ا ق ش پەن قىتايدىڭ ساۋدا تەكەتىرەسى وزبەكستانعا تەرىس اسەر ەتۋى ىقتيمال
تاشكەنت. KAZINFORM - ا ق ش پەن قىتايدىڭ ساۋدا سالاسىنداعى شيەلەنىسى وزبەكستاننىڭ سىرتقى تاۋار اينالىمىنا تەرىس اسەر ەتۋى مۇمكىن، دەپ حابارلايدى Kazinform اگەنتتىگىنىڭ مەنشىكتى ءتىلشىسى.
بۇل تۋرالى ب ا ق وكىلدەرىنىڭ قاتىسۋىمەن وتكەن باسپاءسوز ءماسليحاتى بارىسىندا ءور ورتالىق بانكىنىڭ ۆاليۋتالىق رەتتەۋ جانە تولەم بالانسى دەپارتامەنتىنىڭ ديرەكتورى وتابەك توجيددينوۆ ءمالىم ەتتى.
سپيكەر اتاپ وتكەندەي، ساۋدا سالاسىنداعى تەكەتىرەستىڭ سالدارى وزبەكستاندى دا اينالىپ وتپەيدى. ويتكەنى، رەسمي بەيجىڭ تاشكەنتتىڭ نەگىزگى سىرتقى ساۋدا سەرىكتەسى سانالادى. بۇل رەتتە قىتاي تاراپى يمپورتتى ازايتىپ، ەكسپورتتى ۇلعايتۋى مۇمكىن.
وتابەك توجيددينوۆ ا ق ش پەن ق ح ر اراسىنداعى ساۋدا شيەلەنىسى دونالد ترامپتىڭ العاش رەت پرەزيدەنت بولىپ سايلانعان كەزەڭىندە دە بولعانىن اتاپ ءوتتى. 2018 -جىلى رەسمي ۆاشينگتون قىتايدا وندىرىلەتىن اليۋمينيي مەن بولاتقا قىمبات تاريف بەلگىلەدى، تيىسىنشە بەيجىڭ امەريكالىق تاۋارلارعا باج سالىعىن ەنگىزدى.
- 2019 -جىلى وزبەكستاننىڭ قىتايعا ەكسپورتى %22 عا قىسقارىپ، يمپورت %34 عا ءوستى. ياعني، قىتاي ا ق ش- قا ەكسپورتتى ازايتسا، وندا بۇل ەل وزگە نارىقتاردى ىزدەي باستايدى، ولاردىڭ ءبىرى، ارينە وزبەكستان. مۇنىڭ سالدارىنان ساۋدا بالانسىنداعى تاپشىلىق ارتۋى بولۋى مۇمكىن، - دەدى وتابەك توجيددينوۆ.
ونىڭ سوزىنشە، وزبەكستان مەن ورتالىق ازيا ەلدەرىنە قىتايلىق تاۋارلاردىڭ كوپ كولەمدە ەكسپورتتالۋى كولىك-لوگيستيكالىق قىزمەتتەرگە سۇرانىستتى ارتتىرادى. بۇل ءوز كەزەگىندە ساۋدا بالانسىنداعى تاپشىلىقتىڭ ءبىر بولىگىن جابۋعا ىقپال ەتەدى.
ورتالىق بانكتىڭ وكىلى ا ق ش پەن قىتاي اراسىنداعى ساۋدا تەكەتىرەسىنىڭ ىقتيمال سالدارىنا تولىق تالداۋ جاسالماعانىن ايتتى. ونىڭ اسەرى كەم دەگەندە 3 ايدان كەيىن ايقىن كورىنە باستايدى.
