ا ق ش- تا جاس ءوسپىرىم جۇرەك اۋرۋىن بىرنەشە سەكۋندتا انىقتايتىن قولدانبا جاسادى
استانا. KAZINFORM - امەريكالىق جاس ءوسپىرىم جۇرەك اۋرۋىن بىرنەشە سەكۋندتا انىقتاي الاتىن جاساندى ينتەللەكتكە نەگىزدەلگەن قولدانبا جاسادى، دەپ حابارلايدى Oddity Central.
داللاستىڭ 14 جاسار جاس ءوسپىرىمى سيددحارت نانديالا جۇرەك اۋرۋىن دياگنوستيكالاۋعا ارنالعان يننوۆاتسيالىق قولدانبا جاساپ شىعاردى. Circadian AI دەپ اتالاتىن باعدارلاما سمارتفون ميكروفونى ارقىلى جازىلعان جۇرەك سوعۋ دىبىستارىن تالداۋ ارقىلى جەتى سەكۋند ىشىندە جۇرەك-قان تامىرلارى پاتولوگياسىن انىقتاۋعا قابىلەتتى.
جاس ونەرتاپقىش قازىردىڭ وزىندە Oracle جانە ARM كومپانيالارىنىڭ سەرتيفيكاتىنا يە جاساندى ينتەللەكت بويىنشا ەڭ جاس مامان رەتىندە تانىلدى. ونىڭ باعدارلاماسى ا ق ش- تا 15000 نان استام جانە ءۇندىستاندا 700 پاتسيەنتتە سىناقتان ءوتىپ، 96 پايىز دالدىكپەن دياگنوز قويدى.
تەحنولوگيا ءۇندىستاننىڭ گۋنتۋر قالاسىنداعى مەملەكەتتىك جالپى اۋرۋحانادا سىناقتان ءوتىپ، تيىمدىلىگى راستالدى. حايدارابادتا وتكەن جاساندى ينتەللەكت بويىنشا جاھاندىق سامميتتە سيددحارت قولدانباسىنىڭ ءومىردى ساقتاپ قالۋعا بولاتىن مەديتسينالىق قىزمەتتەرى شەكتەۋلى ايماقتار ءۇشىن جاسالعانىن اتاپ ءوتتى.
ءۇندىستاننىڭ اندحرا-پرادەش شتاتىنىڭ پرەمەر-ءمينيسترى جاس ونەرتاپقىشپەن كەزدەسكەننەن كەيىن ونىڭ ەرەكشە قابىلەتىن مويىنداپ، بولاشاقتاعى ازىرلەمەلەرىنە قولداۋ كورسەتۋگە ۋادە بەردى.
جاستىعىنا قاراماستان، سيددحارت ورتا مەكتەپتى ءبىتىردى جانە قازىر داللاس ۋنيۆەرسيتەتىندە ينفورماتيكا ماماندىعى بويىنشا ءبىلىم الۋدا.
