ا ق ش مەملەكەتتىك حاتشىسى ساۋد ارابياسىنا باردى
استانا. KAZINFORM – ا ق ش مەملەكەتتىك حاتشىسى ماركو رۋبيو ساۋد ارابياسىنا باردى. امەريكا ديپلوماتياسىنىڭ باسشىسى ۋكرايناداعى سوعىستى توقتاتۋ كەلىسسوزدەرى ءۇشىن رەسەيلىك رەسمي تۇلعالارمەن كەزدەسپەك، دەپ حابارلايدى Kazinform اگەنتتىگى امەريكا داۋىسىنا سىلتەمە جاساپ.
بۇعان دەيىن ماركو رۋبيو ەۋروپالىق ەلدەردىڭ ۆاشينگتون مەن ماسكەۋ اراسىنداعى باستاپقى كەلىسسوزدەردەن تىس قالۋ ىقتيمالدىعىنا قاتىستى الاڭداۋشىلىعىن سەيىلتۋگە تىرىسقان بولاتىن. ول CBS تەلەكومپانياسىنا بەرگەن سۇحباتىندا ۋكرايناعا قاتىستى بايىپتى كەلىسسوزدەر پروتسەسىنىڭ باستالماعانىن اتاپ وتەدى. اتالعان كەلىسسوز ىلگەرىلەگەن جاعدايدا وعان ۋكراينا مەن ەۋروپانىڭ مىندەتتى تۇردە قاتىساتىنىن باسا ايتادى. مۇنان بولەك، ا ق ش مەملەكەتتىك حاتشىسى ۋكرايناداعى سوعىستى توقتاتۋ تۋرالى بارىنشا جان-جاقتى كەلىسسوزدەر ءۇشىن جاعداي جاساۋعا ۇمتىلاتىندىعىنا نازار اۋدارتادى.
بۇگىن رۋبيو جوعارى لاۋازىمدى ساۋديالىق كوشباسشىلارمەن كەزدەسەدى دەپ جوسپارلانعان. سونىمەن قاتار ساۋد ارابياسىنىڭ مۇراگەر حانزاداسى مۇحاممەد بين سالمانمەن دە كەزدەسۋى ىقتيمال.
ۋكراينا پرەزيدەنتى ۆلاديمير زەلەنسكيي دە اتالعان وڭىردە ساپارمەن ءجۇر. دەمالىس كۇنى بىرىككەن اراب امىرلىكتەرىنە كەلگەن زەلەنسكيي ساۋد ارابياسى مەن تۇركياعا ساپارلاۋعا نيەتتى ەكەندىگىن ايتقان. ءبىراق، ساپار مەرزىمى ازىرشە بەلگىسىز. مۇنان بولەك، ول رەسەيلىك نەمەسە امەريكالىق رەسمي تۇلعالارمەن كەزدەسۋدى جوسپارلاپ وتىرماعانىن اتاپ وتكەن.
ا ق ش دەلەگاتسياسى رەسەيمەن كەلىسسوز جۇرگىزۋ ءۇشىن ساۋد ارابياسىنا اتتانعانىن جازعان بولاتىنبىز.
