ا ق ش مەملەكەتتىك حاتشىسى پالەستينا مەملەكەتىن قۇرۋدى جەدەلدەتۋگە شاقىردى
ا ق ش مەملەكەتتىك حاتشىسى ەنتوني بلينكەن گازا سەكتورىنداعى اسكەري قيمىلداردى توقتاتا تۇرۋعا شاقىرعان ديپلوماتيالىق تۋرىن جالعاستىرىپ جاتىر. Kazinform بۇل تۋرالى BBC-گە سىلتەمە جاساپ حابارلايدى.
وسى دەمالىستا مەملەكەتتىك حاتشى بلينكەن باتىس جاعالاۋداعى راماللا قالاسىنا اياق استى ساپارلاپ بارىپ، پالەستينا اۆتونومياسىنىڭ پرەزيدەنتى ماحمۋد ابباسپەن كەزدەستى.
«ا ق ش مەملەكەتتىك دەپارتامەنتى وكىلىنىڭ سوزىنشە، كەزدەسۋ بارىسىندا بلينكەن ا ق ش- تىڭ اسا ماڭىزدى گۋمانيتارلىق كومەكتى جەتكىزۋ جانە گازا سەكتورىندا نەگىزگى قىزمەتتەردى جاڭعىرتۋعا نيەتتەس ەكەنىن راستادى. سونداي-اق، ول پالەستينالىقتاردى كۇشتەپ كوشىرۋگە بولمايتىنىن انىق ءتۇسىندىردى»، - دەپ ءمالىم ەتتى مەملەكەتتىك دەپارتامەنت وكىلى مەتيۋ ميللەر.
بلينكەن مەن ابباس باتىس جاعالاۋدا تىنىشتىق پەن تۇراقتىلىقتى قالپىنا كەلتىرۋ ءۇشىن كۇش سالۋ، ونىڭ ىشىندە پالەستينالىقتارعا قارسى كۇش كورسەتۋدى توقتاتىپ، كىنالىلەردى جاۋاپقا تارتۋ كەرەگىن تالقىلاعان.
سونىمەن قاتار بلينكەن ا ق ش «پالەستينا مەملەكەتىن قۇرۋعا دەگەن پالەستينالىقتاردىڭ زاڭدى ۇمتىلىسىن جۇزەگە اسىرۋ» ءۇشىن جۇمىس ىستەۋگە دايىن ەكەنىن ءبىلدىردى.
ماحمۋت ابباس ا ق ش مەملەكەتتىك حاتشىسىنا دەرەۋ وق جاۋدىرۋدى توقتاتىپ، گازا سەكتورىنا گۋمانيتارلىق كومەك كىرگىزۋگە رۇقسات بەرۋ كەرەگىن ايتتى.
سونداي-اق، ول «گازا سەكتورىنداعى پالەستينا حالقى يزرايلدىك اسكەري ماشينادان قالاي زارداپ شەگىپ جاتقانىن سيپاتتاۋعا ءسوزىم جەتپەيدى»، - دەدى.
سەنبى كۇنى بلينكەن يوردانيا مەن ەگيپەت سىرتقى ىستەر مينيسترلەرىمەن بىرلەسىپ باسپا ءسوز كونفەرەنتسياسىن وتكىزىپ، وقتى توقتاتۋ يدەياسىن جوققا شىعاردى. بۇل - حاماس توبىنا قايتا جاساقتالۋعا مۇمكىندىك بەرەتىنىن ايتىپ، ونىڭ ورنىنا گۋمانيتارلىق ۇزىلىسكە شاقىردى.
