ا ق ش-تا تاعى ءبىر بالا قىزىلشادان كوز جۇمدى
استانا. KAZINFORM - ا ق ش-تىڭ تەحاس شتاتىندا جۇزدەگەن بالا قىزىلشامەن اۋىرىپ، تاعى ءبىر ءبۇلدىرشىن ومىردەن ءوتتى. بۇل تۋرالى Lianhe Zaobao باسىلىمى حابارلادى.
باسىلىمنىڭ مالىمەتىنشە، قازا تاپقان قىز سەگىز جاستا ەكەن. ول تەحاس شتاتىنىڭ لاببوك قالاسىنداعى اۋرۋحانادا قىزىلشالىق وكپە جەتكىلىكسىزدىگى سەبەبىنەن كوز جۇمعان. بۇل سوڭعى ون جىلدا ا ق ش-تا قىزىلشاعا بايلانىستى تىركەلگەن ەكىنشى ءولىم.
ا ق ش دەنساۋلىق ساقتاۋ مينيسترلىگى بۇل جاعدايعا بايلانىستى ازىرگە تۇسىنىكتەمە بەرگەن جوق.
دەگەنمەن، ا ق ش-تىڭ دەنساۋلىق ساقتاۋ ءمينيسترى روبەرت كەننەدي سۋىق حاباردى ەستىگەن بويدا تەحاس شتاتىنا جۇمىس ساپارىمەن بارعان.
باسىلىم اتاپ وتكەندەي، كەننەدي جەرگىلىكتى ۋاقىت بويىنشا جەكسەنبى كۇنى ءبۇلدىرشىننىڭ جەرلەۋ راسىمىنە قاتىسادى. ۆاكسيناتسياعا كۇمانمەن قارايتىن بەلگىلى تۇلعالاردىڭ ءبىرى رەتىندە، كەننەدي اقپان ايىندا قىزىلشا سالدارىنان العاشقى ءولىم تىركەلگەندە، جۇقپالى اۋرۋلاردىڭ تارالۋىن قالىپتى قۇبىلىس دەپ جايماشۋاقتاعان بولاتىن.
تەحاس شتاتىنىڭ دەنساۋلىق ساقتاۋ قىزمەتى 4-ساۋىرگە دەيىن تاعى دا 59 بالاعا قىزىلشا شىققانىن حابارلادى. قاڭتار ايىنىڭ سوڭىنان بەرى تەحاستا جالپى 481 جاعداي راستالعان.
قىزىلشا باسقا شتاتتاردا دا تىركەلگەن، ولاردىڭ قاتارىندا نيۋ-مەكسيكو، وكلاحوما جانە كولورادو بار.
اقپان ايىندا تەحاستا ءبىر بالا قىزىلشادان كوز جۇمعان. ال ناۋرىز ايىندا نيۋ-مەكسيكو شتاتىندا ۆاكتسينا الماعان ەرەسەك ادامنىڭ قىزىلشامەن اۋىرعانى قايتىس بولعاننان كەيىن عانا انىقتالدى. قازىرگى كۇندە جەرگىلىكتى سوت-مەديتسينا قىزمەتى ونىڭ ءولىمىنىڭ ناقتى سەبەبىن تەكسەرىپ جاتىر.
ا ق ش-تىڭ اۋرۋلاردى باقىلاۋ جانە الدىن الۋ ورتالىعىنىڭ (CDC) 3-ساۋىردەگى مالىمەتى بويىنشا ءبىر اپتادا ەل بويىنشا 124 جاڭا جاعداي تىركەلىپ، قىزىلشانىڭ جىل باسىنان بەرگى جالپى سانى 607 گە جەتكەن.
وتكەن جىلى ا ق ش-تا 285 ادامعا قىزىلشا شىققان. رەسمي مالىمەت بويىنشا بيىل قىزىلشا جۇقتىرعان ناۋقاستاردىڭ 97 پايىزى ۆاكسينا الماعان نەمەسە ەكپە مارتەبەسى بەلگىسىز ادامدار.
