ بەرۋگە دايىن ەكەنىن مالىمدەدى، دەپ حابارلايدى Kazinform-نىڭ مەنشىكتى ءتىلشىسى.
بۇل تۋرالى بەيسەنبى كۇنى قىتاي حالىق رەسپۋبليكاسى ساۋدا مينيسترلىگىنىڭ رەسمي وكىلى حە يۋڭچيان مالىمدەدى.
- قىتاي مۇددەلى ەلدەرمەن ىنتىماقتاسۋعا دايىن، ەركىن ساۋدا مەن كوپجاقتىلىقتى قولداۋ ءۇشىن مۇددەلى ەلدەرمەن جۇمىس ىستەۋگە جانە ءبىرجاقتىلىق پەن ساۋدا پروتەكتسيونيزمىنىڭ سىن-قاتەرلەرىنە بىرلەسىپ جاۋاپ بەرۋگە دايىن، - دەدى حە يۋڭچيان باسپا ءسوز ءماسليحاتىندا.
ول ا ق ش-تىڭ كانادا مەن مەكسيكادان كەلەتىن تاۋارلارعا باج سالىعىن ارتتىرۋدى كەيىنگە قالدىرۋىنا پىكىر ءبىلدىردى.
ونىڭ ايتۋىنشا، ا ق ش-تىڭ بۇل ارەكەتى ەرەجەلەرگە نەگىزدەلگەن كوپجاقتى ساۋدا جۇيەسىن، جاھاندىق ونەركاسىپتىك جەتكىزۋ تىزبەگىنىڭ تۇراقتىلىعىن بۇزادى جانە جاھاندىق ساۋدا شيەلەنىستەرىن ارتتىرادى.
ايتا كەتەيىك، 1-اقپاندا ا ق ش قىتايدان كەلەتىن تاۋارلارعا 10 پايىزدىق باج سالىعىن ەنگىزەتىنىن حابارلاعان بولاتىن. ءوز كەزەگىندە قىتاي دۇنيەجۇزىلىك ساۋدا ۇيىمىنا شاعىم ءتۇسىردى. قىتاي دا ا ق ش-تىڭ تاريفتەرىنە جاۋاپ رەتىندە كومىر مەن سۇيىتىلعان تابيعي گازعا %15 باج سالىعىن ەنگىزدى.
