ا ق ش- تا شوشقانىڭ جۇرەگىن سالدىرعان الەمدەگى ەكىنشى ناۋقاس قايتىس بولدى
ا ق ش- تا 58 جاستاعى لوۋرەنس فوسەتت وزىنە وتا جاسالعاننان كەيىن التى اپتادان سوڭ كوز جۇمدى. ول - شوشقا جۇرەگى سالىنعان الەمدەگى ەكىنشى ناۋقاس.
Kazinform بۇل تۋرالى مەريلەند ۋنيۆەرسيتەتىنىڭ مەديتسينالىق ورتالىعىنا سىلتەمە جاساپ حابارلايدى.
«ءبىز جۇرەكتىڭ ايىقپاس دەرتىنە شالدىعىپ، گەنەتيكالىق تۇرلەندىرىلگەن شوشقا جۇرەگىن ترانسپلانتاتسيالاۋ بويىنشا الەمدە ەكىنشى وتا جاسالعان 58 جاستاعى لوۋرەنستىڭ قايتىس بولعانىن حابارلايمىز. 20- قىركۇيەكتە وتا جاساتقان ول التى اپتاعا جۋىق ۋاقىت ءومىر ءسۇردى»، - دەلىنگەن حابارلامادا.
ناۋقاس مەديتسينالىق ورتالىققا 14- قىركۇيەكتە جۇرەك جەتكىلىكسىزدىگى دياگنوزىمەن ءتۇستى. باستاپقى كەزدە-اق دارىگەرلەر وعان ءداستۇرلى ترانسپلانتاتسيالاۋ ادىستەرىمەن وتا جاساۋعا بولمايتىنىن مويىنداعان. الايدا 15- قىركۇيەكتە ا ق ش- تىڭ ازىق-تۇلىك جانە ءدارى-دارمەك باسقارماسى ناۋقاستىڭ ءومىرىن ۇزارتۋعا كومەكتەسەتىن وپەراتسياعا شۇعىل تۇردە رۇقسات بەردى.
ۋنيۆەرسيتەت ناۋقاستىڭ جۇرەگى ترانسپلانتاتسيالاۋدان سوڭ ءبىرىنشى ايدا وتە جاقسى جۇمىس ىستەگەنىن اتاپ ءوتتى. كەيىن ول فيزيوتەراپيادان ءوتىپ، قايتادان ءجۇرۋدى ۇيرەنۋگە تىرىستى. دەگەنمەن، دارىگەرلەر سوڭعى كۇندەرى ونىڭ بويىنان جۇرەكتى قابىلداماۋ بەلگىلەرىن بايقاپ، اقىرى ول قايتىس بولدى.
ەسكە سالا كەتسەك، ءبۇعان دەيىن مەريلەند ۋنيۆەرسيتەتىندە ەكىنشى رەت ادامعا گەنەتيكالىق تۇرلەندىرىلگەن شوشقا جۇرەگى سالىنعانى تۋرالى جازعان بولاتىنبىز.
