ا ق ش-تاعى ميگرانتتاردى كوستا-ريكاعا دەپورتاتسيالاۋ: وزبەكستان س ءى م ۇندەۋ جاسادى
تاشكەنت. KAZINFORM - كوستا-ريكا ۇكىمەتى ا ق ش- تان دەپورتاتسيالاناتىن 200 زاڭسىز ميگرانتتى قابىلداۋعا دايىن، دەپ حابارلايدى Kazinform اگەنتتىگىنىڭ مەنشىكتى ءتىلشىسى.
ميگرانتتاردىڭ باسىم كوپشىلىگى - ورتالىق ازيا مەن ءۇندىستان ازاماتتارى. اتالعان ماسەلەگە قاتىستى پىكىر بىلدىرگەن وزبەكستان سىرتقى ىستەر مينيسترلىگىنىڭ باسپا ءسوز حاتشىسى احرور بۋرحانوۆ بارلىق ازاماتقا ءتيىستى كومەك كورسەتىلەتىنىن مالىمدەدى.
- ءبىز ب ا ق ارقىلى باسقا ەلدەرگە دەپورتاتسيالانۋى ىقتيمال وزبەكستان ازاماتتارى جايلى اقپاراتتاردى باقىلاپ وتىرامىز. بۇل ماسەلە بويىنشا ەلىمىزدىڭ ديپلوماتيالىق وكىلدىكتەرى ا ق ش تاراپىنان مالىمەت سۇراتتى. سونداي-اق ديپلوماتتار ارقىلى لاتىن امەريكاسى مەملەكەتتەرىمەن بايلانىس ورناتىلدى. ءتيىستى جاۋاپتاردى العان ۋاقىتتا ا ق ش-تاعى ەلشىلىك قىزمەتكەرلەرى بارلىق وزبەكستان ازاماتىنا تولىق كومەك كورسەتەدى، - دەپ مالىمدەدى احرور بۋرحانوۆ.
ول اتاپ وتكەندەي، وزبەكستان مەن ا ق ش اراسىندا ءتيىستى كەلىسىم بار. وعان ساي دەپورتاتسيالاۋ ءتارتىبى جولعا قويىلعان. احرور بۋرحانوۆتىڭ سوزىنشە، زاڭسىز ميگرانتتار ادەتتە نيۋ-يورك - تاشكەنت مارشرۋتىمەن ەلگە ورالادى.
ايتا كەتەيىك، ا ق ش-تا زاڭسىز جۇرگەن 135 ميگرانت مىنگەن ۇشاق كوستا-ريكاعا بۇگىن قونۋى مۇمكىن. رەسمي سان-حوسە ورتالىق ازيا ەلدەرىنىڭ ازاماتتارىن ءوز اۋماعىندا 6 اپتاعا دەيىن عانا ورنالاستىرۋعا كەلىستى.
