ا ق ش G7 مالىمدەمەسىندەگى رەسەيدىڭ «اگرەسسور» اتاۋىنا قارسى
استانا. KAZINFORM - ا ق ش «جەتىلىك توپ» (G7) مالىمدەمەسىندە رەسەيدى رەسەي- ۋكراينا قاقتىعىسىندا اگرەسسور دەپ اتاۋعا قارسى، دەپ جازادى The New York Times.
امەريكانىڭ قارسىلىعى دونالد ترامپ وسى اپتانىڭ باسىندا رەسەيمەن سوعىستى «باستاعان» ۋكراينا ەكەنىن مالىمدەگەننەن كەيىن تۋىندادى.
G7 ەلدەرىنىڭ ءبىرىنىڭ جوعارى لاۋازىمدى شەنەۋنىگى كانادانىڭ ۋكراينانى قولداۋ تۋرالى مالىمدەمەنىڭ العاشقى جوباسىن باسقا التى مۇشە مەملەكەتكە تاراتقانىن ايتتى. وتتاۆا جوبانى جازۋدا جەتەكشىلىك ەتتى.
ءوز كەزەگىندە امەريكالىق تاراپ وسى اپتادا ءبىرىنشى جوبانى قاراپ شىعىپ، ۋكراينالىق دەپ تۇسىندىرۋگە بولاتىن بارلىق سىلتەمەلەردى الىپ تاستادى. ناتيجەسىندە قۇجات جوباسىندا رەسەي قاقتىعىستاعى اگرەسسور نەمەسە ۋكراينا باسقىنشىلىق قۇربانى رەتىندە اتالماي، بەيتاراپ قالدى.
قازىر ديپلوماتتار «رەسەيدىڭ ۋكرايناعا باسىپ كىرۋىنەن باستالعان جويقىن سوعىستى» سيپاتتايتىن، ءبىراق 2022 -جىلدان بەرى G7 مالىمدەمەلەرىندە قولدانىلعان «رەسەيلىك اگرەسسيا» نەمەسە «اگرەسسور» سوزدەرىن قولدانبايتىن جوباداعى تۇجىرىمدارمەن جۇمىس ىستەۋدى جالعاستىرىپ جاتىر.
اتى- ءجونىن اتاماۋدى سۇراعان G7 ەلدەرىنىڭ جوعارى لاۋازىمدى شەنەۋنىكتەرىنىڭ ءبىرى ءماتىندى ازىرلەۋ جانە ۇيلەستىرۋ دۇيسەنبىگە دەيىن جالعاسۋى مۇمكىن ەكەنىن حابارلادى.
Reuters اقپارات اگەنتتىگىنىڭ حابارلاۋىنشا، ا ق ش ۋكراينانىڭ ەگەمەندىگى مەن اۋماقتىق تۇتاستىعىن قولدايتىن جانە رەسەي اگرەسسياسىن ايىپتايتىن ب ۇ ۇ باس اسسامبلەياسىنىڭ قارارىنىڭ جوباسىن بىرلەسىپ جاساۋدان باس تارتتى.
G7 ەلدەرىنىڭ كەلىسسوزدەرى جالعاسىپ جاتىر جانە سوڭعى تۇجىرىمدار ءالى انىقتالعان جوق.
بۇعان دەيىن فرانسيا پرەزيدەنتى ەممانۋەل ماكرون مەن ۇلى بريتانيا پرەمەر-ءمينيسترى كير ستارمەر كەلەسى اپتادا دونالد ترامپپەن كەزدەسۋ ءۇشىن ۆاشينگتونعا باراتىنى تۋرالى حابارلانعان بولاتىن.
